ROMANOS 9
9
Israel pegua reta iyeparavo
1Che Cristo re jae añete vae. Mbaetɨ ko cheapu, echa chepɨa pe aikuaa Espíritu Santo rupi, 2kërai chepɨatɨtɨ yae, jare chepɨa etei jasɨ avei. 3Echa aipotaecha ayembosɨrɨ Cristo güi, metei yepopeyu oa jese vae rami, aaɨu ramo, cherɨvɨ reta. Jae ko cherëtara reta. 4Jae ko Israel iñemuña reta. Tumpa oyapo taɨ retarä.#Ex 4.22. Oechauka iyemboetea chupe reta. Oyapo morogüɨrökuavee päve jae reta ndive, jare oikuaauka vi chupe reta Moisés iporookuai. Oyeokuai reta Tumpa pe jare jae oñererökuavee chupe reta. 5Jae reta vi ko ñaneñemuñagüe reta iñemuña, jare jupi reta Cristo ou oyeapo kuimbaerä. Tumpa etei ko. Jae ko opaete mbaembae iYa. Toyemboeteuka jekuae avei pegua. Amén.
6Kuae mbaetɨ ko Tumpa oñererökuavee Israel pe vae oyembopoä, echa opaeteä ko Israel iñemuña reta, Israel iñemuña añetete vae. 7Jaeramiño vi opaeteä ko Abraham iñemuña reta, taɨ añetete vae. Echa Tumpa jei Abraham pe körai: “Isaac rupi renoita neñemuña añetete vae.”#Gn 21.12. 8Kuae oipota jei, kuimbae jemimbota rupi ou ñemuña vae rupiä ko Tumpa taɨ reta. Jaeño Tumpa güɨrökuavee vae rupi oñemuña vae reta ko jae ñemuña añetete vae reta. 9Echa Tumpa jei Abraham pe, körai: “Körai yave ïru año ayu yeta ndépɨri, jayave Sara oimeta ma imembɨ.”#Gn 18.10.
10Ërei jokuaeñoä ko. Echa Rebeca imembɨ vae, imembɨ ko metei kuimbae güiño, jae ko ñaneñemuñagüe Isaac. 11Ërei ndeiño oa chaguakiri reta. Jare ndeiño oyapo ikavi vae ani ikavimbae vae mbove (kuae ko Tumpa oiparavo jae jemimbota rupi oiko vaerä; mbaetɨ oiparavo jembiapo rupi, jaeño jae jemimbota rupi), 12Tumpa jei Rebeca pe körai: “Tenondegua oyeokuaita taɨkuegua pe.”#Gn 25.23. 13Echa Tumpa Iñee pe oyekuatía oï körai: “Aɨu Jacob jare aröɨro Esaú.” #Mal 1.2-3.
14¿Mbae pa yaeta jayave? ¿Tumpa jupiä pa jayave? ¡Mbaetɨ ko! 15Echa Tumpa jei Moisés pe körai: “Aipararekota ko chekɨ̈reɨ aiparareko vae. Jare chepɨakavita ko chekɨ̈reɨ chepɨakavi chupe vae pe.”#Ex 33.19. 16Jáeramo, mbaetɨ yande yaipota vae ani ayemoambeko vae rupi, jaeño Tumpa iporoparareko rupi. 17Echa Tumpa Iñee jei Faraón pe: “Kuaerä etei che roparavo mburuvicha guasurä, aechauka vaerä nderé chembaepuere, oñemoërakua vaerä cheree opaete ɨvɨ rupi.”#Ex 9.16. 18Jáeramo, Tumpa oiparareko, ikɨ̈reɨ oiparareko vae. Jare ombopɨatäta, ikɨ̈reɨ ombopɨatäta vae.
19Jáeramo, güɨramoi rereta cheve: “Jökorai yave, ¿maera pa Tumpa yandemboeko? Echa mbaetɨ kia ipuere oyopia jae jei vae.” 20Ërei nde, kuimbae ¿kia pa nde reñeengata vaerä Tumpa pe? Echa ɨvɨyapepo ¿ipuere pa iñeengeta iyapoa pe, jei: “Maera pa nde cheapo körai”?#Is 29.16; 45.9. 21Echa oñaeu-apo vae ¿ipuereä pa oyapo ñaeu güi jae oipota vae?#Jer 18.4-6. Oyapo ko metei ñaeu güiño ɨvɨyapepo yemboete pegua jare ïru oyeporuiño vaerä.
22Tumpa iyarasɨ ipuere tëi omboyekuaa jare jërakua imbaepuere, ërei güɨropɨa guasu jókuae iyarasɨ kuimbae reta, kañɨtei peguarä vae reta pe, 23jae omoërakua vaerä iyemboetea tuicha yae vae, omboyekuaa iporoparareko rupi, jókuae omokätɨro ma iyɨpɨ güive chupe reta yemboetea peguarä vae; 24kuae reta vi oenɨi, jae ko yande reta. Mbaetɨ judío reta güiño, judiombae vae reta güi vi. 25Oseas oikuatía vae pe jei rami:
“Tenonde yave tëta mbaetɨ chembae vae,
oyeapota ko chembae retarä;
jare tenonde yave mbaetɨ aaɨu vae reta,
añave aaɨuta ko.#Os 2.23.
26Tenonde yave che jae peve:
‘Pe reta chembaeä ko.’
Joko pe etei peñeenɨita ‘Tumpa oikove vae taɨ reta.’ ”#Os 1.10.
27Jare Isaías jei iñeeäta reve Israel pegua reta re: “Yepe tëi jeta yae ko Israel iñemuña reta, ɨguasu jembeɨ pegua ɨvɨkuitï jeta yae rami, ërei jembɨregüeño ko oyemboasata; 28echa yandeYa oiporaraukata jupi rupi jare jarembae kuae ɨvɨ pe.”#Is 10.22-23.
29Echa tenonde yave Isaías jei rami. Echa jei:
“YandeYa Imbaepuere yae ete vae,
mbaetɨ yave mona oeya yandeve ñaneñemuña,
yapɨtata viña Sodoma jare Gomorra#Is 1.9. rami.”
Yembojupi Tumpa omee mborogüɨrovia rupi vae
30¿Mbae pa yaeta? Kërai judiombae vae reta, mbaetɨ yepi oeka oyembojupiuka vaerä vae, añave oyembojupiuka ma ko mborogüɨrovia rupi; 31ërei Israel pegua reta oipota tëi oyembojupiuka mborookuai jei vae rupi vae, mbaetɨ oyembojupi reta. 32¿Maera ra mbaetɨ oyembojupiuka? Echa mbaetɨ oyapo reta mborogüɨrovia rupi. Mborookuai jei vae oyapo vae reño oipota oyembojupiuka reta. Jáeramo ipɨ̈sa-yeyuka reta ita pɨ̈sa-yeyuka pegua re. 33Echa Tumpa Iñee pe oyekuatía oï körai:
“Mase, che añono Sión pe,
ita pɨ̈sa-yeyuka pegua
jare ita guasu oporoitɨ vae,
ërei güɨrovia jese vae,
ngaraa oñemomaraiuka.”#Is 28.16.
Currently Selected:
ROMANOS 9: GUABD
Highlight
Share
Compare
Copy
Want to have your highlights saved across all your devices? Sign up or sign in
Biblia DC Guaraní Bolivia © Bolivian Bible Society, 2001.
