Hebre 10

Hkrisidùq É Gùng Lé, Bànshoq É Matú Radàm Za Nhông Byî É Hkyô

1Haû jep é târâ gi, jé lô râ nghut é gè hkyô pê é a-kyîng a nghut é za, wùpzo za nghut ri. Haû nghut é yánmai, jep é târâ gi, zàn wuì ru nhông byi byi kut nyi é eq rajung zâ é shigu hkungga pé dông mai, noqkuq râ matú chyâng lé é bang lé hkâ-nhám le wó lhoq gúmjùp é a nghut. 2Târâ haû wó lhoq gúmjùp byî é ru nghut le gi, yhángmòq nhông byî é hkyô nô pyám kôrâ a nghut lhí? Hkâsu mù gâ le, haû noqkuq é bang gi, bànshoq é matú radàm za lhoq sanséng huî é nghut jáng, yhángmòq é yubàk marâ é matú, hkâ-nhám le mara a bò bun lo kôrâ nghut lhê. 3Nghut kôlhang, shigu hkungga haú pé gi, zàn wuì yubàk mara pé lé lhoqpun byî é zè nghut ri. 4Haî mù gâ le, nohtó pé eq bainám pê é sui gi, yubàk mara lé huî sêng pyâm é hkyô wó dùt é a nghut.

5Haû mù luî, Hkrisidùq, mingkan má lé jé é hkûn, Yhang taî é gi,

“Shigu hkungga eq hkungga lé Nàng a o é nghut mù,

Nàng kúm gi, Ngá é matú gùngdu hen to byi bê nghut ri.

6Myi nyhé hkungga pé eq mara hkyut hkungga pé gi, Nang lé gabú nhang é a nghut.

7Hau htâng, Ngò gi, ‘Garai Gasang ê, Ngò eq séng luî chyúmding má kâ tô é eq rajung za,

Nàng ô nau é hkyô kut râ matú, Ngò, shî má nyi lhê.’ nghû taî é.”#Hkya-on 40:6-8

gâ ri. 8Sânghi má, Yhang gi, “Shigu hkungga eq hkungga pé, myi nyhé hkungga eq mara hkyut hkungga pé lé, Nàng a o é htoq agó, haú pé lé Nàng a gabú é nghut lhê.” ga taî ri. Haû jep é târâ dông haú pé lé kut râ dùt kôlhang taî é nghut ri. 9Hau htâng má, Yhang gi, “Nàng ô nau é hkyô kut râ matú, Ngò, shî má nyi lhê.” ga taî ri. Haû gi, Yhang, htang lhum dangshikaq lé htaî masàt to râ matú, sânghî lhum lé tô pyâm é nghut ri. 10Myìt ô naù hkyô hau é yánmai, Yesuq Hkrisidùq, Yhâng é gùngdu lé hkungga dông bànshoq é matú radàm za nhông byî é dông mai, ngá-nhúng gi, lhoq chyoiyúng é hui bê nghut ri. 11Hkyangjong hkangmó gi, nyí nyí buì buì, yàp mù, yhâng é hkyangjong múzó lé zui saî é nghut lhê. Yhang gi, yubàk mara lé hkâ-nhám lháng a wó huî sêng pyám byî é, rajung zâ é shigu hkungga lé, dum nhông byi byi kut é nghut lhê. 12Nghut kôlhang, hkyangjong mó nghut é Hkrisidùq gi, yubàk mara hkyut byi râ hkungga ralhum lé za, ahkyíng bànshoq é matú ban nhông byî é hkûn jáng, Garai Gasâng é lòqyo hkyam shut zung to bê nghut ri. 13Haú hkûn mai, Yhang gi, Yhâng é gye pé lé, Yhâng é hkyî nang jang kut byi râ lé láng nyi é nghut ri. 14Haî mù gâ le, Yhang gi, lhoq chyoiyúng é huî nyì bang lé, hkungga ralhum eq za, pyàt dedû é matú lhoq gúmjùp byi bê nghut ri.

15Haû Chyoiyúng Sô le, haú hkyô eq séng luî ngá-nhúng lé sàksé hkâm kyô ri. Sânghi má, Yhang taî é gi,

16“Haû Yhûmsîng taî ri; shî gi, ahkyíng haû laî htâng má, Ngò, yhángmòq eq to râ dangshikaq nghut lhê.

Ngò gi, Ngá é târâ pé lé, yhángmòq é myìt nhiklhum hkaû má kat byi mù, yhángmòq é i‑myìt má kâ to byi râ nghut lhê.”#Yer 31:33

gâ ri. 17Hau htâng, Yhang taî jàt é gi,

“Ngò gi, yhángmòq é yubàk mara pé eq târâ a chung é múzó pé lé, bun lo râ a nghut.”#Yer 31:34

gâ ri. 18Haû mù, mara haú pé lé hkyut pyám byi bê nghut jáng, yubàk marâ é matú hai hkungga le a ra lo nghut ri.

