Ezekela 44
44
Hkyangjong Wò Pé
1Hau htâng, yhang gi, ngo lé, sân-yúng jowò é, buìhtoq hkyam shut hu tô é shinggan wâng hkum shut shuî e ri; hkum haû gi, myhî tô ri. 2Haú hkûn, haû Yhûmsîng Garai gi, ngo lé, “Hkum shî gi, jâng myhî to râ nghut lhê. Haú lé ge hpóng râ a nghut; ó yùq le, haú mai wó wang lai râ a nghut; Isira-elaq é Garai Gasang, haû Yhûmsîng Garai hkum haú mai wang laî é yánmai, hkum haû jâng myhî to râ nghut lhê. 3Zau hpó kúm gi, zau nghut é yánmai, haû Yhûmsîng Garaî é hí má zo râ matú wâng hkúmdong má ge zùng râ nghut lhê. Nghut kôlhang, yhang gi, wâng hkúmdong mâ é laìshînhtâng mai wàng mù, haú mai dum htoq ra râ nghut lhê.” ga taî ri.
4Hau htâng, yhang gi, ngo lé, mautsûng hkum hkyô mai noqkuq yhûm hí má shuî jé ri; haú hkûn, ngò wú kat le, haû Yhûmsîng Garaî é noqkuq yhûm má Yhûmsîng Garaî é hpungwup shingkang byíng zan tô é lé myàng mù, ngò gi, myòqdong ngóm gòp bê nghut lhê.
5Haú hkûn, haû Yhûmsîng Garai gi, ngo lé, “Byù zo ê, rago wú mù, haû Yhûmsîng Garaî é noqkuq yhûm eq séng luî, Ngò, nang lé taî kyô é cháng ra târâ bànshoq eq mhoq kyô é hkyô pé jung hkangmó lé, chyáng mai gyo mù, rago tâm gyô yù àq. Noqkuq yhûm wàng hkum eq sân-yúng jowò mâ é htoq hkum pé lé rago wú xûm to aq. 6Gumlau toq é Isira-elaq byu pé lé shî su nghû taí aq; ‘Haû Ahko Ahkáng lhúnglháng wó Sû Yhûmsîng Garai shî su ga taî ri; Isira-elaq byu pé ê, núngmòq kut é achaq achyut hkyô gé lo keq hkoi! 7Núngmòq gi, núngmòq kut é achaq achyut hkyô bànshoq htoq má, núngmòq, ngo lé, zoshuq, xû hkyí eq sui pé nhông byi kô é hkûn, i-myìt eq gùngsho má ahpyo-kuq a hpyit é maigan byu pé lé Ngá é sân-yúng jowò má shuî wàng mù, Ngá é noqkuq yhûm lé agòt a-û kut pyám kôluî, Ngá é dangshikaq lé lhoqhpyoq pyám bekô nghut ri. 8Núngmòq gi, Ngá é chyoiyúng zè pé lé, núngmòq yhang wú zúng kôrâ malaî, gótû byù haú bang lé, Ngá é sân-yúng jowò wú zúng nhang akô nghut ri. 9Haû Ahko Ahkáng lhúnglháng wó Sû Yhûmsîng Garai shî su ga taî ri; i-myìt eq gùngsho má ahpyo-kuq a hpyit é maigan byù ó yùq le, Ngá é sân-yúng jowò má wó wâng râ a nghut; Isira-elaq byu pê chyáng nyi é maigan byù lháng wó wâng râ a nghut.
10Isira-elaq byu pé hkyô nghoq ló byùq é hkûn, Ngá chyáng mai wê gâng ló byùq é eq, Ngá chyáng mai yông htoq ló mù, yhángmòq é hparà hpôlhô pê htâng châng é, Lewiq byu pé gi, yhûmsing é yubàk mara dàm hui zo kôrâ nghut lhê. 11Nghut kôle, yhángmòq gi, Ngá é sân-yúng jowò má dójaú kôrâ nghut lhê; yhángmòq gi, noqkuq yhûm hkum pé lé wú zúng mù, yhúmhkaû má dójaú râ nghut lhê; yhángmòq gi, shiwa byu pê é matú myi nyhé hkungga pé eq gótû hkungga pé lé sat mù, mingbyû wui é hí má yàp luî, yhángmòq lé dójaú kôrâ nghut lhê. 12Yhángmòq gi, yhûmsing é hparà hpôlhô pê é hí má, mingbyû wuì lé dójaú kômù, Isira-elaq byu pé lé mara kut shut nhâng bekô nghut é yánmai, yhángmòq gi, yhûmsing é yubàk mara dam lé hkyak hkâm zo ra kôrâ nghut lhê nghû, Ngò lòq tû dâkam tô é nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri. 13Yhángmòq gi, Ngá é hí má hkyangjong mû wùn wàq râ matú, Ngá é chyoiyúng zê pé eq Ngá é chyoiyúng htâng é hkungga pé má ge chyâng htèp lé kôrâ a nghut. Yhángmòq gi, yhûmsîng kut é achaq achyut hkyô pé mai hkyak hoq hpu ra kôrâ nghut lhê. 14Nghut kôlhang, Ngò gi, yhángmòq lé, noqkuq yhûm má kut râ múzó bànshoq é matú, noqkuq yhûm lé zúng râ wò byî to râ nghut lhê.
