Lagyo 27

Poluq, Romaq Wà Mó Shut Wuìsanghpo Mai E Ló É Hkyô

1Ahkuî, ngá-mòq lé Itali ming shut wuìsanghpo mai gû dàp ló nhâng râ matú myìt hpyit to kôluî, yhángmòq gi, Poluq eq htóngbyû góbang ra-am lé, Augustuq Hkósêng é gyèwap mó mâ é, Yuli‑u gâ é shô ùp gyèzaû é lòq má àp byî kat akô. 2Haú hkûn, Asi-a mau mâ é wuimau gin-gau cháng luî wà pé má wang jón ló é, Adiramuti wà mó mai toq é wuìsanghpo má ngá-mòq wang ji bê nghut lhê. Htesaloni wà mó mâ é Arisitakuq gâ é Makedoni byù rayùq le ngá-mòq eq rahá nghut lhê.

3Htang nyí, ngá-mòq gi, Sidon wà mó má no bê nghut lhê. Yuli‑u gi, Poluq lé shogyo mù, yhâng chyáng râ é hkyô lé yhâng é buìnùm wuì mai lhom lajang byi kó sháng gàq ga, yhángmòq eq ê hui râ matú ahkáng byî kat ri. 4Haû mai dum toq ló é hkûn, laì tau mùt é yánmai, Kupru zinlóng lé laì hkaû uchyang jî laî ló mù, 5Kiliki eq Pamhpuli mau mâ é wuimau dông laî byìt ló le, Laiki mau mâ é Mura wà mó má jé bê nghut lhê. 6Haû má, shô ùp gyèzau hpó gi, Itali ming shut dàp e ló é, Alesandri-a wà mó mâ é wuìsanghpo lé myang záng luî, ngá-mòq lé haú má ji nhâng bê nghut ri. 7Haû mai buìnyì myo myo yhó yhó lé za jî e ló luî, awui ahke yhang Kidu wà mó eq ang má wó jé ló jáng, laì tau mùt é yánmai, hí shut a wó laî ló lo mù, ngá-mòq gi, laì lé cháng luî, Kireti zinlóng lé laì hkaû mù, Salamone kong zô é tû-tap âng é mai laî ló é nghut lhê. 8Haû mâ é wuì yàm mai awui ahke jî ló lé, Lase‑a wà eq a wê lhûm é Yùqyo é Guhkan gâ é jowò má jé ri.

9Ahkuî, buìnyì tsómra lhoqlhaî pyám luî, haû Zoshuq túm poî lai bê nghut é yánmai, wuìsanghpo mai sô wún le gi, gyùq chiq râ nám jé bê nghut ri. Haû mù, yhángmòq lé Poluq taî pun taî kyîng é gi, 10“Âhkaû pé ê, shí dam lhê é wuì hkyô gi, wuîhke mó hui luî, wuìsanghpo eq zè pé sûm pyám râ htoq agó, ngá-nhûng é chyungxe lháng sum râ dùt é hkyô lé, ngò byu myang ri.” gâ ri. 11Nghut kôlhang, shô ùp gyèzau hpó gi, Poluq é dang lé gyo râ malaî, wuìsanghpo hkâng sû eq wuìsanghpo yhûmsing é dang lé, je lum ri. 12Guhkan haû gi, gyòqmyò#27:12 Gyòqmyò lé, haú mau má laìdun mó lò lò dùt mù, yông wún le gyùq chiq nám nghut lhê. wó lhoqlhai râ su a dùt é yánmai, myo hpyang gi, Hponik guhkan má wó jé le jé mù, haú má gyòqmyò ló nyi lhai râ matú chôm myìt huî akô. Guhkan haû gi, Kireti zinlóng má maupyî buìwàng hkyam eq mautsûng buìwàng hkyam shut hu tô é jowò nghut ri.

