Lukaq 2

Betlehem Wà Mó Má Yesuq Hku Lo É Hkyô

Mht 1:18-25

1Buìnyì haú pé má, Romaq hkóséng ming bànshoq mâ é byù lhúnglhâng bang gi, myìng jihpán kat râ matú, hkóséng Kehtaq Augustuq chyáng mai mungdang htoq ri. 2Jihpán haû lé sânghi dàm gùq hi é gi, Kuireni ga sû Suriq mau má mau zau kut nyi é hkûn nghut ri. 3Haú hkûn, byù du jùp gi, myìng jihpán kat râ matú, ó le ô é wà shut ló bum akô.

4Haû mù, Yosep le Dawiq é awùt ashín nghut é yánmai, Galile mau Nazaret wà mai, Yuda mau mâ é Betlehem gâ é Dawiq é wà shut, 5yhang dûng tô é myiwe Mariq eq rahá myìng kat lhóm râ matú jé dòq ló akô; Mariq kúm gi, gùnglòq laî to bê nghut ri. 6Haû Betlehem má nyi tô ashî le, Mariq gi, zo hkû râ buìnyì jé mù, zo-mún yùqzo lé bau bê. 7Yhang gi, zoshâng haû lé pánchoq èq htup mù no tso lànghkang má lheq tô ri; haî mù gâ le, bíng yhûm má yhángmòq nyì râ jowò a jòq lô é yánmai nghut ri.

Sau Zúng Bang Yesuq Chyáng Jé Lé É Hkyô

8Ahkuî, haú mau mâ é sau rém zo bang gi, sau zúng jang má yhángmòq é sau hpúng lé, myín lé zúng nyi akô. 9Haú hkûn, Yhûmsîng é maumang lagyo gi, yhángmòq é hí má lé htoq yàp shit to mù, Yhûmsing é hpungwup shingkang gi, awui ayàm má dùq bang lò luî, yhángmòq gyai gyùq bum akô. 10Maumang lagyo gi, “Hkâgyùq kó, byù lhúnglhâng bâng é matú, gyai yhang gabú é danglù, ngò núngmòq chyáng wun lé lo lhê. 11Hkû-nyí lhê buìnyì má, Hkrisidùq #2:11 Grik dông, Hkrisidùq gâ é gi, xû bùt hui Sû gâ é lichyúm nghut mù, Hebre dông, Mesai‑a gâ é eq rajung za nghut lhê. nghu é Yhûmsîng nghut é hkyi yù Sû gi, Dawiq é wà má núngmòq é matú hku to bê. 12Núngmòq é matú alhô agàn gi, zoshâng nyheqnú rayùq pánchoq èq htup mù, no tso lànghkang má lheq to láng râ nghut lhê.” ga luî, yhángmòq lé taî ri.

13Haú hkûn jáng yhang, mauhkûng bang rajùm rayò htoq lô mù, maumang lagyo haû eq rahá Garai Gasang lé hkya-ôn é dang gi,

14“Htoq tsáng myhâng má, Garai Gasang gi, hpungwup shingkang bo nyì sháng gàq ô!

Myigùng htoq má le, Yhang ô nau é byu pé má, nguì ngón é gi, hkâ-nhám le jòq nyì sháng gàq ô!”

gâ akô.

15Maumang lagyô pé, yhángmòq chyáng mai, mauhkûng shut dum ló byùq jáng, sau zúng bang gi, “Sà! Betlehem wà mó má jé shoq yhang, ngá-nhúng ê mù, ahkuî za Yhûmsîng ngá-nhúng lé lé shit kyô laî ló bê hkyô lé ê gôn wú sháng.” ga luî, rayùq eq rayùq taî lhûm akô.

16Hau htâng, yhángmòq gi, hân hân ê luî, Mariq eq Yosep lé le, no tso lànghkang má lheq tô é zoshâng nyheqnú lé le, ê myang akô. 17Zoshâng haû lé, yhángmòq myàng kôjáng, zoshâng haû eq séng luî yhángmòq lé, lé taî kyô é dang lé, taî pyô kat bekô. 18Wó gyô é bang bànshoq gi, haû sau zúng bang taî kyô é dang lé, maú byùq bum akô. 19Mariq kúm gi, dùt lo é hkyô pé eq wó gyô é dang bànshoq lé ûnghkaû má xûm yu to mù luî, nìk nìk myìt wú nyi ri. 20Sau zúng bang gi, yhángmòq lé maumang lagyo taî kyô kat é dang eq rajung za, wó gyô yù, wó myang yu é hkyô pé bànshoq é yánmai, Garai Gasang lé hkya-on kúngtôn uchyang dum taû ló bekô nghut ri.

