Dani-elaq 9
9
Dani-elaq É Kyûdung Dang
1Babelon mîngdán má hkóhkâm kut lai bê nghut é Medi a-myû Ahasuru#9:1 Ahasuru lé, Grik dông gi, Serise gâ lhê. é yhang zo Dari hkóhkâm hkô má zung é sânghî zàn má, 2ngò, Dani-elaq gi, Yerusalem wà mó nyhit xê zàn yhang chamchyuîyuì htên byòq to râ nghut lhê gâ é hkyô lé, myìqhtoi Yeremi-aq lé byî tô é Yhûmsîng Garaî é mungdang má cháng luî, Chyúmdang pé mai wó sê gyô yu é nghut lhê. 3Haû mù, ngò gi, haû Yhûmsîng Garai Gasâng shut lhîng mù, Yhang lé, kyûdung, dûng tôngbán, zoshuq túm kyûdung kut mù, jimê tû wut, myiwap kyaq gyun kut é nghut lhê.
4Ngò gi, ngá é Garai Gasang nghut é, haû Yhûmsîng Garai lé kyûdung mù,
“Yhûmsîng ê, Nang lé chyitdàp mù, Náng é hkunmó pé lé châng é bang lé, Náng é chyitdàp dangshikaq lhoqgîng tô é, kô hkìk é eq gyùq chiq gíng é Garai Gasang ê, 5ngá-mòq gi, mara kut shut bê; ngá-mòq gi, a jo a têng é hkyô kut shut bê nghut lhê ô. Ngá-mòq gi, agè ashop hkyô kut mù, gumlau toq bê bang nghut lhê; ngá-mòq gi, Náng é hkunmó pé eq târâ pé mai lhing ló byùq é bang nghut lhê. 6Ngá-mòq gi, Náng é myìng lang mù, ngá-mòq é hkóhkam pé, ngá-mòq é zau wuî, ngá-mòq é îchyí îwâ pé eq mingbyû wuì bànshoq lé dáng nyo é, Náng é duìnhâng zoshâng myìqhtoî pê é dang lé a gyo kut pyám bê nghut lhê.
7Yhûmsîng ê, Nàng gi, díngmán sû nghut ri; nghut kôlhang, hkû-nyí, ngá-mòq, Náng lé a jujúm é yánmai, wê é chyâng é mîngdán bànshoq má Nang èq hkat hâng é, Yudaq byu pé, Yerusalem wà mó má nyi é bang eq Isira-elaq byù bànshoq bang gi, hoq hpû é hui zô nyì bekô nghut ri. 8Yhûmsîng Garai ê, ngá-mòq gi, Nang lé mara kut shut bê nghut é yánmai, ngá-mòq le, ngá-mòq é hkóhkam pé le, ngá-mòq é zau wuì eq ngá-mòq é îchyí îwâ pé le, hoq hpû é hui zô nyì bê nghut lhê. 9Ngá-mòq gi, Yhang lé gumlau toq pyám bê nghut kôle, ngá-mòq é Garai Gasang nghut é, haû Yhûmsîng gi, shogyo nhikmyîn é eq mara hkyut pyám byi Sû nghut ri. 10Ngá-mòq gi, ngá-mòq é Garai Gasang nghut é, haû Yhûmsîng Garaî é jì-no a gyô pyám kut é htoq agó, Yhâng é duìnhâng zoshâng myìqhtoî pé dông ngá-mòq lé byî tô bê nghut é târâ pé lé le a cháng kut pyám bê nghut lhê. 11Isira-elaq byù bànshoq bang gi, Náng é târâ lé lu laî pyám mù, lhing ló byùq luî, Náng é jì-no a gyo kut bum akô nghut ri.
