Esai-a 45
45
1Haû Yhûmsîng Garai gi, Yhâng èq namngón xû bùt byi mù,
a-myû wuì lé, yhâng é hí má ùp sîng râ matú,
yhâng é lòqyo lòq má htuqbáng to byi luî,
hkóhkam pê é hking lé hkyut pyám byi mù,
wà hkum pé lé a wó myhi loshoq,
yhâng é hí má hpông hâ to byî é, haû Kuru hkóhkâm lé îsu ga taî ri;
2“Ngò gi, náng é hí má e ló byi mù,
bùm pé lé lhoqrhâ to byi râ nghut lhê;
Ngò gi, gyî èq saî tô é hkum pé lé lhoqhkyop pyám mù,
jòqtoq hkumkyáng pé lé zân hpyit pyám râ nghut lhê.
3Ngò gi, nang lé myìng wùt luî ji yu é Sû, Isira-elaq é Garai Gasang,
haû Yhûmsîng Garai nghut é lé nàng wó sé râ matú,
mauchut mâ é sùtzè pé eq ó a sê é jowò mâ é azíng zê pé lé,
nang lé byi râ nghut lhê.
4Ngò gi, Ngá é duìnhâng zoshâng Yakup,
haû Ngò hkyin yu é Isira-elaq é matú,
nang lé myìng wut mù, ji yù luî,
nàng, Ngo lé a sé kôlhang,
nang lé, hkúngga hpautap é myìng tap byi bê nghut lhê.
5Ngò gi, haû Yhûmsîng Garai nghut lhê; Ngò mai lai luî, gótû a nyì lo;
Ngò mai lai luî, gótû Garai Gasang a nyì lo.
Ngò gi, nàng, Ngo lé a sé shî é nghut kôlhang,
nang lé wum-o lhoqkíng byi râ nghut lhê.
6Haû mù, buìhtoq hkyam mai buìwàng hkyam jé shoq mâ é byu pé gi,
Ngò mai lai luî, gótû a nyì lô é hkyô lé wó sé kôrâ nghut lhê.
Ngò gi, haû Yhûmsîng Garai nghut lhê;
Ngò mai lai luî, gótû a nyì lo.
7Ngò gi, maubó lé jòq nhâng mù, mauchut lé hpan é nghut lhê;
Ngò gi, nyì ngón yùqyò hkyô lé lhoqhtoq mù, byò dàn byò sho hkyô lé hpan é nghut lhê.
Ngò, Yhûmsîng Garai yhang, shí hkyô pé bànshoq lé kut é nghut lhê.
8Ahtoq mauhkûng ê, díngmán hkyô lé wo hkyô kat nhâng àq;
mhut pé ê, haû lé maupyá su wo hkyô kat àq.
Myìdàm htoq gi, galhám yhang há sháng gàq;
hkyi yù hkyô gi, ashi zui sháng gàq;
díngmán hkyô gi, haû eq rahá yùq lò sháng gàq;
Ngò, Yhûmsîng Garai gi, haú lé hpan é nghut lhê.
9Yhûmsîng lé Hpan é Sû eq dangnyhin nyhîn lhûm é sû gi, dingnyé wó ri!
Yhang gi, myigùng mâ é tso-au jàp za nghut lhê, a nghut lhí?
Tsohtung gi, tso-au saí sû lé,
‘Nàng haî saî nyi lhê lhú?’ ga,
náng é lòqmú gi,
‘Yhang lòq a dàp nghut ri.’ ga, ge taí râ lhú?
10Îwa lé, ‘Nàng haî hku é lhú?’ ga,
înu lé, ‘Nàng hku é gi, haî nghut lhê lhú?’ ga, taî é sû gi,
dingnyé wó ri.
11Haû Isira-elaq é Chyoiyúng Sû nghut mù, yhang lé Hpân Sû,
Yhûmsîng Garai taî le,
‘Dùt lò râ hkyô eq séng luî,
Ngá zô pê é hkyô lé, Ngo lé myî akô lhú?
Ngá é lòqmú pê é hkyô lé, Ngá chyáng gôn akô lhú?
12Ngò gi, myìdàm htoq lé hpân mù,
haú má xângzo byù lé hpan tô é nghut lhê.
Ngá é lòq eq yhang, mauhkûng lé hpan to mù,
haú má jòq é mauhkûng gùng pé lé, yhâng é yhang jòq râ hkunmó hkyô tô é nghut lhê.
13Ngò gi, Ngá é díngmán hkyô mai Kuru lé lhoqtoq to râ nghut mù,
yhâng é hkyô bànshoq lé lhoqnyhang to râ nghut lhê.
Yhang gi, Ngá é wà mó lé dum saî xuq mù,
shúm zung tô é, Ngá é byu pé lé,
ahpau chyûnghuq a dûng é za lhoqlhut kat râ nghut lhê.’ gâ ri.
