Lagyo 17

Htesaloni Wà Mó Má Mungdang Hko Kyô É Hkyô

1Hau htâng, yhángmòq gi, Amhpipoli wà mó eq Apoloni-a wà mó mai sô laî ló mù, Htesaloni wà mó má jé akô. Haú wâ má gi, Yudaq byu pê é târâjong ralhum jòq ri. 2Poluq gi, yhang lhaq kut nyi é eq rajung za, târâjong má wàng luî, Bánno Buìnyì sum nyí yhang, Chyúmdang má bo é eq séng mù, yhángmòq eq chôm mîng lhum uchyang, 3Hkrisidùq wuîhke jamjau hui mù, shî bê mai dum dui toq lô râ hkyô lé taî hkoq sân kyo luî, “Núngmòq lé, ngò hko kyô nyi é haû Yesuq gi, Hkrisidùq nghut lhê.” ga taî ri. 4Yudaq byu pé mâ é ra-am gi, gyô jíng kômù, Poluq eq Sila nhik chyáng lé xoq yu akô; haû eq rajung za, Garai Gasang lé hkúnggâ é Grik pé myo myo eq, ahkyàk é myiwe wuì tsómra myo shoq le, gyô jíng kômù, lé xoq yu akô.

5Nghut kôlhang, a gyô jíng é Yudaq byu pé gi, manôn kôluî, gaì mâ é byùgang jùm ra-am lé lung yù mù, byù mòqmó tsîng yù luî, rawa é shuî gabyong kômù, shiwa byu pê é hí má Poluq eq Sila nhik lé wó shuî htoq shit shoq ga, Yason é yhûm má htîm e ló akô. 6Nghut kôlhang, yhángnhik lé a myàng kôjáng, yhángmòq gi, Yason eq gu-mang wuì ra-am lé, yhángmòq é wà sûwún wui chyáng lâng she ê kômù, “Mingkan gón lé a-tau ahû kut é byù shí nhik, ahkuî shî má jé jáng, Yason gi, yhâng é yhûm má lhom hkûlum yu ri. 7Yhángmòq lhúnglhâng bang gi, Yesuq gâ é hkóhkâm góyùq nyi lhê ga kôluî, hkóséng Kehtaq é târâ lé lhoqshai é dông kut é bang nghut akô.” ga taî garû bum akô. 8Shiwa byu pé eq wà sûwún wuî gi, dang haû lé wó gyo kôjáng, myìt wui myìt hke dùt nyi bum akô. 9Hau htâng, yhángmòq gi, manghkáng a lhoqhtoq râ matú Yason eq góbang lé danghtum htûm tô é zè byi nhâng mù, nhang pyám bekô nghut ri.

Bere‑a Wà Mó Bang, Mungdang Lé Lhom Yu É Hkyô

10Haú myîn jáng yhang, gu-mang wuì gi, Poluq eq Sila nhik lé Bere‑a wà mó shut nhang kat akô; yhángnhik gi, haú wà má jé jáng, Yudaq byu pê é târâjong má wang ló akô nghut ri. 11Haû Bere‑a wà mó byu pé gi, Htesaloni wà mó byu pê htoq má je riyhang nhik bo bum akô; haû mù, danglù haû lé gyai ô nau é myìt èq hàp yù mù, danglù shî teng a têng é hkyô lé wó sé shoq ga, nyí wuî Chyúmdang lé chôm nghap wú nyi akô nghut ri. 12Haû mù luî, Yudaq byu pé myo myo gi, lùmjíng bum akô, haû eq rajung za, xânghpoq nge wó é Grik myiwe wuì eq yùqgè wuì myo myo le, lùmjíng bûm bekô nghut ri.

13Poluq gi, Bere‑a wà mó má le, Garai Gasâng é mungdang hko kyô nyi é hkyô lé, Htesaloni wà mó mâ é Yudaq byu pé sé kôjáng, yhángmòq gi, haú má lé kômù, wà byù wuì lé mhoq hpyoq luî, gabyông lò nhang akô. 14Haú hkûn, gu-mang wuì gi, Poluq lé wuimau yàm jé shoq, radá dâm dé kat akô; nghut kôlhang, Sila eq Timohti nhik gi, Bere‑a wà mó má nyi gyó tô akô nghut ri. 15Poluq lé châng dé é bang gi, Ahten wà mó jé shoq lé dé to kômù, Sila eq Timohti nhik lé hân hân châng ló râ matú pying kat é dang lé wun chûng mù, dum taû lò bekô nghut ri.