Haû mù, ngá-mòq gi, Nang lé mara kut shut bê nghut é yánmai, Garai Gasâng é duìnhâng zoshâng Mosheq é târâ má kâ tô é nhinghkun pé eq dâkam é târâ jéyáng hkyô pé lé, ngá-mòq é ahtoq má hut hkyô to bê nghut ri. 12Nàng gi, ngá-mòq chyáng byò dàn byò sho hkyô mó jé nhang é dông, ngá-mòq eq ngá-mòq é zau wuî lé taî htuqhtîng é dang lé lhoqdìk bê nghut ri. Yerusalem wà mó má dùt é su, mauhkûng ô bànshoq má haî le a dùt wú é nghut lhê. 13Mosheq é târâ má kâ tô é eq rajung za, byò dàn byò sho hkyô shí pé bànshoq, ngá-mòq chyáng jé bê nghut ri; nghut kôlhang, ngá-mòq gi, yhûmsing é yubàk mara lé koi pyám mù, Náng é tengmán hkyô lé rago tâm gyô é dông, ngá-mòq é Garai Gasang nghut é, haû Yhûmsîng Garaî é jeju lé ho bum é a nghut. 14Haû Yhûmsîng Garai gi, ngá-mòq chyáng byò dàn byò sho hkyô jé nhâng râ matú, a uq-ô nyì nghut ri; hkâsu mù gâ le, ngá-mòq é Garai Gasang nghut é, haû Yhûmsîng Garai gi, Yhang kut é hkyô hkangmó má díngmán Sû nghut ri; nghut kôle, ngá-mòq gi, Yhâng é jì-no a gyo kut pyám bê nghut lhê.
15Ahkuî, Náng é byu pé lé, Náng é wum-o a-tsam mó bo é lòq èq Egutuq ming mai shuî htoq lô mù, hkû-nyí jé shoq yhûmsing é myìng lé gingtíng nhang tô é, ngá-mòq é Garai Gasang nghut é, haû Yhûmsîng ê, ngá-mòq gi, mara kut shut bê; ngá-mòq gi, a jo a têng é hkyô kut shut bê nghut lhê ô. 16Yhûmsîng ê, Nàng kut é díngmán hkyô bànshoq má cháng mù, Náng é chyoiyúng bùm nghu é, Náng é wà mó Yerusalem mai, Náng é nhikjum yo hkyô eq nhikmó-yo hkyô lé lhing pyám byi laq. Ngá-mòq é yubàk mara eq ngá-mòq é îchyí îwâ pé kut shut é hkyô gi, Yerusalem wà mó eq Náng é byu pé lé, ngá-mòq é awui ayàm má nyi é bànshoq bâng èq lùmù gànsâng jowò dùt nhâng bê nghut ri.
17Haû mù, ngá-mòq é Garai Gasang ê, Náng é duìnhâng zôshang é kyûdung dang pé eq dûng tôngbán é dang pé lé gyô yù byi laq. Yhûmsîng ê, Náng gung é matú, Náng é chamchyuîyuì dùt tô é sân-yúng jowò lé, shogyo chyitdàp myìt mai wú laq. 18Ngá-mòq é Garai Gasang ê, Náng é nohkyap lhîng mù, gyô yù byi laq; Náng é myòqjí hpóng mù, Náng é myìng wun é wà mó chamchyuîyuì dùt tô é lé wú laq. Ngá-mòq gi, yhûmsîng díngmán é yánmai, Nang lé dûng tôngbán é a nghut é za, Náng é shogyo nhikmyin mó é yánmai shèq dûng tôngbán é ru nghut lhê. 19Yhûmsîng ê, gyo byi laq! Yhûmsîng ê, mara hkyut byi laq! Yhûmsîng ê, gyô yù byi mù, dùt htoq nhâng laq! Ngá é Garai Gasang ê, Náng gung é matú, hkâ lhoqmyáng nyî lo; hkâsu mù gâ le, Náng é wà mó eq Náng é byu pé gi, Náng é myìng wun é nghut lhê.” nghû yín yu é nghut lhê.