Haû gi, Wum-o a-tsam dìk shoq bò Sû Yhûmsîng Garai taî ri.” gâ ri.
14Haû Yhûmsîng Garai taî le,
“Egutuq ming mai lhoqhtoq é azíng zê pé,
Hkusha byu pé eq gùnghkyâng myhang é Sabe-a byu pê é wuìloq zê pé gi,
náng chyáng jé mù, náng é dùt râ nghut lhê;
yhángmòq gi, náng htâng cháng kôrâ nghut luî,
jòqtoq jâng wùt to mù, náng chyáng lé jé kôrâ nghut lhê;
yhángmòq gi, náng é hí má paî gòp kômù,
‘Gè gè yhang, Garai Gasang gi, nàng eq rahá nghut nyi ri;
Yhang mai lai luî gótû a nyì lo;
Yhang mai lai luî gótû Garai a nyì lo nghut ri.’ ga dûng tôngbán kôrâ nghut lhê.” gâ ri.
15Isira-elaq é hkyi yù Sû, Garai Gasang ê,
Nàng gi, teng za yhang, yhûmsîng gùng haq é Garai Gasang nghut ri.
16Hparà lhô pé saî é bang bànshoq gi, hoq hpu gùng-yui é hui kôrâ nghut lhê;
yhángmòq gi, gùng-yui byùq luî, rahá hoq hpû byùq kôrâ nghut lhê.
17Nghut kôlhang, Isira-elaq gi,
Yhûmsîng Garaî èq ahtum abyùq hkyi yu é hui râ nghut lhê;
núngmòq gi, pyàt pyàt zaí zaí,
hoq hpû é eq nhúngnhâng byùq é hui râ a nghut.
18Hkâsu mù gâ le, haû mauhkûng lé hpan é Garai Gasang nghut mù,
myìdàm htoq lé hpân luî,
a-pûn awang xuq gîng to mù,
haú lé akôm hpan tô é a nghut é za,
nyì râ matú hpan tô é, Yhûmsîng Garai taî le,
“Ngò gi, Yhûmsîng Garai nghut lhê;
Ngò mai lai luî gótû a nyì.
19Ngò gi, mauchut tuq dùt é mau pé má,
haq taî é a nghut;
Ngò gi, Yakup é awùt ashîn pé lé,
‘Ngo lé akôm má ho akô.’ nghû taî é a nghut.
Ngò, Yhûmsîng Garai gi, tengmán é dang taî nyi lhê;
Ngò taî pyo é gi, tengmán é chyat nghut lhê.
20Rahá zing mù, lé keq;
a-myû wuì mai wó hpang lùt lò bang ê, rahá lé zùp zing keq.
Haû sik lé kyûng yu é hparà lhô lé wàq mù,
a wó hkyi yu é hparà pé lé kyûdûng é bang gi, haî le a sé kó nghut ri.
21Núngmòq é hkyô lé taî pyô mù, lhoqhtoq shit wú keq;
yhángmòq rahá chôm hpyê lhum kó sháng gàq.
Shí hkyô lé, góhkûn mai ó te taî to luî,
a-nham mai ó taî pyo é nghut lhê lhú?
Haú yùq gi, Ngò, Yhûmsîng Garai nghut lhê, a nghut lhí?
Ngò mai lai luî gótû Garai Gasang a nyì;
Ngò gi, díngmán é Garai Gasang eq Hkyi yù Sû nghut lhê;
Ngò mai lai luî gótû a nyì lô é nghut lhê.
22Myìdàm htoq htáng shoq má nyi é bànshoq bang ê,
Ngá chyáng lhing lò mù, hkyi yu é hui keq;
hkâsu mù gâ le, Ngò gi, Garai Gasang nghut lhê; Ngò mai lai luî gótû a nyì lô é nghut lhê.
23Ngò gi, Ngá gûng yhang dakâm luî,
Ngá é nhut mai i-myìt díng é dang bànshoq taí bê nghut luî,
rahkun le dum taû lò râ a nghut.
Hkyîhput hkangmó gi, Ngá é hí má htuq kôrâ nghut mù,
shô hkangmó gi, Ngo lé lùm luî dakâm kôrâ nghut lhê.
24Yhángmòq gi, ‘Yhûmsîng Garai za díngmán é eq wum-o a-tsam nghut ri.’ ga
Ngá é hkyô lé taí kôrâ nghut lhê.” gâ ri.
Yhang lé nhikmó-yô é bang bànshoq gi,
Yhâng chyáng lé jé mù, hoq hpû é hui kôrâ nghut lhê.
25Nghut kôlhang, Isira-elaq é awùt ashín pé bànshoq bang gi,
Yhûmsîng Garaî é yánmai díngmán é hui luî,
hkya-on kúngton nyì kôrâ nghut lhê.
© 2025, Wycliffe Bible Translators, Inc.