Lagyo 9

Sholuq Lhik Wang Lo É Hkyô

1Haú u lé, Sholuq kúm gi, Yhûmsing é chángzô pé lé hkat kyuq nha râ eq sat pyám râ ga, nhikmó-yô nyi é nghut mù luî, hkyangjong mó chyáng ê mù, 2Yhûmsing é Hkyô lé lùmjíng é myiwe yùqgè myàng mî‑myàng lé chyup yû luî, Yerusalem wà mó shut wó she ló râ matú, Damasikuq wà mó mâ é târâjong pé má byi râ laiká pé lé dûng chung ri. 3Yhang e ló le, Damasikuq wà mó eq chyâng ló nyi é hkûn, yhâng é lhînghkyùq má mauhkûng mai dàn lòq tung dùq bó htoq lo ri. 4Yhang myigùng má lêng ngòp tô é u lé, “Sholuq, Sholuq, nàng ngo lé haî mù zing-rî nyi lhê lhú?” ga luî, yhang lé taî é htê wó gyô ri.

5Haú hkûn, yhang gi, “Yhûmsîng ê, nàng gi, ó yùq nghut lhê lhú?” ga myi jáng, haû Yhûmsîng gi, “Nàng zing-rî nyi é Yesuq nghut lhê, 6toq àq, wà mó shut wang ló aq. Nàng zui saí râ hkyô lé lhom taî kyo râ nghut lhê.” ga tû taî ri.

7Yhang eq rahá e ló é luzúm wuî gi, htê haû wó gyo kôlhang, ó yùq lé le a myàng kô é yánmai, maú hong yàp tô bum akô. 8Sholuq toq mù, myòq hpông kat wú le, haî lé le a myàng dùt byùq mù luî, yhángmòq gi, yhang lé lòq mai shê mù Damasikuq wà mó shut shuî wang ló akô. 9Sholuq gi, sum nyí yhang myòqjìt byùq mù luî, a zo a shuq é nyi byùq ri.

10Damasikuq wà mó má Anani gâ é chángzo rayùq nyi ri. Yhûmsîng gi, yhang lé, “Anani ê.” ga shing-rán dông wùt ri.

Yhang gi, “Yhûmsîng ê, shî má nyi lhê.” ga tû taî ri.

11Haû Yhûmsîng dum taî é gi, “Toq àq, Hkyô-Nyàng gâ é wà hkyô shut ê mù, Yudaq é yhûm má, Tashu byù Sholuq lé ê hô àq, yhang gi, kyûdûng nyi ri. 12Yhang gi, Anani ga sû wang lé lô mù, yhâng é myòq dum myàng sháng gàq ga, yhâng é ahtoq má lòq ke byî é lé, shing-rán dông myàng bê nghut ri.” gâ ri.

13Anani kúm gi, “Yhûmsîng ê, shí yùq gi, Yerusalem wà mó má, náng é sân-yúng bang lé a ge é dông hkâ-myhó kut laî lo é hkyanglù lé ngò myo myo wó gyô wú bê; 14Shí pé má le, náng é myìng lé lâng é bang bànshoq lé chyup râ ga, hkyangjong agyi pê chyáng mâ é ahko ahkáng wó yu to sû nghut ri.” ga tû taî ri.

15Nghut kôlhang, Yhûmsîng gi, “Ru ê àq, shí yùq gi, tûngbaù pé eq yhángmòq é hkóhkam pê é hí má le, Isira-elaq byu pê é hí má le, ngá é myìng lé wùn wàq râ matú, ngò chûng râ nghû luî hkyin to sû nghut lhê; 16Ngá mying é yánmai hkâ-í hpuzo râ hkyô lé, Ngò, yhang lé tûn shit râ nghut lhê.” ga taî ri.

17Hau htâng, Anani gi, jé ê mù, yhûm haú má wàng luî, Sholuq é ahtoq má lòq kê to mù, “Gu-mang Sholuq ê, náng myòq dum wó myàng mù, Chyoiyúng Sô byíng sháng gàq ga, nàng lé lo é hkyô má, nang lé htoq shit é Yhûmsîng Yesuq èq ngo lé nhang kat é nghut lhê.” ga taî ri. 18Haú hkûn jáng, Sholuq é myòq mai a-kyap sû é wuí gyó byùq mù, yhang myòq dum wó myâng bê. Haú hkûn, yhang gi, toq mù wuìmyhup hkâm yù luî, 19zoshuq le zo mù, wum-o dum lhoqpyîng yù bê nghut ri.

Sholuq, Damasikuq Wà Mó Má Mungdang Hko É Hkyô

Hau htâng, yhang gi, Damasikuq wà mó mâ é chángzô pé eq rahá rayòq zo zùm yàp nyì uchyang, 20Yesuq gi, Garai Gasâng é Yhangzo nghut é hkyô, haú hkûn jáng târâjong pé má hko kyô nyì bê nghut ri. 21Sholuq é dang lé wó gyô é lhúnglhâng bang gi, maú byùq bùm kômù, “Shí yùq gi, Yerusalem wà mó má myìng haû lâng é bang lé lhoqhten lhoqhpyoq sû nghut lhê, a nghut kó lhú? Ahkuî, shî má le, haû sû é bang lé chyup yû mù, hkyangjong agyi pê chyáng ló àp râ da luî jé lé é sû a nghut kó lhú?” ga myî bum akô. 22Sholuq kúm gi, a-tsam je bo lò mù, Damasikuq wà mó má nyi é Yudaq byu pé lé taî hpyi kyo luî, Yesuq gi, Hkrisidùq yhang nghut nyi é hkyô lé sàksé tûn shit ri.