15Haû Isira-elaq byu pé Ngá chyáng mai hkyô nghoq ló byùq kô é hkûn, Ngá é sân-yúng jowò lé wú zúng é, Zadok é awùt ashín, Lewiq byù hkyangjông pé kúm gi, Ngá é hí má dójaú râ matú ge chyâng lé kôrâ nghut lhê; yhángmòq gi, xû hkyí eq sui hkungga pé lé nhông byi râ matú, Ngá é hí má yàp ra kôrâ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri. 16Yhángmòq za, Ngá é sân-yúng jowò má ge wàng kôrâ nghut mù, Ngá é hí má dójaú râ matú Ngá é hkungga gyàp má ge chyâng htèp lé luî, wú zúng bang dông Ngo lé ge dójaú kôrâ nghut lhê.
17Yhángmòq gi, ahtê pyâm wânghkaû hkum pé má wàng kô é hkûn, nú nhâm é ji mèbu wùt ra kôrâ nghut lhê; yhángmòq gi, ahtê pyâm wânghkaû hkum pé eq noqkuq yhûm ahkaû má dójaú mû wùn wàq kô é u, saumaú mèbu ge wùt kôrâ a nghut. 18Yhángmòq gi, yhûmsing é ulhum má nú nhâm é jihkyîng uhtup htup mù, nú nhâm é ahte buhîng lé yhûmsing é hpyidum má wùt ra râ dùt lhê; buìbù htoq lui é mèbu ge wùt râ a nghut. 19Yhángmòq gi, shiwa byu pé nyi é sânghî pyâm wânghkaû má htoq ê râ nghut jáng, yhángmòq dójaú hkûn wùt é mèbu lé hkyut mù, chyoiyúng wàp pé má tô to luî, gótû mèbu wùt ra kôrâ nghut lhê; haû a nghut jáng, yhángmòq é mèbû èq shiwa byu pé lé záng lhoq chyoiyúng sê lhê.
20Yhángmòq gi, uchyuí ge chyuí kôrâ le a nghut; xâm hîng ge to kôrâ le a nghut; xâm nyhâm pyám ra kôrâ nghut lhê. 21Hkyangjong gi, ahtê pyâm wânghkaû má wang é hkûn, tsibyiq wing ge shuq râ a nghut. 22Yhángmòq gi, mâyû chuimó myhí lé le, yhûmsing yùqgè eq gang bê myiwe lé le, ge hâng yù kôrâ a nghut; Isira-elaq a-myû mâ é zo-myi gyíng eq gótû hkyangjong hpó shi chuî tô é myiwe lé za ge hâng yù râ nghut lhê. 23Yhángmòq gi, Ngá é byu pé lé, chyoiyúng é eq a chyoiyúng é lé ge gam hkoq râ matú le, sansêng é eq a sansêng é lé ge gam hkoq râ matú le, mhoq byi ra kôrâ nghut lhê.
24Yhángmòq gi, mû htoq jáng, târâ agyì pé dông dójaú mù, Ngá é cháng ra târâ pé má cháng luî mû hpyit ra kôrâ nghut lhê. Yhángmòq gi, Ngò masàt tô é poî pé bànshoq kut é hkûn, Ngá é târâ pé eq Ngá é târâ wàng hkunmó pé lé cháng luî, Ngá é Bánno Buìnyì lé lhoq chyoiyúng ra kôrâ nghut lhê.
25Hkyangjong rayùq gi, màng shut chyâng htèp e é dông yhûmsing gùng lé agòt a-û ge kut yû râ a nghut; nghut kôlhang, yhâng nu yhâng wa, yhang zo yùqzo byìzo, yhang gu yhang mang eq myi a ló shî é yhâng nhammó shi é nghut jáng, haú pé dông yhûmsing gùng lé agòt a-û kut yû râ ahkáng jòq lhê. 26Yhang sansêng é htâng má, nyhit nyí dum nyi to ra râ nghut lhê. 27Yhang gi, sân-yúng jowò má dójaú râ matú, sân-yúng jowo é ahtê pyâm wânghkaû má wang é buìnyì má, yhûmsing é matú mara hkyut hkungga nhông byi ra râ nghut lhê; haû gi, Ahko Ahkáng lhúnglháng wó Sû Yhûmsîng Garai taî pyo ri.
28Ngò za hkyangjông pê é silî wunlî dùt ra râ nghut lhê. Isira-elaq mîngdán má yhángmòq sing yù râ zè haî le ge byi râ a nghut; Ngò gi, yhángmòq é silî wunlî nghut bê. 29Yhángmòq gi, gùqzò hkungga pé, mara hkyut hkungga pé eq mara hpyî hkungga pé lé zo râ nghut lhê; Isira-elaq a-myû má haû Yhûmsîng Garaî é matú nhông byi bê é zè lhúnglháng gi, yhángmòq eq séng râ nghut lhê. 30Sânghi myhîng é ashi pé mâ é je ge é ashi bànshoq eq nhông byî é hkungga bànshoq gi, hkyangjông pé eq séng râ nghut lhê. Núngmòq é yhûm má shimân jeju wó jòq nyì sháng gàq, yhángmòq lé, núngmòq luí é sânghî é mún byi ra kôrâ nghut lhê. 31Hkyangjông pé gi, yhang baú shi tô é, a nghut jáng, yòsô ze èq lâng myha sat tô é, nghoqzo nghut nghut, gaunyhaú nghut nghut haî lé le, ge zo kôrâ a nghut.
Currently Selected:
Ezekela 44: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.
