Lukaq 3

Wuìmyhup Sará Yohan Mhoqshit É Hkyô

Mht 3:1-12; Mrk 1:1-8; Yhn 1:19-28

1Romaq hkóséng Kehtaq Tiberi gi, hkó zung é raxe ngo zân nghut é hkûn, Yuda mau má Pontu Pilat gi, mau zau ayá má; Galile mau má, Herot gi, mau zau ayá má; Ituri eq Tirakuni mau má, Herot yhang gu Hpilip gi, mau zau ayá má; Abilene mau má, Lusanu gi, mau zau ayá má; 2Anna eq Kayahpaq gi, hkyangjong mó mû má, kut nyi akô. Haú hkûn, Garai Gasâng é mungdang gi, yòso má nyi tô é, Zehkariq é yhang zo Yohan chyáng jé lé ri. 3Haû mù, yhang gi, Yodan làng yàm jowò hkangmó má, sô jón wún luî, yubàk mara hkyut pyám byî é hui râ matú myìt lhîng mù, wuìmyhup hkâm#3:3 Wuìmyhup hkâm gâ é gi, baptisima lé gâ é nghut lhê. yù râ hkyô lé, hko kyô nyi ri. 4Haû gi, myìqhtoi Esai-a laiká má,

“Haû yòso má, byù rayùq garû taî é htê gi,

‘Haû Yhûmsing é matú, hkyô hen to keq, Yhâng é matú hkyô lhoqnyhang to keq;

5wuìhkung langhkop hkangmó lé lhoqpyíng ra râ nghut lhê;

bùm eq wingkáng hkangmó lé hpyit pyám ra râ nghut lhê;

agoí agùq é hkyô hkat hkangmó lé lhoqnyhâng ra râ nghut lhê;

ahkung ahkop dùt é hkyô hkat hkangmó lé lhoqrhá ra râ nghut lhê.

6Haú hkûn, byù bànshoq gi, Garai Gasâng é hkyi yù hkyô lé myàng râ nghut lhê.’ gâ ri.”#Esai 40:3-5

ga luî, kâ tô é eq rajung za nghut ri.

7Shiwa byù rajùm rayò gi, Yohan é lòq má wuìmyhup hkâm yù râ ga luî htoq lé lô kôjáng, Yohan taî é gi, “Dùq htân lhângmuì a-myû pé#3:7 Lhângmuì a-myû pé gâ é gi, Lukaq 3:7-10 má bo é Hparishe eq Saduke pé lé taî é nghut ri. ê, jé lô râ yubàk dam mai wó hpang lùt kó sháng gàq ga, núngmòq lé ó yùq taî pûn é lhú? 8Myìt lhîng hkyô eq gíngdán é ashi zui keq. ‘Ngá-mòq gi, Abraham é yhang zo yhang shû pé nghut lhê.’#3:8 Ngá-nhúng gi, Abraham é yhang zo yhang shû pé nghut lhê gâ é gi, Abraham é yhang zo yhang shu nghut é yánmai, Garai Gasang jéyáng é lé a hui râ ga, myìt yu é hkyô nghut ri. nghû luî, yhûmsing é i‑myìt ûnghkaû má hkâtaí kó. Hkâsu mù gâ le, ngò, núngmòq lé taî kyo kôlé, Garai Gasang gi, lùqgòk shí pé mai, Abraham é matú yhang zô pé wó hpan htoq kat lhê. 9Ahkuî lháng, Garai Gasang gi, Yhâng é wazung lé haû sikgâm wang pé má tô to bê nghut ri; haû mù, ge é ashi a zuî é agàm hkangmó lé gi, htuq lhêng pyám mù, myi má dú kat pyám râ nghut lhê.” gâ ri.#3:9 Bun zo shi lhûm é lichyúm gi, myìt a lhîng bang lé, Garai Gasang jéyáng é buìnyì jé râ nghut lhê gá nau é nghut ri.

