Htoq Ló 2

Mosheq Hku Lé Lo É Hkyô

1Haú yòq má, Lewiq up mâ é yùqgè rayùq gi, Lewiq myiwe lé yu ri. 2Haû mù, myiwe haû gi, zogûng dùt mù, yùqzo rayùq hku ri. Yhang gi, zoshâng hau é gùnghkyâng isâm yúng é lé myàng mù, yhang lé lha-mó sum hkyap haq tô ri. 3Nghut kôlhang, yhang gi, a wó haq to lo jáng, yùqzo zoshâng hau é matú jàm tsaí gâm lé kyáng saî yù mù, tso-kyín eq sikgyi bùt luî, zoshâng haú lé, kyáng haú má kat mù, Nile Wuìlàng yàm mâ é jàm yò má ê tô tô ri. 4Yùqzo hau é yhâng nhá gi, yhâng chyáng haî dùt lô râ làq ga, we we mai wú yàp tô ri.

5Haú u lé, Hpara-uq é yhang zo byìzo gi, gùng chi râ ga Nile Wuìlàng má gyó wang e é nghut luî, yhâng é duìnhâng zoshâng wuì gi, wuì yàm má sô wún bum akô. Yhang gi, jàm yò má kyáng ralhum byôm tô é lé myang kat mù, haú lé ê xe lò râ matú yhâng é duìnhâng zoshâng myhí lé nhang kat ri. 6Yhang gi, kyáng haú lé hpông wú le, nyheqnú rayùq lúng tô é lé myang ri. Nyheqnú haû gi, ngau nyi é nghut mù, yhang gi, wú shogyo luî, “Shî gi, Hebre nyheqnú nghut ri.” ga taî ri.

7Haú hkûn, nyheqnú hau é yhâng nhá gi, Hpara-uq é yhang zo byìzo lé, “Ngò gi, náng é matú, nyheqnú shî lé naú bo huq byi râ Hebre myhí rayùq ê bo ji lò byî le gè râ lhú?” ga myî ri.

8Haû jáng, yhang gi, “Ge ri; ê ji lò àq.” ga tû taî ri. Haû mù, myiwe zo haû gi, ê luî, nyheqnú hau é yhâng nu lé yhang, ê ji lò byi bê nghut ri. 9Haú hkûn, Hpara-uq é yhang zo byìzo gi, myiwe myhí haú lé, “Nyheqnú shî lé nàng bún ló mù, ngá é matú ló bo hku ko byi aq; ngò, nang lé ahpau byi râ nghut lhê.” ga taî ri. Haû mù, myiwe myhí haû gi, nyheqnú haú lé bún lô mù, lo baú ko bê nghut ri. 10Zoshâng haû kô lò jáng, myiwe myhí haû gi, yhang lé, Hpara-uq é yhang zo byìzô chyáng shuî ê byî é nghut mù, yhang gi, Hpara-uq é yhang zo byìzô é yhang zo dùt bê nghut ri. Hpara-uq é yhang zo byìzo gi, “Ngò, yhang lé wuì mai xe htoq yu é nghut lhê.” ga taí mù, yhang lé, Mosheq ga myìng myhíng byî ri.

Mosheq, Midi-an Mau Má Hpang E É Hkyô

11Mosheq kô ding é htâng, ra-nyí lé, yhang gi, yhâng é byu pê chyáng htoq ê mù, yhángmòq zuî hkyik zuî ngú nyi é lé ê wú ri. Haú hkûn, yhang gi, yhâng é a-myû Hebre byù rayùq lé, Egutuq byù rayùq èq nhuq bàt nyi é lé myang ri. 12Haû mù, yhang gi, lhînghkyùq má wú kat le ó a nyi to luî, Egutuq byù haú yùq lé sat pyám mù, se-muî jàng má myhup pyám bê nghut ri. 13Hau htang nyí, yhang dum htoq e le, Hebre byù yhangchang í yùq dàp lhum nhuq lhûm nyì kô é lé ê myang ri. Haû mù, yhang gi, haû ûng zô nyì sû yùq lé, “Nàng gi, haî mù, yhûmsing Hebre byù lé bàt nyi lhê lhú?” ga myî ri.