Hkam Jan Râ Hkyô

19Haû mù luî, gu-mang wuì ê, ngá-nhúng gi, Yesuq é suî èq, haû Chyoiyúng Htâng é Jowò má wàng râ matú hkyak wó lum to bê nghut lhê. 20Haû gi, Yesuq é gùngdu nghut é pán-gyang dông mai, ngá-nhûng é matú hpóng byi bê nghut é asik eq rû dui nyi é hkyô nghut lhê. 21Haû nghut é yánmai le, Garai Gasâng é yhûm lé ùp é gyaú é hkyangjong lé ngá-nhúng wó é yánmai le, 22ngá-nhúng gi, gingtîng é lùmjíng hkyô mai sansêng é i‑myìt èq, Garai Gasâng chyáng ê mù, mara bò bûn é myìt sôn sê é hkyô mai, ngá-nhúng lé lhoq sanséng râ matú ngá-nhûng é i‑myìt lé hpyûn gyûn é hui nhâng luî, ngá-nhûng é gùngdu gi, sân-yúng wui èq chi byî é hkam yù sháng. 23Ngá-nhúng gi, ngá-nhúng yín yu é myìt myòqbyù hkyô lé zuî gingtîng nyì sháng; hkâsu mù gâ le, danghtum htûm to bê Sû gi, lhumzui Sû nghut lhê. 24Chyitdàp hkyô eq ge é múzó pé má, ngá-nhúng gi, rayùq eq rayùq hkâsu kut myìt nhaû toq byî lhum râ hkyô lé, dàt myìt nyì sháng. 25Chôm huî zùp lhûm nyi é hkyô lé, ra-am lhaq tô pyâm nyì kô é su, ngá-nhúng gi, a tô pyâm é za, haû Buìnyì chyâng lò bê nghut é lé núngmòq sê é eq rajung za, rayùq eq rayùq je riyhang myìt wum byî lhûm nyì sháng.

26Ngá-nhúng gi, tengmán hkyô lé sê yu é htâng má, shi-ngé ngé mara dum kut shut shut kut é nghut jáng, mara hkyut byi râ hkungga a jòq lo. 27Târâ jéyáng hkyô eq Garai Gasâng é gye pé lé nyhê hkyô pyám râ nghut é nhikmó-yô é myi lé za, gyùq chiq myìt mai láng nyî râ dùt bê nghut lhê. 28Mosheq é târâ lé he-ngìk é sû ó yùq le, sàksé í sum yuq é dâng é yánmai, shogyo nhikmyin a huî é za sat pyâm é hui bê nghut lhê. 29Haû jáng, Garai Gasâng é Yhangzo lé hkyîwa ô má nâng pyeq bê sû, yhûmsîng lé lhoq sân-yúng byi bê nghut é dangshikaq é sui lé a chyoiyúng é zè dông kut pyám bê sû eq, jeju byî é Sô lé rhoi é sû gi, hkâ-í yhang gyaú é mara dam byî é hui gíng râ nghut lhê nghû, núngmòq wó myìt akô lhú? 30Hkâsu mù gâ le, “Lató hpuq râ gi, Ngò ru nghut lhê; Ngò lató hpuq râ.”#Târâ Pun 32:35 ga le, “Haû Yhûmsîng gi, Yhâng é byu pé lé târâ jéyáng râ nghut lhê.”#Târâ Pun 32:36 ga le, taî é Sû lé, ngá-nhúng sê lhê. 31Haû rû dui nyì sû Garai Gasâng é lòqhkaû má byìt gyó wang é gi, gyùq chiq jung yhang nghut ri.

32Núngmòq, haû maubó lé hàp yu é#10:32 Haû maubó lé hàp yu é gâ é gi, gabú danglù lé sânghi wó hàp yu é lé gâ lhê. htâng, wuîhke jamjau huî é má gyai yhang shi-kùt kôluî wó jân pyám bê nghut é, hí lhê buìnyì pé lé myìtbun keq. 33Ra-u u má, núngmòq gi, byu pê hí má de de rhoi shit é eq zing-rî é hui zo bekô nghut ri; ra-u u má, núngmòq gi, haû su hui zo bang eq rahá bo hui zo bekô nghut ri. 34Núngmòq yhang, je ge é eq ru gîng nyi é zè pé wó é lé sé kô é yánmai, núngmòq gi, htóng lúng bang lé shogyo nhikmyin bekô eq, núngmòq é sùtzè pé lé sing yu pyám byî é bang lé, gabú myìt èq jân pyám bekô nghut ri.

35Haû mù luî, núngmòq é hkyak myìt lum tô é hkyô lé hkâdú pyám kó; agùn agó chyûnghuq shigyaú é hui kôrâ nghut lhê. 36Núngmòq gi, Garai Gasâng é ô naù hkyô lé kut é hkûn, Yhang danghtum htûm tô é lé wó hàp yù râ matú, núngmòq hkam jan râ dùt é nghut lhê. 37Hkâsu mù gâ le, razùp zo nghut jáng,

“Haû lé lô râ Sû gi, jé lé râ nghut mù, ahkyíng lhoqmyáng râ a nghut.

38Nghut kôlhang, Ngá é díngmán sû gi, lùmjíng myìt mai chyungxe duì râ nghut lhê.

Yhang nùngzut zùt é nghut le gi, Ngò, Yhang lé myìt nguì râ a nghut.”#Hbk 2:3-4

gâ tô ri. 39Nghut kôlhang, ngá-nhúng gi, nùngzut zùt mù htên byòq huî é bang a nghut é za, lùmjíng mù hkyi yù huî é bang ru nghut lhê.

Currently Selected:

Hebre 10: znot

Highlight

Copy

Compare