23Buìnyì tsómra myáng é htâng má, Yudaq byu pé gi, yhang lé sat pyám râ matú haq htung akô. 24Nghut kôlhang, yhángmòq haq htung é hkyô lé Sholuq sê pyâm ri. Yhángmòq gi, yhang lé wó sat pyám shoq ga, nyí lé myín lé wà mó hkum pé má lhom nyi akô. 25Sholuq é chángzô pé kúm gi, myín má yhang lé shuî yù mù, mhanghkoq má lúng nhâng luî, wàhkûm mai lhoqnyhum hkyô kat akô nghut ri.

Sholuq, Yerusalem Wà Mó Má Taû Jé Lo É Hkyô

26Hau htâng, yhang gi, Yerusalem wà mó má jé lo é hkûn, chángzô pé eq zùm yàp râ matú shi-kùt wú kôlhang, yhang gi, chángzo dùt bê hkyô lé a jíng kô é yánmai, lhúnglhâng bang gi, yhang lé gyùq bum akô. 27Baranaba kúm gi, Sholuq lé lagyô pê chyáng shuî lò mù, Sholuq, hkyô má Yesuq eq hkâsu kut huî é hkyô lé le, Yesuq èq yhang lé taî é dang wó gyô é hkyô lé le, Damasikuq wà mó má Yesuq é myìng mai gyùq myìt a bo é za hkâsu kut hko kyô é hkyô lé le, yhángmòq lé taî kyô ri. 28Haû mù, Sholuq gi, yhángmòq eq rahá Yerusalem wà mó má htoq htoq wàng wàng kut nyî uchyang, Yhûmsing é myìng mai a gyùq a kyum é za hko kyô nyi ri. 29Grik dang nyo é Yudaq byu pé eq le, taî he lhûm nyi akô; nghut kôlhang, yhángmòq gi, yhang lé sat pyám râ haq htung akô. 30Haú hkyô lé, gu-mang wuì sé kôjáng, yhang lé Kesare wà mó má jé shoq dé mù, Tashu wà mó shut nhang kat akô nghut ri.

31Yuda mau, Galile mau eq Samariq mau jowò hkangmó mâ é noqkuq hpúng gi, haú yòq pé má, lhoqging lhoqtîng é hkyô wó yû mù, nguì ngón nyi akô; haû Yhûmsîng lé gyùq hkúnggâ é hkyô má le, Chyoiyúng So èq lhoqpun lhoqkyîng é hkyô pé má le châng nyì mù, myô jàt lo bùm bekô nghut ri.

Aine‑a Ge Byùq É Hkyô

32Haú hkûn, Petiruq gi, haú mau pé má hkat kûm wún uchyang, Ludaq wà mó má nyi é sân-yúng bâng chyáng ê jé ri. 33Haú wà má, gùngjum shî luî shit zân yhang yhupjang mai a wó toq é Aine‑a gâ é byù rayùq lé ê myang ri. 34Haû mù, Petiruq gi, “Aine‑a ê, Yesuq Hkrisidùq, nang lé lhoqgê byi bê nghut ri, toq mù, náng é yhuphpú hen yù àq.” ga luî, yhang lé taî ri. Haú hkûn jáng, Aine‑a wó toq yàp bê nghut ri. 35Ludaq eq Sharon pá má nyi é lhúnglhâng bang gi, haú yùq lé myàng mù luî, Yhûmsîng Yesuq chyáng lhing wang lo bum akô.

Dorika Ga Sû Dum Dui Lo É Hkyô

36Ahkuî, Yopa wà mó má Tabihta gâ é chángzo myiwe rayùq nyi ri; myìng haû lé Grik dang dông gi, Dorika#9:36 Dorika gâ é gi, chochî gâ é lichyúm nghut lhê. gâ é nghut lhê. Myiwe haû gi, ge é múzó kut nyi é sû eq, asho awuî é bang lé alû byî nyi é sû nghut ri. 37Haú u lé, yhang gi, nòhpyo hui mù shi ló bê nghut ri. Yhâng màng lé gi, chi mù luî ahtoq wàp má jáng tô akô. 38Ludaq wà mó gi, Yopa wà mó eq chyâng é yánmai, haú wà mó má Petiruq nyi é lé chángzô pé wó gyo kôjáng, yhángmòq gi, byù í yùq lé nhang kat mù, “Ngá-mòq chyáng myàp lé lô àq.” ga jì nhang kat akô.

39Haú hkûn, Petiruq gi, toq mù, haú nhik htâng châng e ló ri. Yhang jé jáng, ahtoq pyâm wàp má shuî hâng yu akô. Chuimó myhî pé lhúnglhâng bang gi, yhâng nàm má yàp mù ngaù uchyang, yhángmòq eq rahá nyi tô ashî hkûn Dorika hkyup é buhîng eq gótû mèbu pé lé tûn shit nyi akô.

40Petiruq kúm gi, lhúnglhâng bang lé htoq ló nhâng mù, hkyîhput htuq luî, kyûdung mù, màng shut lhing wú luî, “Tabihta ê, toq àq!” ga taî ri, haú hkûn myiwe haû myòq hpông lô mù, Petiruq lé myàng jáng, toq zung lo ri. 41Petiruq gi, lòq lhâm kat mù yhang lé lâng toq yù luî, lùmjíng bang eq chuimó myhî pé lé wùt yù mù, duì gû àp byî ri. 42Haú hkyô lé, Yopa wà mó mâ é bang bànshoq wó gyô ló kômù luî, byù myo myo gi, haû Yhûmsîng Yesuq lé lùmjíng bum akô nghut ri. 43Haû mù, Petiruq gi, sho-kuq lòqmú saî é Simun ga sû eq rahá, Yopa wà mó má rayòq zo nyi nyi ri.

Currently Selected:

Lagyo 9: znot

Highlight

Copy