Wuimau Má, Laìdun Mó Htûng Huî É Hkyô

13Maupyî shut mâ é laì yhó le hik lô jáng, yhángmòq myìt tô é má hkyak nghut bê su ngam pyám kôluî, shâmtoq gòknghe lé lhoqtoq yû kômù, Kireti zinlóng yâm dông jî e ló bê nghut lhê. 14Nghut kôlhang, hkâ-myháng a myáng má, Buìhtoq mautsûng laì gâ é laìdun mó gi, haû zinlóng mai mùt lò luî, 15wuìsanghpo lé lo mùt htûng é yánmai, hí shut a wó ló lo jáng, ngá-mòq gi, laì mùt ló é shut châng yông ló bê nghut lhê. 16Ngá-mòq gi, Koda gâ é zinlóng zo lé laì hkaû uchyang yông ló nyi é hkûn, haû sakhkyîlhaî lé gyai shi-kùt é èq wó lâng yù luî, 17wuìsanghpo ahtoq má lâng toq to bê. Wuìsanghpo lé gi, a byòq loshoq tuî èq tuî kîng to bê nghut lhê. Dum, yhángmòq gi, Suriti gâ é se-muî bùm má ló kê gyam to râ lé chiq kô é yánmai, wuìsanghpo mâ é pánlong pé lé lhoqnyhum hkyô yù mù, châng yông ló bekô nghut ri. 18Laìdun mó lûm htan é yánmai, htang nyí yhángmòq gi, wuìloq zê pé lé hkyom dú hkyô pyám bekô nghut ri. 19Sum nyí nghu é nyí má, yhángmòq gi, wuìsanghpo zè pé lé yhûmsing é lòq èq yhang hkyô pyám bekô. 20Buìnyì myáng myáng, buì lé le, kyî pé lé le a myàng é eq, laìdun mó za ru mut nyi é yánmai, wó lùt râ nghû myìt myòqbyu tô é hkyô lé, ngá-mòq tô pyám bê nghut lhê.

21Yhángmòq zoshuq a zô é, buìnyì tsómra myáng lô bê nghut mù luî, Poluq gi, yhángmòq é gung gûng má yàp to mù, “Âhkaû pé ê, núngmòq ngá é dang gyo luî, Kireti zinlóng mai a htoq ló é nghut le gi, shî su htên byòq é maròp hui zo râ a nghut. 22Ahkuî nghut kôlhang, ngò taî é dang lé gyô yù mù myìt wum yù keq; núngmòq mâ é hká yùq le chyungxe sum râ a nghut, wuìsanghpo za shèq htên byòq byùq râ nghut lhê. 23Hkâsu mù gâ le, ngo lé sing é, ngò dójaú nyi é Garai Gasâng é maumang lagyo rayùq, a-màn ngá é nàm má lé yàp to mù, ngo lé taî é gi, 24‘Poluq ê, hkâgyùq, Kehtaq é hí má nàng wó yàp râ nghut lhê. Wuìsanghpo shî má nàng eq rahá jî tô é lhúnglhâng bâng é chyungxe lé, Garai Gasang gi, náng é yánmai, laí laí byi râ nghut lhê.’ gâ ri. 25Hau é yánmai, âhkaû pé ê, myìt wum yù keq, ngo lé taî kyô é eq rajung za dùt lò râ nghut lhê nghû luî, Garai Gasang lé ngò lùmjíng nyi lhê. 26Nghut kôlhang, ngá-nhúng gi, zinlóng ralhum lhum má ló htûng chyap to râ nghut lhê.” ga luî, yhángmòq lé i‑myìt taî tîng ri.

