APOCALIPSIS 11

Mókoi kuimbae omombeu Tumpa vae reta

1Jare oñemee cheve metei täkuarasɨ ɨvɨra mbae oñejäa pɨpe vae rami vae, jare jei cheve: “Epüa jare ejäa Tumpa itupao,#Ez 40.3; Zac 2.1-2. mɨmba oyeyukagüe oyeapɨ jese vae jare eipapa ombaemboete joko pe vae reta. 2Ërei tupao joka ikatu pegua eeyaño, agüɨye ejäa, echa jókuae oka oñemee judiombae vae reta pe. Jae reta opɨ̈rota tëta guasu oñeñono tee Tumpa peguarä vae re cuarenta y dos yasɨ.#Dn 7.25; 12.7; Lc 21.24. 3Jare ambouta mókoi kuimbae chemoërakua vae reta, omoërakua vaerä mil dosciento sesenta ara, oyemonde reta reve temimonde mbɨatɨtɨ pegua pe.”

4Jókuae mókoi chemoërakua vae reta jae ko jókuae mókoi ɨvɨra olivo reta jare mókoi mechero renda reta oï Tumpa ɨvɨ iyapoa jóvai vae.#Zac 4.3,11-14. 5Oime yave kia oipota tëi oyapo ikavimbae vae jókuae mókoi kuimbae reta pe vae, oëta tata jókuae mókoi kuimbae reta iyuru güi jare opata oapɨ jovaicho reta. Jökoraita omano kia oipota tëi oyapo ikavimbae chupe reta yave. 6Kuae mókoi reve güɨnoi mbaepuere ara re agüɨye vaerä okɨ opaete ara reta Tumpa iñee#1 R 17.1. omoërakua reta ramboeve. Jaeramiño vi güɨnoita mbaepuere ɨ re oyapo vaerä tugüɨrä.#Ex 7.17-19. Jaeramiño vi güɨnoita mbaepuere oiporarauka vaerä ɨvɨ pegua reta pe oipotagüe tembiporara#1 S 4.8. jae reta ikɨ̈reɨ oyapo rupi.

7Jare opa ma Tumpa regua omoërakua yave, jókuae mbaeporou ɨvɨkua guasu#Dn 7.7; Ap 13.5-7; 17.8. güi oë vae oñerarota ikotɨ reta jare omoamɨri retata jare oyukata.#Dn 7.21. 8Jare jókuae mókoi kuimbae jëogüegüe opɨtata jókuae tëta guasu joka guasu pe Sodoma#Is 1.9-10. jare Egipto jee vae pe, jae ko yandeYa kurusu re oyekutúa pe. 9Jare opaete tëta reta, ñemuña reta, ñee ambuae mbuae reta jare tëtaguasu reta oecha retata jókuae mókoi kuimbae jëogüegüe mboapɨ ara y medio. Ngaraa omaeño reta kia re oñotɨ vaerä. 10Jare ɨvɨ pegua reta oyeroviata jókuae mókoi kuimbae jëogüegüe re. Oyapo retata arete jare omondota oyoupe mbota reta. Echa ndei omano mbove, jókuae mókoi ñeemombeúa reta oiporarauka yae ɨvɨ pegua reta pe.

11Ërei mboapɨ ara y medio oasa ma yave, Tumpa ombou tekove jókuae mókoi tëogüe pe, jare mókoi reve opüa oyemboɨ,#Ez 37.5,10. jare kuae oecha vae reta täta okɨɨye reta. 12Jayave oyeendu ñee ara güi, iñeeäta reve jei chupe reta: “¡Peyeupi kuae kotɨ!” Jayave oyeupi reta ojo ara kotɨ amapɨtu re.#2 R 2.11. Jare jovaicho reta oecha. 13Jökorai rupive täta ɨvɨkana#Ap 6.12; 16.18. jare tëta guasu iyɨkegüe osururu, jare omano chiu mil kuimbae reta. Jare omanombae reta okɨɨye yae jare omboete Tumpa ara pe oiko vae.

14Oasa ma mokoía susere, ërei mboapɨa susere oata jarembae.

Chiúa mimbɨguasu

15Jare araɨgua omoñee chiúa mimbɨguasu yave, oyeendu ñee reta tätagüe, jei:

“Mborookuaía reta ɨvɨ pegua

ou opɨta yandeYa

jare Cristo ipo pe.

Jare jae oporookuaita jekuaekuae avei rupi.”#Ex 15.18; Dn 2.44; 7.14,27.

16Jare jókuae veinticuatro tenondegua okuakuaa vae reta oguapɨ ñogüɨnoi iguapɨa pe Tumpa jóvai vae reta oyetavatɨka itindɨasɨ reve omboete reta Tumpa, 17jei reta reve:

“Romee yasoropai ndeve oreYa Tumpa Imbaepuere yae ete vae,

nde ko iyɨpɨ güive, añave jare reyuta vae,

echa reipɨɨ ndembaepuere tuicha yae vae,

jare añave reporookuai reï.

18Jare tëtaguasu reta iyarasɨ.

Ërei ndearasɨ#Sal 2.5; 110.5. oväe ma rejäa vaerä omanogüe reta,

jare remboekovia vaerä

nderembiokuai ñeemombeúa reta,

oporogüɨrovia vae reta,

jare omboete nderee vae reta

michia reta jare okuakuaa vae reta,#Sal 115.13.

jare remboai vaerä ɨvɨ omboai vae reta.”

19Jare Tumpa itupao oyepea ara pe, jare käjou morogüɨrökuavee päve pegua oyekuaa oï japɨpe pe. Jare oyeendu ama-vera, ñee reta,#Ap 8.5; 16.18-21. ararɨapu, ɨvɨkana jare jeta amandau.

Currently Selected:

APOCALIPSIS 11: GUABD

Highlight

Copy

Compare