Yakuq 5

Sùt Wó Bang Lé Sidìq Byî É Dang

1Sùt wó é bang ê, gyo keq, núngmòq chyáng jé lé lô râ é wuîhke jamjau hkyo é yánmai, ngau garû nyì keq. 2Núngmòq é sùtzè gi, htên bùp byùq bê nghut ri; núngmòq é wùtbu wùtmè le manòt èq zô pyám bê nghut ri. 3Núngmòq é hîng eq ngùn má lháng, jògyik zuî byùq mù luî, haû jògyik gi, núngmòq é mara hkyam shut sàksé dùt byî é eq, núngmòq é gùngsho lé myi su zô pyám râ nghut lhê. Núngmòq gi, jihtûm buìnyì shí pé má, sùtzè lé za hkong to bekô nhung! 4Wú keq, núngmòq é yohtung dùng yò yam nhâng mù luî, ahpau a byî é za, núngmòq mhaú zô tô é ahpau pé garû nyi é htê pé eq mú zui bang garû é htê pé lé gi, haû a-tsam dìk shoq bo é Garai wó gyo byi bê nghut ri. 5Núngmòq gi, myigùng htoq má hkìk hkìk hkâm hkâm wó nyi é eq, i‑myìt ô nau é dông ngón hkyô chyat châng nyi bum akô. Núngmòq gi, sat râ buìnyi é matú yhûmsing é gùng lé tsô myum to bekô nghut ri. 6Haû díngmán é sû#5:6 Díngmán é sû gâ é danghkun lé, Chyúmlaiká ra-am má gi, díngmán é bang gâ ri. lé, núngmòq mara hûn mù, sat pyám bekô. Yhang kúm gi, núngmòq lé a lhom hkûm zìng nghut ri.

Myìt Hîng Hîng Hkam Jan Ra Râ Hkyô

7Haû mù luî, gu-mang wuì ê, haû Yhûmsîng dum jé lé é buìnyì jé shoq myìt hing é èq láng nyî keq ô! Hkyâm saí sû lé wú wú keq, yhang gi, myìhpún mai ahpau dán é ashi lé wó yû shoq ga mau mún eq wò htáng htâng é mau wo gyûn é jé shoq myìt hîng hîng láng nyi ri. 8Haû eq rajung za, núngmòq le, Yhûmsîng Yesuq dum jé lé râ gi, chyâng lo nyì bê nghut é yánmai, myìt hing é èq i‑myìt lé lhoqging lhoqtîng to keq. 9Gu-mang wuì ê, núngmòq jéyáng é a hui sháng gàq, núngmòq yhangchang hkâ-nyung nyâng lhûm nyì ko. Wú keq, Târâ agyì gi, hkúmdong má jé nyi to bê nghut ri.

10Gu-mang wuì ê, haû Yhûmsîng Garaî é myìng eq hko kyô é myìqhtoî pé wuîhke jamjau huî é hkûn, jân pyâm é myìt lé, núngmòq gi, ge é alìk agàn kut yû keq. 11Wú keq, shi-kùt shirang é bang lé, ngá-nhúng gi, hkungsô wó é bang nghu é nghut lhê. Yobaq hkâm jân é yánmai, Yhûmsîng Garai gi, yhang lé htâng má myo myo dum shimân byî é hkyô lé, núngmòq wó gyô wú bê nghut lhê. Haî mù gâ le, haû Yhûmsîng Garai gi, gyai shogyo nhikmyîn é sû nghut nyi ri.

12Ngá é gu-mang wuì ê, bànshoq má ahkyàk dik é gi, haî lé le hkâ dakâm kó. Mauhkûng lé a nghut jáng, myigùng lé lang luî le hkâ dakâm kó. Dâkam é dang gótû lé le hkâtaî nyì kó. Núngmòq dòqdân pyâm é a hui sháng gàq, núngmòq gi, nghut é lé gi, “nghut lhê”, a nghut é lé gi, “a nghut”, nghû za, taí keq.

Lùmjíng Myìt Eq Kyûdung Râ Hkyô

13Núngmòq má rayùq yùq wuîhke jamjau huî é nghut le gi, kyûdûng nyì sháng gàq; rayùq yùq myìt ngón nyi é nghut le gi, hkya-on mahkôn hkon nyì sháng gàq. 14Núngmòq má rayùq yùq nòhpyo huî é nghut le gi, noqkuq hpúng mâ é nhik bô sûwún wuî lé ji yù mù, haú bang gi, Yhûmsîng Yesuq é myìng mai yhang lé xû bùt byi luî, kyûdung byi kó sháng gàq. 15Haû su mù, lùmjíng myìt èq kyûdûng é dang gi, haû nò sû lé lhoqgê luî, Yhûmsîng Garai gi, haú yùq lé lhoqtoq yû râ nghut lhê. Yhang gi, yubàk mara kut shut é nghut kôlhang, hkyut pyám byî é hui râ nghut lhê. 16Haû mù luî, núngmòq lhoqge é hui kó sháng gàq, núngmòq é yubàk mara lé rayùq eq rayùq yín lhum mù, kyûdung byî lhûm nyì keq. Díngmán su é kyûdung dang gi, wó dùt nhâng râ a-tsam wum-o myo myo bo nyi ri.

17Eliya gi, ngá-nhúng su i‑myìt ûnghkaû bo é xângzo byù za nghut lhê. Nghut kôlhang, yhang gi, mau a wò sháng gàq ga, wum kat o kat kyûdung jáng, súm zan eq lha-mó hkyuq hkyap yhang myigùng htoq má mau a wò shoq dùt byùq é nghut lhê. 18Kyû dum dûng kat jáng, mauhkûng gi, maú wo hkyô kat byi mù, myigùng gi, yhâng é kyô shi mui shi lé lhoqhtoq byî wú bê nghut lhê.

19Ngá é gu-mang wuì ê, núngmòq chyáng mâ é rayùq yùq, haû tengmán hkyô mai nghoq ló byùq é hkûn, rayùq yùq gi, yhang lé tengmán hkyô shut dum wó shuî taû lo é nghut le kúm gi, 20haû shuî taû yù sû gi, yubàk mara kut é sû lé, shut shai é hkyô mai tengmán hkyô shut shuî taû yù mù, i-myìt sô lé shi é mai hkyi yù bê nghut é yánmai, yubàk mara myo myo lé shuî nghop pyám byî é sû dùt berâ lé, bûn nyì keq ô!

Currently Selected:

Yakuq 5: znot

Highlight

Copy

Compare