Malahkiq 2

Hkyangjông Pé Lé Sidìq Xoq Byî É Hkyô

1“Ahkuî, hkyangjông pé ê, sidìq byî é hkyô shî gi, núngmòq é matú nghut lhê. 2Núngmòq a gyo mù, Ngá é myìng lé hkúngga râ hkyô myìt má a kat to kô é nghut jáng, Ngò gi, núngmòq chyáng nhinghkun jé nhâng râ nghut mù, núngmòq é shimân jeju pé lé nhîng pyám râ nghut lhê. Gè gè yhang, núngmòq gi, Ngo lé hkúngga râ matú myìt má a kat to kut bekô nghut é yánmai, Ngò gi, haú pé lé nhîng pyám gû nghut bê.” ga, haû Wum-o a-tsam dìk shoq bò Sû Yhûmsîng Garai taî ri.

3“Núngmòq é yánmai, Ngò gi, núngmòq é awùt ashîn pé lé tân mhoq râ nghut lhê; Ngò gi, núngmòq é hkungga nhông poî mâ é hkyi lé, núngmòq é myòqdong má hpyûn gyun râ nghut mù, núngmòq gi, haû eq rahá lhoqhtoq pyâm é hui kôrâ nghut lhê. 4Haú hkûn, Ngá é dangshikaq gi, Lewiq a-myû up eq wó xoq nyî râ matú, sidìq byî é dang shî lé, núngmòq chyáng Ngò nhang kat é nghut é hkyô lé, núngmòq sé kôrâ nghut lhê.” ga, haû Wum-o a-tsam dìk shoq bò Sû Yhûmsîng Garai taî ri. 5“Ngò, yhángmòq eq tô tô é dangshikaq gi, chyungxe eq nguì ngón hkyô nghut lhê; Ngo lé gyùq hkúngga râ matú, Ngò, yhángmòq lé haû í hkat byî to bê nghut lhê. Yhángmòq gi, Ngo lé gyùq hkúngga mù, Ngá é myìng lé gyùq kyûm bekô nghut ri. 6Yhángmòq é nhut mai tengmán é târâ hkyô taí mù, yhángmòq é nhutwuî mai mhaú lô lhik lô hkyô a htoq é nghut lhê. Yhángmòq gi, nguì ngón é eq i-myìt díng é hkyô má cháng mù, Ngò eq rahá sô nyì luî, byù myo myo lé, yubàk mara kut shut nyi é mai lhing tau nhâng bê nghut ri.

7Hkâsu mù gâ le, hkyangjong gi, haû Wum-o a-tsam dìk shoq bò Sû Yhûmsîng Garaî é lagyo nghut mù, byu pé gi, yhâng é nhut mai taî é tengmán târâ hkyô lé myang ho lhê nghut é yánmai, yhâng é nhutwuî má hpàqchyî lé tap to ra râ nghut lhê. 8Nghut kôlhang, núngmòq gi, hkyô nghoq byùq kômù, núngmòq mhoqshit é hkyô mai byù myo myo lé htûng lèqbàt nhâng bekô nghut ri; núngmòq gi, Lewiq a-myû up eq tô tô é dangshikaq lé lhoqhpyoq pyám bekô nghut ri.” ga, haû Wum-o a-tsam dìk shoq bò Sû Yhûmsîng Garai taî ri. 9Hau htoq agó, “Haû mù, núngmòq gi, Ngá é hkyô pé lé a cháng kut kômù, târâ hpyit é hkûn myòqdong hkyin é hkyô tûn shit akô nghut é yánmai, Ngò gi, núngmòq lé a-myû zo wuî bànshoq bâng é hí má wú tiq pyâm é hui nhâng mù, gùng-yui é hui nhâng bê nghut lhê.” ga le taî ri.

