Mahte 24

Ló Htâng Buìnyì Pé Má Dùt Lò Râ Hkyô

Mrk 13:1-31; Luk 21:5-33

1Yesuq gi, noqkuq yhûm mai htoq e ló é u lé, Yhâng é chángzô pé gi, Yhâng é nàm má huî lé lô kômù, haû noqkuq yhum é lòqmú pé lé tûn shit akô. 2Haú hkûn, Yesuq gi, yhángmòq lé, “Haú pé bànshoq lé, núngmòq myang lhê a nghut kó lhú? Ngò, núngmòq lé teng za taí kôlé, lùqgòk haú pé gi, rachâm htoq racham lháng a kê lhum loshoq, hpyoq hpyi pyâm é hui râ nghut lhê.” ga taî ri.

3Yesuq gi, Tsanlun bùm má zung tô é hkûn, haû chángzô pé gi, yhángmòq baú Yhâng chyáng lé jé kômù, “Haú hkyô pé gi, hkâ-nhám dùt lò râ lhú? Nàng gyó lé râ hkûn eq ló htâng buìnyì má, hkâsû é alhô agàn htoq lô râ nghut lhê lhú? Ngá-mòq lé taî kyô wú laq.” ga, Yhang lé myî akô.

4Haú hkûn, Yesuq, yhángmòq lé tû taî é gi, “Núngmòq lé, ó yùq èq le a wó shuî nghoq sháng gàq, sidìq nyì keq. 5Hkâsu mù gâ le, ‘Ngò gi, haû Hkrisidùq nghut lhê.’ ga, Ngá myîng lé lâng é byù myo myo nyi htoq lô mù, byù myo myo lé hkyô shuî nghoq kôrâ nghut lhê. 6Núngmòq gi, majan dùt nyi é hkyô eq majan eq sêng é danglám pé lé, wó gyo kôrâ nghut lhê; nghut kôlhang, hkâgyùq dàn kó. Haú hkyô pé gi, dùt lò râ za nghut lhê; nghut kôlhang, ló htâng é buìnyì gi, a nghut shi. 7Byù ra-myû eq ra-myû, mîngdán ralhum eq ralhum majan zân lhûm lò kôrâ nghut lhê. Jowò myo myo má, mùtmó gyó é pé eq layàng nún é pé dùt lò râ nghut lhê. 8Haú pé gi, wuîhke jamjau hkyo é a-pûn awang za ru nghut ashî.#Esai 19:2

9Haú hkûn, núngmòq gi, zing-rî é eq sat pyâm é hui zo râ matú, àp pyâm é hui kôrâ nghut lhê. Byù myû lhúnglhâng bang gi, Ngá é yánmai, núngmòq lé a nguì kut kôrâ nghut lhê. 10Haú u lé, byù myo myo gi, lùmjíng myìt lé tô pyám kômù, rayùq eq rayùq a ngui lhum dùt é htoq agó, rayùq eq rayùq àp pyâm lhum kôrâ nghut lhê. 11Hau htoq agó, myìqhtoi pyoq pé myo myo nyi htoq lô kômù, byù myo myo lé hkyô shuî nghoq kôrâ nghut lhê. 12Agè ashop é hkyô myô jàt lo é yánmai, byù myo myô é chyitdàp myìt gi, kân ló byùq râ nghut lhê; 13nghut kôlhang, jihtûm jé shoq wó hkam jân nyi é sû gi, hkyi yu é hui râ nghut lhê. 14Byù myû bànshoq má sàksé dùt râ matú, haû mîngdán eq sêng é gabú danglù lé, mingkan gón má hko kyo râ nghut lhê. Hau htâng má shèq, ló htûm buìnyì jé râ nghut lhê.