Yesuq Lé, Noqkuq Yhûm Má Shuî E É Hkyô

21Zoshâng haû, shit nyí jé mù ahpyo-kuq hpyit byi râ buìnyì má, yhang ûnghkaû má a lúng shi mai maumang lagyo myhîng tô é myìng eq rajung za, yhang lé, “Yesuq” ga luî, myhíng byî akô.

22Mosheq é târâ eq rajung za, yhángmòq é lhoqsan lhoqsêng é buìnyì byíng jáng, Yhûmsing é târâ má, “Zo-mún yùqzo hkangmó gi, haû Yhûmsing é hí má chyoiyúng sû wó nghû râ matú, Yhûmsing chyáng ê àp byi râ lhê.”#Htoq Ló 13:2, 12 gâ é eq, 23“Hpûngkyui razúm, haû a nghut jáng, nghoqmyhû zo í du.”#Nhông 12:8 hkungga byi râ lhê ga kâ tô é eq rajung za, 24Mariq eq Yosep gi, zoshâng haû lé shui mù Yerusalem wà mó shut e akô.

25Haú hkûn, Sime-on gâ é mangzo rayùq, Yerusalem wà mó má nyi ri. Haú yùq gi, díngmán é eq târâ cháng sû nghut mù, Isira-elaq lé nhik lhoqtíng râ ahkyíng lé láng nyî sû nghut ri; haû Chyoiyúng Sô le, yhâng é ahtoq má nyi nyi ri. 26Yhang gi, haû Yhûmsîng Hkrisidùq lé a myang é za, shî râ a nghut, ga Chyoiyúng So èq tûn shit tô é hui sû nghut lhê. 27Yhang gi, Chyoiyúng So èq shui mù, noqkuq yhúmhkaû má ê jé nyi tô é hkûn lé, Mariq eq Yosep gi, zoshâng Yesuq lé htûng târâ eq rajung za kut byi râ matú, noqkuq yhúmhkaû má shuî wang ló kôjáng, 28Sime-on gi, zoshâng lé lòq èq lhom bún yû mù, Garai Gasang lé hkya-ôn é dang gi,

29“Yhûmsîng ê, nàng danghtum htûm tô é gi, dìk bê nghut ri; hkû-nyí náng é jùn ngò gi, nguì ngón é èq wó shi ló berâ nghut lhê.

30Haî mù gâ le, byù lhúnglhâng bâng é matú, nàng lajâng tô é hkyi yù hkyô lé, ngá myòq èq yhang wó myâng bê.

31Haû gi, byù myû chângjup wó myâng râ matú, nàng lajâng to byî é nghut mù,

32tûngbaù pé lé, tengmán hkyô má buì su dùq bó mù hpông shit râ matú le, náng é a-myû Isira-elaq é hpungwup shingkâng matú le nghut nyi ri.”

gâ ri.

33Yhâng nu eq yhâng wâ nhik gi, zoshâng Yesuq é hkyô lé Sime-on taî é yánmai, maú byùq akô. 34Sime-on gi, yhángmòq lé shimân byi mù, Yhâng nu Mariq lé, “Wú aq, zoshâng shî gi, Isira-elaq ming mâ é byù myo myô é matú lingbàt jowò eq myo myô é matú kô lò myhang lò râ hkyô le, byù myo myo taî he pyám râ alhô agàn matú le, hkyin tô é hui sû nghut ri. 35Haû mù, byù myo myô é ûnghkaû má, myìt mî‑myìt lé lhoqhtoq shit râ nghut lhê. Náng é myìt nhiklhum má, shâm chûn èq htaû kyâng kat é su gâ é lé, nàng hui zo râ nghut lhê.” ga taî ri.