Poluq, Ahten Wà Mó Má Nyi É U Lhê Hkyô

16Ahkuî, Poluq gi, Ahten wà mó má haú nhik lé láng nyi tô é u lé, haú wâ má rawa é hparà lhô baú dùt tô é lé myàng mù luî, yhâng i-myìt gyai yhang a ngón dùt byùq ri. 17Hau é yánmai, yhang gi, târâjong pé má Yudaq byu pé eq Garai Gasang lé gyùq hkúnggâ é Grik pé eq le, gaì pé má hui mîhui bang eq le, nyí wuî taî sân kyô lhûm nyi akô nghut ri. 18Haû mù luî, Epikuri hpàqchyî eq Sito‑i hpàqchyî#17:18 Epikuri hpàqchyî gi, htang pyàt a jòq, ahkuî ngón yû râ za ahkyàk gâ é nghut lhê. Sito‑i hpàqchyî gi, haî wá dùt kôlhang i‑myìt zim za kut mù, htang pyàt matú chiq a ra gâ é nghut lhê. lé sê é, myìt wú hpàqchyî bo é bang ra-am gi, yhang eq dang chyin chyîn lhûm akô; haú hkûn, yhang gi, Yesuq é hkyô eq dum dui toq hkyo é gabú danglù lé hko kyô é yánmai, ra-am gi, “Byù pyòk shí yùq gi, haî wá taî nyi lhê lhú?” ga; ra-am gi, “Gó-mîng hparà pê é hkyô lé taî kyo sû nghut sam ri.” ga, taî bum akô nghut ri. 19Hau htâng, yhángmòq gi, Aripagu gâ é byìn tú wàp shut Poluq lé shuî dòq ló mù, “Nàng mhoqshit é hkyô asik, ngá-mòq lé sé nhang le a gè lhú? 20Nang èq taî é maú nhô za gâ é hkyô lé ngá-mòq wó gyô ri; hau é dang kyîng lé ngá-mòq sé nau ri.” ga taî bum akô. 21(Ahten byu pé eq haú má nyi é gó-ming byu pé lhúnglhâng bang gi, dang sik lù sik haû lé taî kún gyô kún mù, yhángmòq é ahkyíng lé lhoqpân nyi bum akô nghut ri.)

Poluq, Aripagu Zùphpong Má Mungdang Hko É Hkyô

22Haú u lé, Poluq gi, Aripagu zùphpong má toq yàp mù, “Ahten byu pé ê, núngmòq gi, hkyô hkat hkangmó má hparà lhô pé lé gyai yhang dàt gyùq hkúngga kô é lé, ngò myang ri. 23Hkâsu mù gâ le, ngò sô lhing wún mù núngmòq jaú é zè pé lé rago wú wú le, ‘A sê é Garaî matú,’ ga luî, kâ tô é hkungga gyàp ralhum lé myang záng ri; haû núngmòq a sê é za jaú nyi é Garaî hkyô lé, ngò, núngmòq lé hkaî kyo kôlé.

24Myìdàm htoq eq haú má jòq mîjòq lé hpan tô é Garai Gasang gi, mauhkûng eq myigùng é Yhûmsîng le nghut lhê mù luî, byu lòq èq saî é noqkuq yhûm má nyì râ a nghut. 25Yhang gi, byù lhúnglhâng bang lé chyungxe, soq, ra mîra gúmjùp shoq byî to sû nghut nyi é yánmai, rajung jung râ é sû lé su, byu lòq èq dójaú râ sû a nghut. 26Yhang gi, gùnchyung rayùq mai za byùhú chângjup myô lò nhâng mù, myìdàm htoq jàm shoq má nyì nhâng luî, yhángmòq é matú hí hí mai ahkyíng yàm-yòq eq nyì râ jowò masàt to byi bê nghut ri. 27Yhang gi, ngá-nhúng yùq hkangmó eq a wê to kôle, byu pé yhang lé châng hô mù, myang hô kó sháng gàq ga shí hkyô lé kut é nghut ri. 28Hkâsu mù gâ le, núngmòq é jihkyang kat bang, ‘Ngá-nhúng le yhâng é awùt ashín pé nghut nyi lhê.’ ga taî tô bum é eq rajung za, ngá-nhúng gi, Yhâng é yánmai wó nyî, wó dui é eq îsu wó dùt é nghut lhê.

29Haû mù, ngá-nhúng gi, Garai Gasâng é yhang zô pé nghut nyi é yánmai, Garaî gùng gi, byu é hpàqchyî lòq èq kyûng kâ tô é hîng, ngùn, lùqgòk pé eq pung lhê nghû luî hkâ-myìt yù kó. 30Laî lò bê haû myòq a bóng shî é pyàt lé, Garai Gasang gi, haî le a ga lhaî pyâm to kôlhang, ahkuî gi, jowò hkangmó mâ é byù lhúnglhâng bang lé, myìt lhîng keq ga hkunmó hkyô to bê nghut ri. 31Hkâsu mù gâ le, Yhang hkyin to sû mai mingkan gón lé târa é dông jéyáng râ buìnyì ra-nyí masàt to bê nghut ri. Shí hkyô lé, byù lhúnglhâng bâng é hí má wó lum é sàksé dùt sháng gàq ga, Yhang haú yùq lé shi é mai lhoqdui toq yû bê nghut ri.” ga taî ri.

32Shi é mai dum dui toq lo é hkyô lé wó gyô bùm kôjáng, ra-am gi, taî hpoî pyám byî akô; ra-am kúm gi, “Nàng shí hkyô taî é lé ngá-mòq dum gyô wú nau ashî.” ga taî akô. 33Hau htâng, Poluq gi, haû zùphpong mai htoq ló byùq bê nghut ri. 34Nghut kôlhang, byù ra-am gi, Poluq é htâng cháng kômù, lùmjíng bang dùt bekô nghut ri. Haú bang má, Aripagu zùphpong má bo é Di‑onisi ga sû le bo ri. Hau htoq agó, Damari gâ é myiwe rayùq eq gótû byu pé le, bo bum akô nghut ri.

Currently Selected:

Lagyo 17: znot

Highlight

Copy