Nhông Jaú 1
1
Myi Nyhé Hkungga
1Haû Yhûmsîng Garai, Mosheq lé wùt yù mù, zùphpong zúm hí má yhang lé dáng nyo é gi, 2“Isira-elaq byu pé lé îsu nghû taí aq; ‘Núngmòq chyáng mâ é rayùq yùq, haû Yhûmsîng Garaî chyáng hkungga yu lé byî é nghut jáng, no hpúng mâ é nghut nghut, sau bainám hpúng mâ é nghut nghut, shigu zo lé hkungga dông yu lé ra râ nghut lhê.
3Yhâng é hkungga gi, no hpúng mâ é myi nyhé hkungga nghut é nghut jáng, haû Yhûmsîng Garai ô ngui é wó dùt sháng gàq, haî le a râ é alo zo lé, zùphpong zúm hkum hí má nhông byi ra râ nghut lhê. 4Yhang gi, myi nyhé hkungga hau é u htoq má yhâng é lòq kê to râ nghut mù, hkungga haû gi, yhâng é mara hkô htaí hkungga kut râ matú, yhâng é gùnglik dông hàp yù byî é hui râ nghut lhê. 5Yhang gi, nolo zo haú lé, Yhûmsîng Garaî é hí má sat râ nghut mù, Arun é yùqzo hkyangjông pé gi, hau é sui lé nhông mù, zùphpong zúm hkum hí mâ é hkungga gyàp ayàm lhînghkyùq má hpyûn gyun ra râ nghut lhê. 6Yhang gi, hkungga gùng hau é sho-kuq lé hî pyám luî, ajàp jàp zân hpyit ra râ nghut lhê. 7Haû Arun é yùqzo hkyangjông pé gi, hkungga gyàp má myi mut luî, myihkyóm htoq má htang zang to ra râ nghut lhê. 8Hau htâng, Arun é yùqzo hkyangjông pé gi, ulhum, xû pé eq shojap haú pé lé, hkungga gyàp htoq mâ é myi duq nyi é htang htoq má ke ra râ nghut lhê. 9Yhang gi, sing û eq hkyî pé lé wui èq chi râ nghut mù, hkyangjong hpó gi, haú pé bànshoq lé hkungga gyàp htoq má nyhê nhông ra râ nghut lhê. Haû gi, Yhûmsîng Garaî é matú namngón shôm nghut é, myî èq nyhê nhong é myi nyhé hkungga nghut lhê.
10Nhông byi râ hkungga gi, myi nyhé hkungga kut râ matú, sau bainám hpúng mâ é sau, a nghut jáng, bainám nghut é nghut jáng, haî le a râ é alo nhông ra râ nghut lhê. 11Yhang gi, hkungga haú lé, haû Yhûmsîng Garaî é hí nghut é, hkungga gyàp é mautsûng hkyam má sat râ nghut mù, Arun é yùqzo hkyangjông pé gi, hau é sui lé, hkungga gyàp ayàm pé má hpyûn gyun ra râ nghut lhê. 12Yhang gi, hkungga gùng lé ajàp jàp zân jàp râ nghut mù, hkyangjong hpó gi, ulhum, xû pé eq shojap haú pé lé, hkungga gyàp htoq mâ é myi duq nyi é htang htoq má ke ra râ nghut lhê. 13Yhang gi, sing û eq hkyî pé lé wui èq chi râ nghut mù, hkyangjong hpó gi, haú pé bànshoq lé hkungga gyàp htoq má nyhê nhông ra râ nghut lhê. Haû gi, Yhûmsîng Garaî é matú namngón shôm nghut é, myî èq nyhê nhong é myi nyhé hkungga nghut lhê.
14Haû Yhûmsîng Garai lé nhông byi râ hkungga gi, nghoq lé myi nyhé hkungga kut é nghut jáng, hpûngkyui radu, a nghut jáng, nghoqmyhû zo radu nhông ra râ nghut lhê. 15Haû hkyangjong hpó gi, haú lé hkungga gyàp má yu ê mù, hau é ulhum ne hpyit luî, hkungga gyàp htoq má nyhê hkyô pyám ra râ nghut lhê; hau é sui lé gi, hkungga gyàp nàm má tsan hkyô pyám ra râ nghut lhê. 16Yhang gi, lùt lé yâm yù mù, nghoqmaú pé lé nùt yù luî, haû myiwap jòq é jang nghut é, hkungga gyàp é buìhtoq hkyam má dú kat pyám ra râ nghut lhê. 17Yhang gi, nghoq haú lé a lâng hpyit é za, dùng mai lâng hkoq râ nghut mù, haû hkyangjong hpó gi, haú lé, hkungga gyàp htoq mâ é myi duq nyi é htang htoq má nyhê nhông ra râ nghut lhê. Haû gi, Yhûmsîng Garaî é matú namngón shôm nghut é, myî èq nyhê nhong é myi nyhé hkungga nghut lhê.
Currently Selected:
Nhông Jaú 1: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.