14Byù haú yùq gi, “Nang lé, ngá-mòq é zau eq târâ agyì ó yùq kut nhang é lhú? Nàng gi, Egutuq hpó lé sat pyâm é su, ngo lé le sat pyám râ nghû myìt nyi lhê lhú?” ga taî ri. Haû mù, Mosheq gi, “Ngò kut é hkyô shî byông htoq berâ nghut lhê.” ga myìt yù luî, gyùq byùq bê nghut ri.

15Hpara-uq gi, haú hkyô lé wó gyo jáng, Mosheq lé sat pyám râ ga ho ri; nghut kôlhang, Mosheq gi, Hpara-uq chyáng mai hpâng luî, Midi-an mau má ê nyi nyi ri. Haú má jé é hkûn, yhang gi, wuìhtúng ralhûm é nàm má ê zung tô ri. 16Midi-an mau mâ é hkyangjong rayùq gi, byìzo nyhit yùq wó ri; haú nhiktâng wuì gi, yhángmòq é yhâng wâ é sau bainám hpúng pé lé wuì huq râ matú, lànghkang má wuì hkam pyíng râ ga, wuì lé hkam akô nghut ri. 17Sau zúng bang ra-am gi, lé lô kômù, haú bang lé lé hkat akô; nghut kôlhang, Mosheq gi, toq luî, yhángmòq lé ê garúm yû mù, yhángmòq é sau bainám pé lé wuì hkâm huq byî ri.

18Byìzo haú bang, yháng nhiktâng wui é yhâng wa Re-u-ela chyáng dum taû jé ló kô é hkûn, yhang gi, yháng nhiktâng wuì lé, “Hkû-nyí, núng nhiktâng wuì, haî mù shî í noq le taû lo akô lhú?” ga lhom myî ri.

19Yháng nhiktâng wuì gi, “Egutuq byù rayùq, sau zúng bâng é lòq mai ngá-mòq lé hung yu ri. Yhang gi, ngá-mòq é matú wuì lháng hkam garúm mù, sau bainám hpúng pé lé wuì bo huq byî ri.” ga tu taî akô nghut ri.

20Haú hkûn, Ru-ela gi, yhang zô nhiktâng wuì lé, “Haû jáng, yhang gi, hká má kó lhú? Núngmòq, haî mù yhang lé nyhi pyâm tô akô? Yhang lé, rajung jung hkâlháng byi zo sháng, ê ji lò keq.” ga taî ri.

21Mosheq gi, Ru-ela chyáng bo nyì râ matú, myìt hui bê nghut mù, Ru-ela gi, Mosheq lé, yhang zo byìzo Zihpora lé byi tso bê nghut ri. 22Zihpora gi, Mosheq lé yùqzo rayùq hkû byi jáng, Mosheq gi, “Ngò, byù bíng pê é mau má byù bíng rayùq dùt bê nghut ri.” ga taí luî, yùqzo haú lé Gerishom#2:22 Gerishom gâ é gi, Hebre dang má, byù bíng rayùq gâ é lichyúm htoq é su gâ ri. ga myìng myhíng byî ri.

23Ahkyíng buìnyì tsómra myáng byùq é htâng má, Egutuq hkóhkâm shi byùq bê nghut ri. Haû Isira-elaq byu pé gi, jùn dut nyi é má ngaùhkyûng ngaùyang dùt nyi bùm kômù, wùt ngau bùm kôluî, yhángmòq jùn dut é yánmai, garúm wùt dûng ngau é htê gi, Garai Gasâng chyáng hkyang dòq ló bê nghut ri. 24Garai Gasang gi, yhángmòq é ngaùhkyûng ngaùyang htê lé wó gyo byi mù, Abraham, Isak eq Yakup pé eq tô tô é Yhâng é dangshikaq lé myìtbun bê nghut ri. 25Garai Gasang gi, Isira-elaq byu pé lé wú shogyo mù, yhángmòq é hkyô lé myìt byi bê nghut ri.

Currently Selected:

Htoq Ló 2: znot

Highlight

Compare

Copy