Marikuq 13

Ló Htâng Buìnyì Pé Má Dùt Lò Râ Hkyô

Mht 24:1-21, 29-35; Luk 21:5-33

1Yesuq, noqkuq yhûm mai htoq ló é hkûn, Yhâng é chángzo rayùq gi, “Sará ê, wú aq; hkâ-í kô é lùqgòk pé! Hkâ-í hkìk é yhûm pé!” ga Yhang lé taî kat ri.

2Haú hkûn, Yesuq gi, “Nàng, yhûm mó shí pé lé myang lhê a nghut lhú? Lùqgòk shí pé gi, rachâm htoq racham lháng a kê lhum loshoq, hpyoq hpyi pyâm é hui râ nghut lhê.” gâ tû taî ri.

3Yesuq gi, Tsanlun bùm má, noqkuq yhûm shut hû mù zung tô é hkûn, Petiruq, Yakuq, Yohan eq Andire pé gi, Yhâng chyáng lé jé kômù, 4“Haú hkyô pé gi, hkâ-nhám dùt lò râ lhú? Haû dùt lò râ hkûn, hkâsû é lhô lho htoq lô râ nghut lhê lhú? Ngá-mòq lé taî kyô wú laq.” ga Yhang lé baú myî akô nghut ri.

5Haû mù, Yesuq gi, yhángmòq lé, “Núngmòq lé, ó yùq èq le a wó shuî nghoq sháng gàq, sidìq nyì keq. 6Hkâsu mù gâ le, ‘Ngò gi, haú yùq#13:6 Haú yùq gâ é gi, Hkrisidùq lé gâ é nghut lhê. nghut lhê.’ ga, Ngá myîng lé lâng é byù myo myo nyi htoq lô mù, byù myo myo lé shuî nghoq kôrâ nghut lhê. 7Núngmòq gi, majan dùt nyi é hkyô eq majan eq sêng é danglám pé lé, wó gyo kôjáng, hkâgyùq dàn kó. Haú hkyô pé gi, dùt lò râ za nghut lhê; nghut kôlhang, ló htâng é buìnyì gi, a nghut shi. 8Byù ra-myû eq ra-myû, mîngdán ralhum eq ralhum majan zân lhûm lò kôrâ nghut lhê. Jowò myo myo má, layàng nún é, mùtmó gyó é pé dùt lò râ nghut lhê. Haú pé gi, wuîhke jamjau hkyo é a-pûn awang za ru nghut ashî.

9Núngmòq gùng núngmòq sidìq nyì keq. Hkâsu mù gâ le, yhángmòq gi, núngmòq lé, târâ rûng pé má ê àp pyám kôrâ nghut é htoq agó, târâjong pé má núngmòq lé nhuq bàt kôrâ nghut lhê. Hau htoq agó, núngmòq gi, Ngá mying é yánmai, mau zau wuì eq hkóhkam pê é hí má, sàksé dông yàp ra kôrâ nghut lhê. 10Haû gabú danglù gi, a-myû bànshoq lé hí hko kyo ra râ nghut lhê. 11Núngmòq gi, chyup yu é hui luî, jep huî é hkûn, haî taí râ lé, hkâ-myìt chiq kó. Ahkyíng jé jáng, nang lé myìt htoq lô nhang é dông za taí aq; hkâsu mù gâ le, dang haú pé gi, núngmòq taî é a nghut, haû Chyoiyúng So èq taí nhang é ru nghut lhê.

12Nhiktâng gi, nhiktâng yhangchang, îwa gi, yhang zo lé, shî shoq àp pyâm lhum kôrâ nghut lhê; zo wuî gi, mó wuî lé gumlau toq mù, sat pyám nhâng kôrâ nghut lhê. 13Byù lhúnglhâng bang gi, Ngá é yánmai, núngmòq lé a nguì kut kôrâ nghut lhê; nghut kôlhang, jihtûm jé shoq wó hkam jân nyi é sû gi, hkyi yu é hui râ nghut lhê.

