Dani-elaq 4
4
Sikgâm Lé Nebuhkatneza Yhupmòq Myang É Hkyô
1Ngò, Hkóhkâm Nebuhkatneza gi,
myìdàm htoq má nyi é byù myû wuì eq myíng gótû tû mu é byu pé lé dang kyô kat lhê.
Núngmòq nyì ngón yùqyò hkyô agùn agó wó kó sháng gàq!
2Ngò gi, núngmòq lé, ngá chyáng haû Myhang Htáng Garai Gasang kut shit é làklaí alhô agàn pé eq maúhpo múzó pé gyai yhang taî kyó nau nyi ri.
3Yhâng é làklaí alhô agàn pé gi, hkâ-í yhang kô hkìk mù,
Yhâng é maúhpo múzó pé gi, hkâ-í yhang hpungwup a-tsam bo ri nhung!
Yhâng é mîngdán gi, ahtum abyùq é mîngdán nghut ri;
Yhâng é ùphkâng hkyô gi, pyàt pyàt zaí zaí gingtîng nyi ri.
4Ngò, Nebuhkatneza gi, ngá é hkóhkâm wâng mâ é yhûm má nhik dìk nyì ngón yùqyo nyi é hkûn, 5ngo lé gyùq nhang é yhupmòq myang ri. Ngò yhuphpyang má lèq tô é hkûn, ngá é myìt má htoq lo é alhô pé eq shing-rán pé gi, ngo lé gyùq dàn nhang ri. 6Haû mù, ngò gi, Babelon mâ é hpàqchyî bò bang bànshoq lé, ngá é hí má shuî lé mù, ngá é matú yhupmòq é lichyúm hpuq byi râ matú, hkunmó hkyô é nghut lhê. 7Myòqnghop hpàqchyî kut bang, lòng kat bang, mauhkûng hkyô sê wú bang eq bùt hpyit é bang jé lé kô é hkûn, ngò gi, yhángmòq lé yhupmòq taî kyô kôlhang, yhángmòq gi, ngá é matú hau é lichyúm lé a wó hpuq kyo kó nghut ri. 8Ló htáng má, Dani-elaq gi, ngá é hí má lé jé é nghut mù, ngò gi, yhang lé yhupmòq haû taî kyô é nghut lhê. Yhâng é myìng gi, ngá é hparà é myìng má cháng luî, Beliteshaza nghû myhîng é nghut lhê; chyoiyúng hparà pê é sô gi, yhâng chyáng byíng nyi ri.
9Ngò gi, yhang lé, “Myòqnghop hpàqchyî kut bâng é zau, Beliteshaza ê, chyoiyúng hparà pê é sô gi, náng chyáng byíng nyi é lé, nghop tô é hkyô haî le, náng é matú lûm wui râ a nghut é lé le, ngò sê lhê. Ngá é yhupmòq gi, shî su nghut lhê; ngá é matú hau é lichyúm hpuq byi aq. 10Ngò, yhuphpyang má lèq tô é u myang é shing-rán pé gi, shí dông nghut lhê; ngò wú nyi le, ngá é hí, myìdàm htoq agùng má gyaí myhang é sikgâm ragàm yùq tô é myang ri. 11Sikgâm haû gi, kô myhang lò mù, htan lò luî, a-nyùq mauhkûng htung bê nghut mù, myìdàm htoq htáng shoq mai lháng haú lé wó myâng bê nghut ri. 12Sikhaq pé gi, gyai yúng luî, hau é ashi gi, agùn agó zui mù, lhúnglháng bâng é matú zoshuq dùt bê nghut ri. Tân jung yòsô zè pé gi, hau é buìshûm ô má myang nyì kômù, nghoqzô pé gi, hau é akoq pé má myang nyi akô nghut ri; kângsoq dui é bànshoq gi, sikgâm haú mai zoshuq wó bum akô nghut ri.
13Ngò yhuphpyang má lèq tô é u myang é shing-rán pé má, ngò wú nyi le, mauhkûng mai gyó lé é, lagyo nghut é chyoiyúng sû, ngá é hí má nyi tô é lé myang ri. 14Yhang gi, htê mó èq, ‘Sikgâm haú lé htuq pyám mù, hau é akoq pé lé kyik pyám keq; hau é ahaq pé lé shang pyám mù, hau é ashi pé lé lhoqmyhîn pyám keq. Shigu gaunyhaú pé gi, sikgâm ô mai hpâng kó sháng gàq; nghoq pé gi, sikkoq pé mai hpang ló kó sháng gàq. 15Nghut kôlhang, sikngùt eq hau é sikmyìt pé gi, jòqtoq eq gyî èq tuî to gù, pá mâ é mhan yô nghut é, myigùng má myìt gyó to sháng gàq.