A Jujúm É Yudaq A-myû Up

10Ngá-nhúng bànshoq bang gi, îwa rayùq za wó lhê, a nghut kó lhí? Ngá-nhúng lé hpan é Garai Gasang gi, rayùq za nghut lhê, a nghut kó lhí? Haû sû é wá, ngá-nhúng gi, rayùq eq rayùq a jujúm lhum kut é dông, ngá-nhûng é îchyí îwâ pê é dangshikaq lé, haî mù lhoqhpyoq pyâm lhê lhú?

11Yudaq a-myû up gi, a jujúm kut kômù, Isira-elaq mau eq Yerusalem wà mó má achaq achyut hkyô kut shut bekô nghut ri; hkâsu mù gâ le, Yudaq a-myû up gi, haû Yhûmsîng Garai chyitdàp é chyoiyúng jowò lé agòt a-û kut pyám mù, maigan hparà lé noq é myiwe zo lé hâng yu akô nghut ri. 12Haû su kut é sû ó yùq nghut kôle, haû Wum-o a-tsam dìk shoq bò Sû Yhûmsîng Garaî chyáng hkungga yu lé byi kôlhang, haû Yhûmsîng Garai gi, yhang lé, Yakup é yhûmbyù wuì mai lhoqhtûm pyám sháng gàq.

13Núngmòq kut é hkyô gótû rahkat jòq ashî; núngmòq gi, haû Yhûmsîng Garaî é hkungga gyàp lé ngaubyî èq ûm nghop pyâm akô. Yhang gi, núngmòq é hkungga pé lé ô nau é myìt mai a wú lô é htoq agó, haú pé lé núngmòq é lòq mai gabú tung a lhom yù byi lo nghut é yánmai, núngmòq gi, ngaùbyi ngaùnhap eq ngaùhkyûng ngaùyang kut akô nghut ri. 14Núngmòq gi, “Haî mù lhú?” ga myî akô. Haû Yhûmsîng Garai gi, nàng eq náng é chyungxe zànwut rám pyàt lhê é náng yhûmsîng myhî é gyoro má sàksé nghut é yánmai, haú su dùt é nghut lhê. Yhang gi, nàng eq byìnzùm sû eq nàng dangshikaq tô tô é náng yhûmsîng myhí nghut kôlhang, nàng gi, yhang lé a jujúm nghut ri.

15Garai Gasang gi, rayùq lé za hpan tô é, a nghut lhí? Nàng gi, gùngdu le, sô le, Yhang eq sêng é nghut ri. Garai Gasang gi, haî lé ho ri lhú? Garai bo é hkyô kut é zodù wuì lé ho é nghut ri. Haû mù, sidìq nyì àq; náng é zorâm pyàt lhê é náng é yhûmsîng myhí lé a jujúm hkâkut.

16“Haû yhûmsîng myhí lé kâng pyâm é hkyô lé, Ngò a nguì.” ga, haû Isira-elaq é Garai Gasang nghut é, Yhûmsîng Garai taî ri; “Yhâng é yhûmsîng myhí lé wú magûm râ malaî, ashop é dông kut é hkyô lé, Ngò a nguì.” ga, haû Wum-o a-tsam dìk shoq bò Sû Yhûmsîng Garai taî ri.

Haû mù, sidìq nyì keq; a jujúm hkâkut kó.

Târâ A Ràp-rá É Hkyô

17Núngmòq gi, yhûmsing é dang pê èq haû Yhûmsîng Garai lé gyô ngíng nhâng bekô nghut ri.

Nghut kôle, núngmòq gi, “Yhang lé ngá-mòq hkâsu kut gyô ngíng nhang é lhú?” ga myî akô.

Haû gi, “Agè ashop hkyô kut é bànshoq bang gi, haû Yhûmsîng Garaî é myòq hí má ge bum akô nghut mù, Yhang gi, yhángmòq lé gabú ri. Haû târâ ràp-rá hkyô kut é Garai Gasang gi, hká má lhú?” gâ é dông gyô ngíng nhang akô nghut ri.

Currently Selected:

Malahkiq 2: znot

Highlight

Copy