“Nyhit Nyí” Nyhit Xê Dá É Hkyô
20Ngò gi, dáng nyo nyì, kyûdûng nyì mù, ngá é yubàk mara eq ngá é Isira-elaq byu pê é yubàk mara yín yu nyì luî, Yhâng é chyoiyúng bum é matú, Ngá é Garai Gasang nghut é, haû Yhûmsîng Garai lé dûng tôngbán nyi é u, 21gè gè yhang, Ngò kyû ru dûng nyi ashî le, hí lhê é shing-rán má ngò myang é byù, Gabri-elaq gi, myínhtang lhê é hkungga nhong é ahkyíng má, ngá chyáng hân za dâng lé lo ri. 22Yhang gi, ngo lé mhoq kyo mù, “Dani-elaq ê, ahkuî, ngò gi, nang lé, hpàqchyî byéng-yá eq sê gyô é u-nuq byi râ matú jé lé é nghut lhê. 23Nàng kyûdûng hî eq, nang lé gyo byî é dang htoq bê nghut mù, ngò gi, nang lé dang haû taî kyo râ matú jé lé é nghut lhê; hkâsu mù gâ le, nàng gi, gyai yhang chyitdàp é hui sû nghut ri. Haû mù, dang haú lé myìt tû wú luî, shing-rán hau é lichyúm lé sê gyo aq.
24Târâ lu laî é hkyô lhoqpán mù, yubàk mara lé lhoqhtûm pyám râ matú le, agè ashop hkyo é matú hkô lhik hkungga nhông byi mù, ahtum abyùq é díngmán hkyô lé lhoqháng râ matú le, shing-rán eq myìqhtoi dang lé dizìk tap pyám mù, Chyoiyúng Htâng é Jowò lé namngón xû bùt byi râ matú le, náng é byu pé eq náng é chyoiyúng wà mó é matú ‘nyhit nyí’#9:24 Nyhit nyí gâ é gi, nyhit zân lé taí nau é nghut ri. nyhit xê dá tû ge to byi bê nghut ri.
25Nàng gi, shí hkyô lé sé mù, sê gyô to ra râ nghut lhê; haû Yerusalem wà mó lé dum wó saî xuq râ nghut é dang htoq é hkûn mai, ùp sû nghut é namngón xû bùt hui Sû jé lé é hkûn jé shoq gi, ‘nyhit nyí’ nyhit dá eq ‘nyhit nyí’ hkyuq xe í dá myáng râ nghut lhê. Wà hkyô pé eq gadùk pé lé gi, wuîhke jamjau huî é ahkyíng má saí kôrâ nghut lhê. 26Haû ‘nyhit nyí’ hkyuq xe í dá laî é htâng má, Namngón xû bùt hui Sû gi, sat pyâm é hui mù, yhang eq sêng é haî le a jòq dùt byùq râ nghut lhê. Nyi lé lô râ nghut é zau hpô é byu pé gi, wà mó haû eq sân-yúng jowò lé lhoqhtên pyám kôrâ nghut mù, hau é jihtûm gi, wuìwúm su jé râ nghut lhê. Jihtûm jé shoq majan jòq nyì râ nghut mù, chamchyuîyuì dùt byùq râ nghut lhê. 27Zau hpó haû gi, ‘nyhit nyí’ radá má byù myo myo eq dangshikaq to râ nghut lhê. Yhang gi, ‘nyhit nyí’ hau é gung gûng nyí má, shigu hkungga eq kyô zo hkungga nhông byî é hkyô lé hkûm pyám râ nghut lhê. Yhang gi, htûm byùq râ matú hkyô tô é hkunmó, yhâng chyáng dìk byùq é hkûn jé shoq, haû lhoqhten lhoqhpyoq é achaq achyut hkyô lé noqkuq yhûm má shap to râ nghut lhê.” ga taî ri.
Currently Selected:
Dani-elaq 9: znot
Highlight
Share
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.