Yhang gi, mauhkûng mâ é nghan èq teq sháng gàq; yhang gi, myìdàm htoq mâ é mhan pé lé zô é gaunyhaû pé eq rahá nyì sháng gàq. 16Yhang gi, byù myit byùq byùq mù, gaunyhaú myìt bo byùq sháng gàq; yhâng chyáng haú dông nyhit zân lai sháng gàq.
17Hkâsu mù gâ le, myìt hpyit to bê hkyô haú lé, wú zúng bang sang kyô é nghut mù, hkunmó haú lé, chyoiyúng bang taî pyo kyô é nghut ri; haû gi, Myhang Htáng Sû, myìdàm htoq mâ é mîngdán bànshoq lé ùp é hkyô lé le, Yhang byí nau é sû lé byî é hkyô lé le, mâyû byu pé lé lhoqtoq yû mù, yhángmòq lé ùp nhang é hkyô lé le, kângsoq duì mîduî wó sé râ matú nghut ri.’ ga wùt garû taî ri.
18Ngò, Hkóhkâm Nebuhkatneza gi, yhupmòq haú lé myang é nghut lhê. Ahkuî, nàng Beliteshaza ê, hau é lichyúm lé hpuq kyo aq. Hkâsu mù gâ le, ngá é mîngdán mâ é hpàqchyî bò bang ó yùq le, ngá é matú hau é lichyúm lé a wó hpuq byi kó nghut ri. Nghut kôlhang, chyoiyúng hparà pê é sô gi, náng chyáng byíng nyi é yánmai, nàng wó hpuq kyô lhê.” nghû taî kyô é nghut lhê.
Dani-elaq Yhupmòq Lichyúm Hpuq Kyô É Hkyô
19Haú hkûn, Beliteshaza le gâ é Dani-elaq gi, razùp zo gyô nhúngnhâng byùq mù, myìt gyùq maú byùq bê nghut ri. Haû mù, hkóhkâm hpó gi, “Beliteshaza ê, yhupmòq eq hau é lichyûm é yánmai, hkâgyùq dàn.” ga taî ri.
Beliteshaza gi, “Ngá é yhûmsîng ê, yhupmòq gi, nang lé a naù a wom bâng chyáng jé mù, hau é lichyúm gi, náng é gye pê chyáng jé sháng gàq! 20Yhupmòq má náng é sikgâm haû kô myhang lò mù, htan lò luî, a-nyùq mauhkûng htung bê nghut mù, myìdàm htoq htáng shoq mai lháng wó myang é, 21sikhaq gyai yúng luî, ashi agùn agó zui mù, lhúnglháng bâng é matú zoshuq dùt luî, buìshûm ô má tân jung yòsô zè pé nyì mù, hau é akoq pé má nghoqzô é sut saî nyi é sikgâm gi, 22nàng hkóhkâm yhang nghut ri! Nàng gi, kô myhang lò mù, wum htân bê nghut ri; náng é kô làm hkyô gi, mauhkûng htung shoq lháng hu bê nghut mù, nàng ùp é hkyô gi, myìdàm htoq htáng shoq lháng jé bê nghut ri.
23Nàng hkóhkâm gi, lagyo nghu é chyoiyúng sû rayùq mauhkûng mai gyó lé lo é lé myang ri; yhang gi, ‘Sikgâm haú lé htuq lheng mù, lhoqhtên pyám keq; nghut kôlhang, sikngùt lé myhit to mù, myigùng má sikmyìt jòq gyó tô ashî u, mhan nú yô má jòqtoq eq gyî èq tuî to keq. Yhang gi, mauhkûng mâ é nghân teq sháng gàq; yhang gi, yhâng chyáng nyhit zân laî byùq shoq, gaunyhaû pé eq rahá nyì sháng gàq.’ ga taî é lé nàng wó gyó ri.
24Hkóhkâm ê, hau é lichyúm gi, shí dông nghut ri; haû gi, Myang Htáng Sû mai ngá yhûmsîng hkóhkâm nang lé jéyáng râ hkunmó nghut ri. 25Nàng gi, byu pê chyáng mai lhoqhtoq pyâm é hui mù, tân jung yòsô zè pé eq rahá nyi byùq luî, nohtó pé su mhan zo mù, mauhkûng mai gyó é nghân teq râ nghut lhê. Haû Myhang Htáng Sû gi, myìdàm htoq mâ é mîngdán bànshoq lé ùp mù, Yhang byí nau é sû lé byî é hkyô lé, nàng wó sê é hkûn jé shoq, náng chyáng nyhit zân laî byùq râ nghut lhê. 26Sikngùt lé a-myìt eq roq myhit to aq gâ é hkunmó gi, Mauhkûng ùp nyi é lé nàng sê é hkûn, náng é mîngdán gi, náng é lòq má dum jé râ nghut é hkyô lé taî é nghut ri. 27Haû mù, hkóhkâm ê, ngò hpàqchyî byî é hkyô lé myìt nguì tung hàp yù laq; náng é yubàk mara lé tô pyám mù, jo têng é hkyô lé kut àq; náng é agè ashop hkyô lé tô pyám mù, zìk zô é hui bang lé shogyô yù àq. Haû jáng, nàng gi, xoq luî nyì ngón yùqyò hkyô wó nyî âbe.” ga tû taî ri.