10Haú hkûn, shiwa byu pé gi, “Haû nghut le gi, ngá-mòq hkâsu kut le gè râ lhú?” ga luî, yhang lé myî akô.

11Yhang gi, “Bu í dung wó sû gi, bu a wó sû lé, gàm byi sháng gàq; zo shuq wó sû le, a wó sû lé, gàm byi sháng gàq.” ga luî, yhángmòq lé tû taî kat ri.

12Hkán hkyuî bang le, wuìmyhup hkâm yù râ ga lé lô mù, “Sará ê, ngá-mòq gi, hkâsu kut le ge râ lhú?” ga luî, yhang lé myî akô.

13Yhang gi, “Núngmòq hkyui yù râ masàt tô é htoq lai shoq hkâyû kó.” ga luî, yhángmòq lé taî ri.

14Gyèzô pé ra-am le, “Ngá-mòq gi, hkâsu kut le gè râ lhú?” ga luî, yhang lé lé myî akô.

Yohan gi, “Ó lé le hkâ-kyuq zo kó; a târa é dông mara le hkâhûn kó; núngmòq wó é ahpaû èq gé bûn nyì keq.” ga luî, yhángmòq lé taî ri.

15Shiwa byu pé kúm gi, Hkrisidùq lé myìt láng nyi tô é bang nghut é yánmai, Yohan lé haú yùq nghut lhê làq ga yhûmsing é i‑myìt ûnghkaû má myìt wú nyi bum akô. 16Haú hkûn, bànshoq bang lé Yohan taî é gi, “Ngò gi, núngmòq lé, wui èq za wuìmyhup hkám byî lhê; nghut kôlhang, ngá htoq má wum-o a-tsam je bo é sû rayùq jé lé lô râ nghut lhê. Ngò gi, yhâng é hkyî-tsung tui lé hpyî râ lháng a gíngdán; Yhang gi, Chyoiyúng Sô má le, myi má le, núngmòq lé wuìmyhup hkám byi râ nghut lhê. 17Yhang gi, lòq má byò chung to mù, gùq chyârâng mâ é gùq bùm lé hik sân pyám luî, já é gùqcham lé gi, gùqchyî má tsîng kat to mù, gùqsôm lé kúm gi, hkâ-nhám le shi byùq a sê é myî èq nyhê hkyô pyám râ nghut lhê.” gâ ri.#3:17 Haû eq rajung za, Hkrisidùq gi, a ge é byu pé eq ge é byu pé lé gam hkoq pyám râ nghut lhê. 18Haû mù, Yohan gi, byù haú bang lé gótû dang myo myo èq lhoqpun lhoqkying mù, gabú danglù lé hko kyô nyi ri.

19Nghut kôlhang, hkâ-myháng a myáng má mau zau Herot gi, yhang gû é yhang myi Herodi‑aq lé lú yu é hkyô eq, yhang kut shut é gótû a ge é mû bànshoq é yánmai, Yohan gi, yhang lé tân mhoqshit bê nghut ri. 20Mara haú pê htoq agó, Herot dum kut jàt yu é mara gi, Yohan lé htóng má lhûng kat é nghut ri.

Yesuq, Wuìmyhup Hkâm Yu É Hkyô

Mht 3:13-17; Mrk 1:9-11

21Yohan lé htóng má a lhûng kat shi-má, byù myo myo gi, wuìmyhup hkâm yu nyì kô é hkûn, Yesuq le Yohan chyáng wuìmyhup hkâm yù mù, kyûdûng nyi le, mauhkûng bóng lô mù, 22haû Chyoiyúng Sô gi, hpûngkyui gùnghkyâng sû é dông mai Yhâng ahtoq má lé gyó nô ri. Haú hkûn, “Nàng gi, Ngò chyitdàp é Ngá zo nghut lhê; Náng é ahtoq má Ngò gabú myìt ngón nyi lhê.” ga mauhkûng mai danghtê htoq lo ri.

