1 Korinhtuq 3

Noqkuq Hpúng Má Gam Hkoq Lhûm É Hkyô

1Gu-mang wuì ê, hí hkûn, ngò gi, núngmòq lé, Sô eq sêng é bang lé dông wó taî é a nghut; mingkan eq sêng é bang dông nghut kômù, Hkrisidùq má zonú su dùt bang lé dông shèq taî wú é nghut lhê. 2Núngmòq gi, zoshuq apat lé a wó zo shi kó nghut é yánmai, ngò gi, núngmòq lé naú byi huq é nghut lhê.#3:2 Núngmòq lé naú byi huq é, gâ é gi, lui é hkyô pé lé hí mhoq byî é lé gâ lhê. Ahkuî lháng, núngmòq gi, zoshuq apat lé a wó zo shi kó nghut ri. 3Núngmòq gi, mingkan eq sêng é bang ru nghut nyi ashi kó nghut ri. Hkâsu mù gâ le, manôn hkyô eq byòq lhum hkyô gi, núngmòq chyáng jòq nyi é yánmai, núngmòq gi, mingkan eq sêng é bang nghut lhê a nghut kó lùq? Mingkan zo wuî su nyì yàp bum lhê a nghut kó lùq? 4Rayùq gi, “Ngò gi, Poluq htâng châng lhê.” ga, góyùq gi, “Ngò gi, Apolo htâng châng lhê.” ga taî nyi bùm kô é nghut jáng, núngmòq gi, mingkan zo wuî nghut nyi bum lhê a nghut kó lùq?

5Apolo gi, ó wá nghut lhê? Poluq gi, ó wá nghut lhê? Ngá-nhik gi, Garaî é duìnhâng zoshâng za nghut luî, ó le ó lé, haû Yhûmsing èq hun tô é múzó eq rajung za wùn wàq é nghut luî, núngmòq gi, ngá-nhik dông mai wó lùmjíng kô é ru nghut lhê. 6Ngò gi, gabú danglù a-myui lé hô kat, Apolo gi, wuì hpyun byi, nghut kôlhang, yùq kô lò nhang é gi, Garai Gasang za ru nghut lhê. 7Haû mù, a-myui hô kat sû eq wuì hpyun byi sû gi, ahkyàk mó a nghut, yùq kô lò nhang é Garai Gasang za shèq ahkyàk ru nghut lhê. 8A-myui hô kat sû eq wuì hpyun byí su nhik myòqbyu tô é hkyô gi, rajung za nghut ri; nghut kôlhang, yhûmsîng shi-kùt é eq rajung za, ó le ô é shigyaú chyûnghuq wó yû kôrâ nghut lhê. 9Hkâsu mù gâ le, ngá-mòq gi, Garai Gasâng é mû zui luzúm wuî nghut lhê; núngmòq gi, Garai Gasâng é yò, Garai Gasâng é yhûm nghut nyi akô.

10Garai Gasang, ngo lé byî to bê jeju eq rajung za, yhûm saí kung sû rayùq dông, ngò gi, yhûm a-pûn awang hi to bê nghut lhê; gótû byù gi, hau é ahtoq má saî toq jàt nyi é nghut lhê. Nghut kôlhang, yùq hkangmó gi, yhûmsîng saî é má rago sidìq râ lhê. 11Hkâsu mù gâ le, hi to gù nghut é, Yesuq Hkrisidùq nghu é yhûm a-pûn awang mai lai luî, ó yùq le, gótû yhûm a-pûn awang lé wó saî é a nghut. 12Yhûm a-pûn awang hau é ahtoq má, hîng, ngùn, hpaudap lùqgòk pé, sik, mhan, hkówá pé lé chûng mù saî jàt kô é nghut jáng, 13yùq hkangmó é múzó hkâsu nghut é hkyô lé lhoqhtoq shit é hui râ nghut lhê. Haî mù luî gâ le, haû Yesuq é Buìnyì gi, haú lé byu-myàng nhâng mù, haû buìnyì lé gi, myî èq lhoqhtoq shit râ nghut lhê. Haû myi gi, yùq hkangmó saî é múzó hkâsû é nghut é lé chyâm râ nghut lhê. 14Rayùq yùq saî é yhûm gi, ru gîng nyi é nghut jáng, haú yùq gi, yhâng é shigyaú chyûnghuq wó yû râ nghut lhê. 15Nghut kôlhang, yhûm haû nyé gyó byùq é nghut jáng, yhang gi, yhûm sûm byùq é hui zo râ nghut lhê; yhang gi, chyungxe lùt kôlhang, myishâm mai wó lùt é byù su dùt râ nghut lhê.

16Núngmòq gi, Garai Gasâng é noqkuq yhûm nghut luî, Garai Gasâng é Sô gi, núngmòq má lúng nyî bê hkyô lé a sé kó lhú? 17Rayùq yùq, Garai Gasâng é noqkuq yhûm lé lhoqhtên é nghut jáng, Garai Gasang gi, haú yùq lé lhoqhtên pyám râ nghut lhê. Hkâsu mù gâ le, Garai Gasâng é noqkuq yhûm gi, chyoiyúng lhê; núngmòq gi, noqkuq yhûm haû nghut akô.

18Núngmòq gi, yhûmsing gùng yhûmsîng hkâ lhoqnghoq kó. Núngmòq mâ é rayùq yùq, shí i-pyàt mâ é byù nyì a-tsáng dông hpàqchyî byéng-yá bò sû ga myìt é nghut jáng, hpàqchyî byéng-yá a-kyîng bò sû wó dùt sháng gàq, yhang gi, a‑ngòk sû dùt râ lhê. 19Hkâsu mù gâ le, mingkan shî mâ é hpàqchyî byéng-yá gi, Garai Gasâng é hí má ngòk é hkyô nghut ri. Haû gi, “Garai Gasang gi, hpàqchyî byéng-yá bò bang lé, yhángmòq é hpàqchyî má yhang myí to nhang ri.”#Yob 5:13 ga kâ tô é eq rajung za nghut ri. 20Hau htoq agó, “Haû Yhûmsîng gi, hpàqchyî byéng-yá bò bang myìt é hkyô pé akôm nghut é lé sê lhê.”#Hkya-on 94:11 ga le kâ tô ri. 21Haû mù luî, ó yùq le, byù eq sêng é hkyô má gyáng é dang a taí kó sháng gàq! Lhúnglháng gi, núngmòq é chyat nghut lhê. 22Poluq le, Apolo le, Kehpa le, mingkan le, dui nyi é hkyô le, shi é hkyô le, ahkui lhê hkyô eq htângnùng mâ é hkyô le, bànshoq gi, núngmòq é chyat nghut ri. 23Núngmòq gi, Hkrisidùq é nghut akô; Hkrisidùq gi, Garai Gasâng é nghut ri.

Currently Selected:

1 Korinhtuq 3: znot

Highlight

Compare

Copy