27Buìnyì raxe myi nyí myín má, gùnggàm yòq lé, ngá-mòq gi, Adiri‑a wuimau má yông lhing wún é hkûn, sanghpo hkâng bang gi, dùng yàm eq chyâng lo nyi é su gâ é lé sê gyô kat akô. 28Haû su mù, wuì nìk é lé kê wú lé, lòqlàm í xê kô nìk é lé wó sê akô. Razùp zo má dum kê wú le, lòqlàm raxe ngò kô za nìk é lé myang akô nghut ri. 29Haû mù luî, lùqmó má ló záng htung râ lé chiq kômù, yhángmòq gi, wuìsanghpo htâng shut mâ é shâmtoq gòknghe myî lhum lé lhoqhkyô kat luî, mau hân bó sháng gàq ga kyûdûng nyi bum akô nghut ri. 30Wuìsanghpo hkâng bang gi, wuìsanghpo lé tô pyâm to luî hpâng râ haq htung é myìt eq, wuìsanghpo u shut mâ é shâmtoq gòknghe pé lé lhoqhkyó râ su kut mhaú luî, sakhkyîlhaî lé wuì má lhoqhkyô nyi bum akô. 31Haû mù, Poluq gi, shô ùp gyèzau eq gyèzô pé lé, “Shí bang wuìsanghpo má a nyi le gi, núngmòq wó lùt râ a nghut.” ga taî ri. 32Haú hkûn, gyèzô pé gi, sakhkyîlhaî lé tuî tô é tui lé zân hpyit kat kôluî, sakhkyîlhaî gi, byìt gyó byùq bê nghut ri.

33Maubó lô jáng, Poluq gi, yhángmòq bànshoq bang lé zang zo râ matú myìt wum byî é gi, “Núngmòq gi, myìt chiq luî, zoshuq haî le a zô é, hkû-nyí raxe myi nyí myáng lô bê. 34Haû mù luî, zoshuq rajung jung zo keq! Haû gi, núngmòq wó lùt râ matú nghut lhê. Núngmòq chyáng mâ é ó yùq é xâm rahkat lháng byùq râ a nghut.” gâ ri. 35Haû su ga ban taî é eq, yhang gi, mùk lé yù luî, yhángmòq bànshoq bâng é hí má Garai Gasâng jeju lé hkya-on mù, mùk lé hpé luî, zô hî bê nghut ri. 36Haú hkûn shèq, bànshoq bang gi, myìt wum wó yû kômù, zoshuq zô bùm bekô nghut ri. 37Wuìsanghpo haû mâ é byù lhúnglháng gi, í sho nyhit xe hkyuq yùq nghut lhê. 38Yùq hkangmó bàn zô gyî é htâng má, wuìsanghpo sóm râ matú, súngsô pé lé wuì má dú kat pyâm akô nghut ri.

Wuìsanghpo Htên Gyòp Byùq É Hkyô

39Myòq san za myàng jáng, yhángmòq gi, jowò haû lé a sé kôlhang, se-muî jàng chyûn ralhum lé byu myàng kôluî, wó dùt é nghut jáng, haú má sanghpo lé kôn gyam râ matú chôm dòqdân yu akô nghut ri. 40Haû mù, yhángmòq gi, shâmtoq gòknghe pé lé wuimau má hkyut hkyô pyâm tô akô. Lhaîshap tui lé le hkyut yû luî, wuìsanghpo ulhum mâ é pánlong lé lhoqtoq yû mù, laì hkyô cháng luî wuì yàm shut mùt ló bê nghut ri. 41Nghut kôlhang, se-muî lo bum tô é jowò ralhum má, wuìsanghpo ló htûng chyap byùq luî, sanghpo u gi, a wó duî lo mù, sanghpo htâng lé gi, wuìlheng èq lò bàt hkyop myha pyám bê nghut ri.

42Haú hkûn, gyèzô pé gi, htóngbyu pé wuìli lî hpang byùq kôrâ lé gyùq kô é yánmai, yhángmòq lé sat pyám râ chôm haq htung akô. 43Nghut kôlhang, shô ùp gyèzau hpó gi, Poluq lé hkyi yù naù luî, yhángmòq haq htung é hkyô lé hkûm pyám mù, wuìli dàt li bang gi, wuì má byam gyó luî wuì yàm shut hí lî dàp ló kó sháng ga luî le, 44góbang gi, siklong eq wuìsanghpo mâ é gótû zè pé má zui mù, gû dàp ló sháng ga le, hkunmó hkyô kat ri. Haû dông mai lhúnglhâng bang gi, wuì yàm shut rago wó jé dàp ló bekô nghut ri.

Currently Selected:

Lagyo 27: znot

Highlight

Copy