APOCALIPSIS 18
18
Babilonia oa vae regua
1Jare kuae jaɨkue rupi aecha ïru araɨgua ogüeyɨ ou ara güi imbaepuere yae reve, jare ɨvɨ jembipe jókuae araɨgua jembipe pe. 2Jare osapúkai reve jei:
“Oa ma, oa ma Babilonia guasu.#Is 21.9; Jer 51.8; Ap 14.8.
Opɨta aña reta jëtarä,
opaete espíritu ikɨa vae oikoarä.
Güɨra oyeumbae jare oñereröɨro vae#Is 13.21; Jer 50.39. jëtarä.
3Echa opaete tëtaguasu reta
jou vino rami jókuae teko ikavimbae vae;#Is 23.17; Jer 51.7.
jare mburuvicha guasu reta ɨvɨ pegua
oyapo aguasa jae ndive,
jare ɨvɨ pegua reta omaemee vae
oyemboikokatu imbaepotarai re.”
4Jare aendu ïru ñee ara güi jei:
“Peë joko güi, chembae reta,#Is 48.20; Jer 50.8; 51.6,45.
agüɨye vaerä peyapo mbaeyoa reta jae oyapo rami,
jare agüɨye vaerä peiporara
mbaesusere reta chupe oyeapota vae;
5echa iyoa oa ojo ara re,#Gn 18.20-21; Jer 51.9.
jare Tumpa oecha jókuae jeko ikavimbae.
6Pemee vi chupe jae omee#Sal 28.4; 137.8; Jer 50.29. rami,
pemboekovia chupe mókoi ye jembiapo oï rupi.
Peyapo mókoi ye chupe jae omee kopa pe ïru vae jou vaerä vae pe yeño.
7Jae oyemboete yae jare ogua jeta mbaembae jepɨ yae vae,
jökorai vi toiporara yae jare tipɨatɨtɨ yae.
Echa jei iyeupe: Che aguapɨ aï mburuvicha kuña rami,
mbaetɨ ko kuña imemano vae che,
ngaraa etei chepɨatɨtɨ.
8Jáeramo metei ara peño
oyeapota chupe jeta mbaesusere: #Is 47.7-9.
mano, mbɨatɨtɨ jare karuai,
jare opata ókai,
echa imbaepuere yae ko yandeYa Tumpa ojäa vae.”
9Jare ɨvɨ pegua mburuvicha guasu reta oyapo aguasa jae ndive vae jare jae ndive oyerovia vae oyaeota jare oapïrota, oecha yave jätati opa ókai güi. 10Ërei jae reta oyemboɨta mombɨrɨ tëta guasu güi, okɨɨye ramo oiporara oï vae güi, jei reve:
“Paravete tëta guasu Babilonia,
tëta guasu imbaepuere yae vae;
echa neparanoe oväe reiporara yae vaerä.”#Ez 26.16-17.
11Jare opaete ɨvɨ rupi omaemee vae reta oyaeota jare oapïrota, echa ngaraa ma kia ogua chugüi reta imbaembae: #Ez 27.31,36. 12Mbaembae oro pegua, korepoti pegua, ita ipöra yae vae reta, lino ikavi vae, temimonde pɨ̈taü vae, seda, temimonde pɨ̈taasɨ vae, oipotagüe ɨvɨra ipiche kavi vae, opaete mbae elefante jäi mbuku pegua, opaete ɨvɨra jepɨ yae vae pegua, jiero iyu vae pegua, jiero pegua jare ita mármol jee vae pegua; 13ngaraa ma kia ogua canela, mbae ikäti kavi vae, ikäti kavi vae incienso, mirra, ikäti kavi vae, vino, asaite, trigokúi ipɨuasɨ vae, trigo, mburika reta, vecha reta, kavayu reta, käretou reta, tembipɨɨ reta, kuimbae reta jekove.#Ez 27.12-13,22. 14Jare jei retata tëta guasu pe:
“Reipota yae vae mbaetɨ ma renoi,
opaete mbaembae ikavi yae vae,
ngaraa ye ma reväe.”
15Omaemee vae reta oyemboikokatu jese, oyemboɨta mombɨrɨ okɨɨye ramo oiporara oï vae güi, oyaeo reve jare oapïro reve,#Ez 27.31,36. 16jei reve:
“Paravete tëta guasu,
oyemonde lino ikavigüe pe vae,
pɨ̈taü vae pe, pɨ̈taasɨ vae pe,
oñemopöra oro pe, ita ipöra vae pe jare ïru oipotagüe ita ipöra vae pe.
17Echa neparanoe oväe oyemboai vaerä jeta ndembaeyekou reta.”
Opaete barco guasu imboguataa reta, oguata pɨpe vae reta, barco guasu pe oparavɨkɨ vae reta, opaete ɨguasu rupi oguata omaemee vaerä vae reta oyemboaita mombɨrɨ,#Is 23.14; Ez 27.26-30. 18jare osapúkai reta tëta guasu jätati oecha yave, jei reve: “¿Kia nunga tëta guasu pa omboyovake kuae tëta guasu?”#Ez 27.32. 19Jare oñono reta ɨvɨkúi iñäka re osapúkai reve oyaeo reve jare oapïro reve jei reta:
“Paravete tëta guasu,
imbaembae pe oyemboikokatu barco iya reta.
¡Echa iparanoe#Ez 27.30-34. opa oyemboai!
20Peyerovia jese,#Dt 32.43; Jer 51.48. ara pe peiko vae.
Jare pe oporogüɨrovia vae reta,
temimondo reta jare ñeemombeúa reta,
echa Tumpa oyepɨ peve.”
21Jayave metei araɨgua imbaepuere yae vae oipɨɨ metei ita, ita tuicha vae oyembaeso pɨpe rami vae, jare omombo ɨguasu pe jei reve:
“Köraita rea tätagüe tëta guasu Babilonia.#Jer 51.63-64.
Ngaraa ye ma kia ndereecha.#Ez 26.21.
22Ngaraa ye ma oyeendu arpa reta ipu,
mimbɨñee reta,
mimbɨguasu iñee reta;#Is 24.8; Ez 26.13.
jaeramiño vi ipoki ombaapo vae reta ngaraa ye ma oime ndepɨpe
ani ombaeso vae reta ave ngaraa ye ma oyeendu ndepɨpe.
23Jaeramiño vi ngaraa ye ma jendɨ ndepɨpe mechero,
ani kia omenda vae iarete.#Jer 7.34; 25.10.
Echa omaemee yepi joko pe vae reta tuichagüe reta yepi,
echa ndepaye reta rupi rembotavɨ opaete tëtaguasu reta.”
24Echa kuae tëta guasu pe oñeväe ñeemombeúa reta jugüɨ, oporogüɨrovia vae reta jugüɨ jare opaete ɨvɨ pe oyeyukauka vae#Jer 51.49. reta jugüɨ.
Currently Selected:
APOCALIPSIS 18: GUABD
Highlight
Copy
Compare
Share
Want to have your highlights saved across all your devices? Sign up or sign in
Biblia DC Guaraní Bolivia © Bolivian Bible Society, 2001.