Yesuq É Byùxik Shap Kyô É Hkyô

Mht 1:1-17

23Yesuq gi, Yhang mû zuî hi é hkûn, chyungxe zànwut sum xê zàn kô nghut bê; Yhang lé byù hkyam dông gôn wú jáng, Yhang gi, Yosep é yhang zo nghut ri; Yosep gi, Heli é yhang zo, Heli gi, Mahtat é yhang zo, 24Mahtat gi, Lewiq é yhang zo, Lewiq gi, Melahki é yhang zo, Melahki gi, Yannai é yhang zo, Yannai gi, Yosep é yhang zo, 25Yosep gi, Matahti‑aq é yhang zo, Matahti‑aq gi, Amo é yhang zo, Amo gi, Nahum é yhang zo, Nahum gi, Esali é yhang zo, Esali gi, Nagai é yhang zo, 26Nagai gi, Ma‑at é yhang zo, Ma‑at gi, Matahti‑aq é yhang zo, Matahti‑aq gi, Semai é yhang zo, Semai gi, Yosek é yhang zo, Yosek gi, Yodaq é yhang zo, 27Yodaq gi, Yohan é yhang zo, Yo‑anan gi, Resa é yhang zo, Resa gi, Zerubabela é yhang zo, Zerubabela gi, Shalatila é yhang zo, Shalatila gi, Neri é yhang zo, 28Neri gi, Melahki é yhang zo, Melahki gi, Adi é yhang zo, Adi gi, Kusam é yhang zo, Kusam gi, Elamadam é yhang zo, Elamadam gi, Era é yhang zo, 29Era gi, Yoshuq é yhang zo, Yoshuq gi, Eli-ezera é yhang zo, Eli-ezera gi, Yorim é yhang zo, Yorim gi, Mahtat é yhang zo, Mahtat gi, Lewiq é yhang zo, 30Lewiq gi, Sime-on é yhang zo, Sime-on gi, Yudaq é yhang zo, Yudaq gi, Yosep é yhang zo, Yosep gi, Yonam é yhang zo, Yonam gi, Eli-akim é yhang zo, 31Eli-akim gi, Mele-a é yhang zo, Mele-a gi, Menaq é yhang zo, Menaq gi, Matahta é yhang zo, Matahta gi, Nahtan é yhang zo, Nahtan gi, Dawiq é yhang zo, 32Dawiq gi, Yese é yhang zo, Yese gi, Obet é yhang zo, Obet gi, Bu-aq é yhang zo, Bu-aq gi, Salamun é yhang zo, Salamun gi, Nashon é yhang zo, 33Nashon gi, Aminadap é yhang zo, Aminadap gi, Arini é yhang zo, Arini gi, Heziron é yhang zo, Heziron gi, Perezi é yhang zo, Perezi gi, Yudaq é yhang zo, 34Yudaq gi, Yakup é yhang zo, Yakup gi, Isak é yhang zo, Isak gi, Abraham é yhang zo, Abraham gi, Htara é yhang zo, Htara gi, Nahura é yhang zo, 35Nahura gi, Seruk é yhang zo, Seruk gi, Re-u é yhang zo, Re-u gi, Hpelek é yhang zo, Hpelek gi, Ebera é yhang zo, Ebera gi, Shela é yhang zo, 36Shela gi, Kainan é yhang zo, Kainan gi, Arihpaza é yhang zo, Arihpaza gi, Shem é yhang zo, Shem gi, No-aq é yhang zo, No-aq gi, Lamek é yhang zo, 37Lamek gi, Mehtusela é yhang zo, Mehtusela gi, Enuk é yhang zo, Enuk gi, Yaret é yhang zo, Yaret gi, Mahalalela é yhang zo, Mahalalela gi, Kenan é yhang zo, 38Kenan gi, Enusha é yhang zo, Enusha gi, Shet é yhang zo, Shet gi, Adam é yhang zo, Adam gi, Garai Gasâng é yhang zo nghut ri.

Currently Selected:

Lukaq 3: znot

Highlight

Copy