15Haû mù luî, myìqhtoi Dani-elaq dông mai taî tô é eq rajung za, ‘haû lhoqhten lhoqhpyoq é achaq achyut hkyô’#Dan 9:27, 11:31, 12:11 gi, chyoiyúng jowò má shap tô é lé, núngmòq myàng kôrâ nghut lhê. (Chyúmlaiká nghap sû gi, sê gyo sháng gàq.) 16Haú hkûn, Yuda mau má nyi é bang gi, bùm pé shut hpang dòq ló kó sháng gàq. 17Yhûmhkûng htoq má nyi tô é sû gi, yhúmhkaû mâ é zè haî lé le, a ló gyó wang yù lo sháng gàq. 18Yò má nyi tô é sû gi, yhâng é buhîng lé a ló taû yu nyì lo sháng gàq. 19Haú buìnyì pé má, zogûng dùt é myiwe eq naú huq ashî nghut é înu wuì gi, gyai yhang wuîhke jamjau kôrâ nghut lhê. 20Haû núngmòq hpâng râ buìnyì gi, gyòqmyò,#24:20 Isira-elaq mau má gi, gyòqmyò lé hkyô htoq le gyai wuîhkê é ahkyíng nghut lhê. a nghut jáng, Bánno Buìnyì má a ang râ matú, kyûdûng nyì keq. 21Hkâsu mù gâ le, mingkan lé jòq é hkûn mai ahkuî jé shoq, hkâ-nhám le a dùt wú shî é wuîhke jamjau mó gi, haú buìnyì pé má dùt lò râ nghut lhê; haû sû é hkyô gi, htângnùng má hkâ-nhám le dum dùt lo râ a nghut. 22Buìnyì haú pé lé lhoqshaû pyâm é za a nghut le gi, ó yùq le chyungxe wó lùt râ a nghut; nghut kôlhang, Garai Gasâng èq hkyin yù hui bâng é matú gi, buìnyì haú pé lé, lhoqshaû pyám byi râ nghut lhê. 23Haú ahkyíng má, byù rayùq yùq mai, núngmòq lé, ‘Wú keq, shí má Hkrisidùq nyi ri.’ ga, haû a nghut jáng, ‘Wú keq, Yhang hê má nyi ri.’ ga taí jáng, núngmòq hkâjíng kó. 24Hkâsu mù gâ le, Hkrisidùq pyoq pé eq myìqhtoi a-pyoq pé nyi htoq lô mù, wó dùt é nghut jáng, hkyin yù hui bang lé lháng, wó lhoqnghoq shoq ga, alhô agàn mó pé eq làklaí alhô agàn pé lé kut shit kôrâ nghut lhê. 25Gyo keq, shí hkyô a dùt shi-má, Ngò, núngmòq lé taî kyô nyì gù nghut lhê.

26Haû mù, rayùq yùq èq, núngmòq lé, ‘Yhang gi, yòso má nyi ri.’ ga jáng le, hkâ-ê kó. ‘Yhang gi, shî wàp hkaû má lúng tô ri.’ ga jáng le, hkâjíng kó. 27Hkâsu mù gâ le, buì htoq hkyam má lhap hpyat é gi, buì wàng hkyam má lháng jé shoq dùq bó é su, haû Byu Yhangzo jé lé é hkûn le, dùt râ nghut lhê. 28Màng lèq é jang má, zùn bup pé, lé zîng bùm râ nghut lhê.

29Buìnyì haú pé mâ é wuîhke jamjau lai eq yhang,

‘Buì gi, nòq byùq mù, lha-mó gi, a tsô dùt byùq râ nghut lhê;

kyî pé gi, mauhkûng mai byìt gyó lo bùm mù, mauhkûng mâ é wum-o a-tsam pé gi, lhoqnhûn é huî bùm kôrâ nghut lhê.’#Esai 13:10, 34:4

30Haú hkûn, haû Byu Yhangzô é alhô agàn gi, mauhkûng má htoq shit lò râ nghut mù, myìdàm htoq mâ é byù myû lhúnglháng gi, yón ngau bùm kôrâ nghut lhê. Haû Byu Yhangzo gi, mauhkûng mai, mhut ji mù, hpungwup a-tsam mó eq le, hpungwup shingkang eq le, gyó lé lo é lé, yhángmòq byu-myàng kôrâ nghut lhê. 31Hau htâng má, Yhang gi, Yhâng é maumang lagyô pé lé, tut htê mó èq nhang kat luî, yhángmòq gi, maumyî chyûn myi chyûn eq mauhkûng rahkyam mai, góhkyam htum shoq mâ é, Yhang hkyin yu tô é bang lé shuî tsîng yù kôrâ nghut lhê.