14‘Haû lhoqhten lhoqhpyoq é achaq achyut hkyô’#Dan 9:27, 11:31, 12:11 gi, yhang a nyi âng é jowò má yàp tô é lé, núngmòq myàng kôjáng (laiká nghap é sû gi, sê gyo sháng gàq), Yuda mau má nyi é bang gi, bùm pé shut hpang dòq ló kó sháng gàq. 15Yhûmhkûng htoq má nyi tô é sû gi, yhúmhkaû mâ é zè haî lé le, a ló gyó wang yù lo sháng gàq. 16Yò má nyi tô é sû gi, yhâng é buhîng lé a ló taû yu nyì lo sháng gàq. 17Haú buìnyì pé má, zogûng dùt é myiwe wuì eq naú huq ashî nghut é înu wuì gi, hkâ-í yhang wuîhke bekô nghut ri myhî-nhung. 18Haú hkyô gi, gyòqmyò má a dùt sháng gàq, kyûdûng nyì keq. 19Hkâsu mù gâ le, Garai Gasang, mingkan lé hpan tô é hkûn mai ahkuî jé shoq, hkâ-nhám le a dùt wú shî é wuîhke jamjau mó gi, haú buìnyì pé má dùt lò râ nghut lhê; haû sû é hkyô gi, htângnùng má hkâ-nhám le dum dùt lo râ a nghut. 20Buìnyì haú pé lé, haû Yhûmsîng Garai mai a lhoqshaû é nghut le gi, ó yùq le chyungxe wó lùt râ a nghut. Nghut kôlhang, Yhang hkyin yù bê nghut é, hkyin yù hui bâng é matú gi, buìnyì haú pé lé, Yhang lhoqshaû pyám byi bê nghut ri. 21Haú ahkyíng má, byù rayùq yùq mai, núngmòq lé, ‘Wú keq, shí má Hkrisidùq nyi ri.’ ga le, ‘Wú keq, Yhang hê má nyi ri.’ ga le, taí jáng, núngmòq hkâjíng kó. 22Hkâsu mù gâ le, Hkrisidùq a-pyoq pé eq myìqhtoi pyoq pé nyi htoq lô mù, wó dùt é nghut jáng, hkyin yù hui bang lé lháng, wó lhoqnghoq shoq ga, alhô agàn pé eq làklaí alhô agàn mó pé lé kut shit kôrâ nghut lhê. 23Haû mù, núngmòq sidìq nyì keq; ahkyíng a jé shi mai, ngò, núngmòq lé, jung hkangmó taî kyô nyì gù nghut lhê.

24Buìnyì haú pé má, wuîhke jamjau haú pé laî é htâng,

‘Buì gi, nòq byùq mù, lha-mó gi, a tsô dùt byùq râ nghut lhê;

25kyî pé gi, mauhkûng mai byìt gyó lo bùm mù, mauhkûng mâ é wum-o a-tsam pé gi, lhoqnhûn é huî bùm kôrâ nghut lhê.’#Esai 13:10, 34:4

26Haú hkûn, haû Byu Yhangzo gi, mhut ji mù, hpungwup a-tsam mó eq le, hpungwup shingkang eq le, gyó lé lo é lé, byu pé byu-myàng kôrâ nghut lhê. 27Hau htâng má, Yhang gi, Yhâng é maumang lagyô pé lé nhang kat mù, maumyî chyûn hkangmó eq myigùng htum shoq, mauhkûng htáng shoq mai, Yhang hkyin yu tô é bang lé shuî tsîng yù nhâng râ nghut lhê.

28Hkohúm gâm lé wú mù, mhoq yû keq; agàm mai a‑nyùq nyún lô mù, ahaq htut lô jáng, buì nyé nám chyâng lò bê lé, núngmòq sê lhê. 29Haû eq rajung za, shí hkyô pé dùt nyi é lé, núngmòq myàng kôjáng, Yhang gi, chyáng bê nghut mù, hkúmdong má lháng nghut nyî bê hkyô lé, núngmòq sé lo keq. 30Ngò, núngmòq lé teng za taí kôlé, shí pyàt mâ é byu pé a ban shi byùq shi-má, haú hkyô pé bànshoq dùt byùq râ nghut lhê. 31Mauhkûng eq myigùng gi, a jòq lo dùt byùq râ nghut lhê; nghut kôlhang, Ngá é dang gi, ru joq nyî râ nghut lhê.

Haû Buìnyì Eq Ahkyíng Lé, Ó Le A Sé

Mht 24:36-44

32Buìnyì eq ahkyíng haú lé gi, ó yùq le a sé; mauhkûng htoq mâ é maumang lagyô pé lháng a sé; haû Zo le a sé; haû Îwa za ru sê lhê. 33Haû mù, núngmòq gi, ahkyíng haû hkâ-nhám jé râ lé, a sé kô é yánmai, sidìq nyì keq! Machyâ nyì keq! 34Haû gi, byù rayùq, yhâng é duìnhâng zoshâng wuì lé, ó le ó eq sêng é mû lé gàm byî to mù, hkum zúng sû lé le, machyâ nyì râ matú pying to luî, yhâng yhûm lé, haû duìnhâng zoshâng wui chyáng àp pyâm to mù, byìn we shut htoq ló byùq é sû eq pung ri.

35Haû mù, haû Yhûmsîng hpó gi, myínhtâng làq, myín gùnggàm làq, wòqtûn hkun làq, maubó zó làq, hkâ-nhám jé lô râ lé núngmòq a sé kô é yánmai, sidìq machyâ nyì keq. 36Haû a nghut jáng, Yhang, dàn lòq tung taû jé lo é hkûn, núngmòq yhup myhî tô é lé, lo myang pyám râ nghut lhê. 37Ngò, núngmòq lé, ‘Sidìq machyâ nyì keq.’ nghû taî é eq rajung za, yùq hkangmó lé le, taî é nghut lhê.” ga taî ri.

Currently Selected:

Marikuq 13: znot

Highlight

Copy