36Asheri a-myû mâ é Hpanu-elaq é yhang zo, Annaq gâ é myìqhtoi myhí rayùq nyi ri; yhang gi, chyungxe i-pyàt gyai ko bê. Yhang gi, zo-myî pyàt mai, yhang lâng eq nyhit zân za nyì luî, shit xe myi zân jé shoq chuimó mó nyi to sû nghut ri. 37Myiwe haû gi, noqkuq yhûm mai a htoq é za, nyí myín a ga noqkuq dójaú nyî mù, zoshuq túm luî kyûdûng nyi ri. 38Sime-on dang ban taí jáng, Annaq gi, hui lé lô mù, Garai Gasâng jeju lé hkya-on luî, Yerusalem wà mó lé Garai Gasang hkyi yù râ gâ é lé, myìt lum to bang lhúnglháng lé, zoshâng hau é hkyô taî kyô ri.

39Yosep eq Mariq gi, kut râ pé lé haû Yhûmsing é târâ jòq é dông ban kut jáng, Galile mau mâ é yhángmòq wà Nazaret shut dum taû ló bekô. 40Zoshâng haû gi, kô lò mù, wum-o bo lo é eq, hpàqchyî byéng-yá le byíng nyi ri. Garai Gasâng jeju le, Yhâng é ahtoq má jòq nyi ri.

Noqkuq Yhúmhkaû Má Zoshâng Yesuq Jé Nyi É Hkyô

41Yhâng nu yhâng wâ nhik gi, Lhoqlhai Poî jé hkangmó, zàn wuì Yerusalem wà mó má ê ê kut akô. 42Yesuq raxe í zân jé jáng, poî haû, ê bo lòm ra htûngli jòq é eq rajung za, yhángme wuî yhánghpe wuî dòq ló akô. 43Haû poî buìnyì lai luî, dum taû lo é hkûn, zoshâng Yesuq gi, Yerusalem wà mó má nyi gyó tô ri; nghut kôlhang, yhâng nu yhâng wâ nhik gi, a sé kó. 44Yesuq lé rahá lo é luzúm wui chyáng bò râ su ngàm kômù luî, Yosep eq Mariq gi, ra-nyí buìgyùm chap sô ló bê htâng má, mùng mòq wuì eq, sê lhûm é buìnùm ji-myi wui chyáng Yhang lé châng ho akô. 45Yhángnhik gi, Yesuq lé a myàng kôjáng, Yhang lé châng hô uchyang, Yerusalem wà mó má dum taû jé e ló bekô. 46Ahkuî, sum nyí nghû râ nyí shèq, noqkuq yhúmhkaû má, târâ sará pê é gung gûng má zung to mù, yhángmòq é dang lé gyô yù luî, dum taû myi myi kut nyi é lé, yhángnhik ê myàng akô. 47Yhâng é dang wó gyô é bang bànshoq gi, Yhâng é u-nuq nyau é hkyô lé le, Yhang tû taî é dang lé le, maú nyi akô. 48Yhang lé myàng jáng, yhángnhik maú byùq kômù luî, yhâng nu gi, “Ngá zo ê, haî mù luî ngá-nhik lé îsu kut lhê lhú? Wú aq, náng wa eq ngá-nhik gi, myìt myo myìt chiq é èq, nang lé jàq châng ho pyám bê.” ga luî, Yhang lé taî ri.

49Yhang gi, “Haî mù luî, ngo lé châng ho akô lhú? Mauhkûng mâ é Ngá wâ é yhûm má ngò nyì râ lhê lé gi, núngnhik a sé kó lhú?” ga luî, yhángnhik lé tû taî ri. 50Nghut kôlhang, yhángnhik gi, Yesuq taî é dang lichyúm lé, a sê gyo kó.

51Yesuq kúm gi, yhángnhik eq rahá Nazaret wà shut taû jé gyó ló luî, yhángnhik nyo é dang lé gyo mù nyì tô ri. Yhâng nu Mariq gi, dùt laî lò bê hkyô pé bànshoq lé, yhâng é myìt nhiklhum má xûm yu tô ri. 52Yesuq gi, hpàqchyî byéng-yá kûng zèt lo é eq, gùnghkyâng kô myhang lò mù, Garai Gasâng é hí má le, byu hí má le, myòqdong wó lo nyi ri.

Currently Selected:

Lukaq 2: znot

Highlight

Copy