Yhupmòq Dìk Byùq É Hkyô
28Haú hkyô bànshoq gi, Hkóhkâm Nebuhkatneza chyáng dùt htoq bê nghut ri. 29Lha-mó raxe í hkyap lai jáng, hkóhkâm gi, Babelon hkóhkâm wâng mâ é yhûmhkûng htoq má so uchyang, 30“Wà shî gi, ngá é wà chyûng nghut nyi luî, ngá é kô làm hkìkhkam hkyô hu râ matú, ngá é hpungwup a-tsam mó èq xuq tô é, kô hkìk é Babelon wà mó nghut lhê, a nghut lhí?” ga taî ri.
31Dang haú lé hkóhkâm ru taî nyi ashi lé lháng, mauhkûng mai htê htoq lo é gi, “Hkóhkâm Nebuhkatneza ê, náng é matú hkyô é hkunmó gi, shî su nghut lhê; náng chyáng mai nàng ùp é ahkáng ayá lé yu pyám byi bê nghut lhê. 32Nàng gi, byu pê chyáng mai lhoqhtoq pyâm é hui mù, tân jung yòsô zè pé eq rahá nyì byùq luî, nohtó pé su mhan zo râ nghut lhê. Haû Myhang Htáng Sû gi, myìdàm htoq mâ é mîngdán bànshoq lé ùp mù, Yhang byí nau é sû lé byî é hkyô lé, nàng wó sê é hkûn jé shoq, náng chyáng nyhit zân laî byùq râ nghut lhê.” gâ ri.
33Nebuhkatneza eq sêng é dang ban taí eq yhang, dang haû dìk bê nghut ri. Yhang gi, byu pê chyáng mai lhoqhtoq pyâm é hui mù, nohtó su mhan zo bê nghut ri. Yhâng é uxâm gi, zun é sho-maú su yùq hîng mù, yhâng é lòqsing gi, nghoq hkyîsing su yùq hing é hkûn jé shoq, yhâng é gùngdu gi, mauhkûng mâ é nghân teq nyi ri.
34Ahkyíng yàm-yòq haû byíng jáng, ngò, Nebuhkatneza gi, mauhkûng shut tu wú mù, ngá é i-myìt gyîng byùq bê nghut ri. Haû mù, ngò gi, Myhang Htáng Sû lé hkya-on kúngtôn bê nghut lhê; ngò gi, haû ahtum abyùq dui nyì sû lé hkúngga hpautap mù, hpungwup bò nhâng bê nghut lhê.
Yhâng é ùphkâng hkyô gi, ahtum abyùq é ùphkâng hkyô nghut ri;
Yhâng é mîngdán gi, pyàt pyàt zaí zaí gingtîng nyi ri.
35Myìdàm htoq mâ é byù bànshoq gi,
haî le a nghut é chyat dùt byùq ri.
Mauhkûng mâ é bang ajùm ayo é ahtoq má le,
myìdàm htoq mâ é byu pê é ahtoq má le,
Yhang kut nau é eq rajung za kut é nghut mù,
ó yùq le, Yhâng é lòq lé wó hkûm zing pyâm é a nghut;
“Nàng haî kut lhê lhú?” ga Yhang lé wó taî é le a nyì.
36Hau ahkyíng má, ngá é i-myìt gi, hí lhê su dum gyîng byùq mù, ngá é mîngdán é hpungwup shingkâng é matú, ngá é xânghpoq nge wó hkyô eq hkìkhkâm hkyô gi, hí lhê su dum dùt byùq bê nghut ri. Ngá é hpàqchyî byi bang eq xânghpoq nge wó bang gi, ngo lé ho bum akô; Ngò gi, ngá é hkóhkâm tángmyhâng má dum lhoqtoq é hui mù, hí lhê htoq lháng je hkìk bê nghut lhê. 37Ahkuî, ngò, Nebuhkatneza gi, mauhkûng mâ é Hkóhkâm lé hkya-on wàq toq mù, hkúngga hpautap é nghut lhê; haî mù gâ le, Yhang kut é lhúnglháng gi, jo têng é nghut mù, Yhâng é hkyô bànshoq gi, târâ ràp-rá é nghut ri. Yhang gi, nghutbûn é dông so bang lé wó lhoq nyhum pyâm é nghut ri.
Currently Selected:
Dani-elaq 4: znot
Highlight
Share
Compare
Copy
Want to have your highlights saved across all your devices? Sign up or sign in
© 2025, Wycliffe Bible Translators, Inc.