32Hkohúm gâm lé wú mù, mhoq yû keq; agàm mai a‑nyùq nyún lô mù, ahaq htut lô jáng, buì nyé nám chyâng lò bê lé, núngmòq sê lhê. 33Haû eq rajung za, shí hkyô bànshoq#24:33 Shí hkyô bànshoq gâ é gi, Yesuq jé lé râ hí má dùt râ hkyô pé lé taî é nghut lhê. lé, núngmòq myàng kôjáng, Yhang gi, chyáng bê nghut mù, hkúmdong má lháng nghut nyî bê hkyô lé, núngmòq sé lo keq. 34Ngò, núngmòq lé teng za taí kôlé, shí pyàt mâ é byu pé a ban shi byùq shi-má, haú hkyô pé#24:34 Haû hkyô pé gâ é gi, Yerusalem noqkuq yhûm htên byòq râ lé taî é nghut lhê. bànshoq dùt byùq râ nghut lhê. 35Mauhkûng eq myigùng gi, a jòq lo dùt byùq râ nghut lhê; nghut kôlhang, Ngá é dang gi, ru joq nyî râ nghut lhê.

Haú Buìnyì Eq Ahkyíng Lé, Ó Le A Sé

Mrk 13:32-37; Luk 17:26-30, 34-36

36Buìnyì eq ahkyíng haú lé gi, ó yùq le a sé; mauhkûng htoq mâ é maumang lagyô pé lháng a sé; haû Zo le a sé; haû Îwa za ru sê lhê. 37No-aq é tsîn pyàt má dùt é su, haû Byu Yhangzo lé lo é hkûn le, dùt râ nghut lhê. 38Hkâsu mù gâ le, dowuî a díng shî é buìnyì pé má, byu pé gi, No-aq, wuìsanghpo mó hkaû má wang é hkûn jé shoq, zo zo shuq shuq, myi byi myi yû, kut nyi bum akô nghut ri; 39yhángmòq gi, dowuî díng lô mù, yhángmòq bànshoq lé ûm sat pyâm é hkûn jé shoq, haî dùt lò râ lé, a sé kó dùt bùm é su, haû Byu Yhangzo lé lo é hkûn le, dùt râ nghut lhê. 40Haú hkûn, yò má rahá nyi tô é byù í yùq mâ é rayùq gi, shuî yu é hui mù, rayùq gi, myìt gyó to râ nghut lhê. 41Lùqluí chôm lâng nyi é myiwe í yùq mâ é rayùq gi, shuî yu é hui mù, rayùq gi, myìt gyó pyâm to râ nghut lhê.

42Haû su mù, haû núngmòq é Yhûmsîng gi, hká nyí jé lé lô râ lé, núngmòq a sé kô é yánmai, sidìq machyâ nyì keq. 43Myín hká u má hkau sû jé lé lò râ lé, yhûmsîng sê é ru nghut le gi, yhâng é yhûm má a wó hput wâng nhâng loshoq, yhang machyâ nyì râ nghut é lé, núngmòq sê gyô nyì keq. 44Haû mù, núngmòq le rì rì nghut nyî keq; hkâsu mù gâ le, haû Byu Yhangzo gi, a bûn nùng má jé lé lô râ nghut lhê.

45Yhûmsîng hpô é duìnhâng zoshâng wuì lé, ùphkâng râ eq ahkyíng jé jáng zoshuq gàm byi râ matú, yhûmsîng hpô èq mû nhang tô é, lhumzui luî, hpàqchyî bo é duìnhâng zoshâng gi, ó yùq nghut râ lhú? 46Yhûmsîng hpó dum taû lo é hkûn, haû su kut nyî láng é duìnhâng zoshâng gi, hkungsô wó nyi ri. 47Ngò, núngmòq lé teng za taí kôlé, yhûmsîng hpó haû gi, yhâng é sùtzè bànshoq, duìnhâng zoshâng haú yùq lé àp to râ nghut lhê. 48Nghut kôlhang, hkâsu hkâwo mù, duìnhâng zoshâng haú yùq gi, agè ashop sû nghut luî, ‘Ngá é yhûmsîng hpó jé lô râ gyai myáng ashî.’ ga, yhâng é i‑myìt ûnghkaû má myìt yù mù, 49gótû duìnhâng zoshâng luzúm wuî lé nhuq bàt é htoq agó, î shuq wùt bang eq rahá zo zo shuq shuq kut nyi é nghut le gi, 50duìnhâng zoshâng hau é yhûmsîng hpó gi, yhang a myìt ngam tô é buìnyì eq yhang a sê tô é ahkyíng má jé lô mù, 51yhang lé jàp pyám luî, gègùn labyoq kut bang hkâm zô é, ngaùbyi ngaùnhap eq zuì kyik kyik shoq hpuzô nyì râ jowò má hkyô pyám râ nghut lhê.

Currently Selected:

Mahte 24: znot

Highlight

Copy