SAN MATEO 27

Güɨraja reta Jesús Pilato jóvai

(Mc 15.1; Lc 23.1-2; Jn 18.28-32)

1Jare köe ma yave, opaete sacerdote reta itenondegua reta, jare tëta pegua reta itenondegua reta oyemongeta oyukauka vaerä Jesús. 2Oipokua reta jare güɨraja mburuvicha Poncio Pilato pe omee.

Judas imano

3Jayave Judas, Jesús omee vae oecha oyuka retata Jesús yave, ipɨatɨtɨ güɨraja ye jókuae treinta reare korepoti pegua sacerdote reta itenondegua reta jare tëta pegua reta itenondegua reta#Hch 1.18-19. pe, 4jei reve:

—Ayapo mbaeyoa. Amee ramboeve peve jókuae kuimbae jekombae vae

Jayave jae reta jei chupe:

—¡Jókuae mbaeä ko oreve! ¡Nderei ma ko oï!

5Jayave Judas omombo korepoti tupao pe. Oë joko güi jare ojo oyeyuvɨ. 6Jayave sacerdote reta itenondegua reta omonoo jókuae korepoti jare jei:

—Jupiä ko ñañono ye vaerä kuae korepoti tupao pegua korepoti jɨru pe. Echa mano jepɨ ko.

7Jayave oyemongeta reta mbae ra oyapota jókuae korepoti pe yave, ogua reta oñaeu-apo vae iɨvɨ, oñeotɨ vaerä joko pe ketɨgua reta. 8Jáeramo ombojee jókuae ɨvɨ añave regua: Ɨvɨ tugüɨ jepɨgüe. 9Jökorai oyembopo ñeemombeúa Jeremías jei vae. Echa jae jei körai: “Jare jae reta omonoo jókuae treinta reare korepoti pegua. Israel pegua reta omboepɨgüe. 10Jayave ogua pɨpe oñaeu-apo vae iɨvɨ, yandeYa jei cheve rami.”#Zac 11.12-13.

Pilato oparandu Jesús pe

(Mc 15.2-5; Lc 23.3-5; Jn 18.33-38)

11Jare Jesús oyemboɨ mburuvicha Pilato jóvai. Jayave jae oparandu chupe:

—¿Nde pa ko jae judío reta juvicha guasu?

Jesús jei chupe:

—Jae ko che.

12Jare sacerdote reta itenondegua reta jare tëta pegua reta itenondegua reta omboeko Jesús yave, mbaetɨ mbae jei. 13Jayave Pilato jei chupe:

—¿Reenduä pa jeta mbaembae re ndemboeko reta?

14Ërei Jesús mbaetɨ etei mbae jei chupe. Jáeramo omopɨakañɨ yae mburuvicha.

Pilato omboeterenga Jesús omano vaerä

(Mc 15.6-20; Lc 23.13-25; Jn 18.38—19.16)

15Jare Pascua iara ñavo pe mburuvicha oyorañoi metei tembipɨɨ tëta pegua reta oipota vae. 16Jare tembipɨɨrɨru pe oï metei kuimbae jërakua yae vae. Barrabás jee vae. 17Jayave Pilato oparandu yatɨ vae reta pe:

—¿Peipota pa ayorauka vaerä peve Barrabás ani Jesús, Cristo jee vae?

18Echa jae oikuaa judío reta omee Jesús chupe iyakatúä jese ramo.

19Jare Pilato oguapɨ yave oï morojäa pe, jembireko ombou jei chupe: “Agüɨye eyapo mbae jókuae kuimbae jupi vae pe. Echa apaɨu kaviä yae jae jeko pegua.”

20Ërei sacerdote reta itenondegua reta jare tëta pegua reta itenondegua reta omboemboe yatɨ vae reta jei vaerä Pilato pe oyorauka vaerä Barrabás jare oyukauka vaerä Jesús. 21Jayave Pilato oparandu chupe reta:

—¿Kia nunga pa kuae mókoi güi peipota ayorauka vaerä peve?

Jae reta jei:

—Barrabás.

22Jayave Pilato oparandu chupe reta:

—Jökorai yave, ¿mbae pa peipota ayapo Jesús, Cristo jee vae pe?

Jayave opaete vae reta jei:

—¡Eikutuuka kurusu re!

23Mburuvicha oparandu chupe reta:

—¿Mbae ikavimbae vae pa oyapo?

Ërei jae reta jeieteño osapúkai reve jei:

—¡Eikutuuka kurusu re!

24Jare Pilato oecha yave mbaetɨ ipuere mbae oyapo, echa judío reta jeiete osapúkai. Jare jei güeru vaerä chupe ɨ javoi oyepoe#Dt 21.6-9. yatɨ vae reta jóvai, jei reve chupe reta:

—Che mbaetɨ anoi teko kuae kuimbae jupi vae imano re. Perei ma ko oï.

25Jayave opaete vae reta jei:

—Ore jare oreñemuña reta re toï teko.

26Jayave Pilato oyorauka chupe reta Barrabás. Jare oinupauka güire Jesús chikote pe, omboeterenga oyekutuuka vaerä kurusu re.

27Jayave mburuvicha isundaro reta güɨraja Jesús mburuvicha oporojäa pe, jare omboatɨ jese opaete ïru sundaro reta. 28Jayave sundaro reta omboi Jesús güi jemimonde jare omondeuka chupe temimonde pɨ̈ta vae. 29Jare oñono reta iñäka re äka-regua ñurati oñeopegüe. Omee reta vi chupe metei täkuarasɨ oipɨɨ vaerä iyakatu pe. Jayave oyetavatɨka reta jae jóvai jare oyóyai jei reve:

—¡Kërai pa reï judío reta Juvicha guasu!

30Jare ondɨvɨ reta jese. Oipɨɨ reta täkuarasɨ oiporu iñäka re. 31Jare opa oyóyai reta güire, sundaro reta omboi chugüi temimonde pɨ̈ta vae, jare omondeuka reta ye chupe jemimonde ae. Jayave güɨraja reta oikutu vaerä kurusu re.

Jesús oyekutu kurusu re

(Mc 15.21-32; Lc 23.26-43; Jn 19.17-27)

32Jare güɨnoe güɨraja reta ramboeve, oecha reta metei kuimbae Simón jee vae Cirene pegua. Güɨrajauka chupe kurusu. 33Jare güɨraja güɨroväe Gólgota jee vae pe yave (kuae oipota jei: “Äkagüe-renda”). 34Jayave omee reta Jesús pe vino oyea mbae iro vae ndive vae. Ërei Jesús oikuaa yave jókuae, ñäteɨ jou.

35Sundaro reta opa güire oikutu kurusu re, omboyao reta oyoupe Jesús jemimondegüe, oyombosuerte reta jese, jökorai oyembopo vaerä ñeemombeúa jei vae. Echa jei: “Omboyao reta cheremimonde oyoupe, oyombosuerte reta cheremimonde re.”#Sal 22.18. 36Jare oguapɨ reta oäro Jesús. 37Jare oñono reta kurusu re Jesús iñäka iárambo oyekuatía mbae re ko oyemboeko vae: “KUAE KO JESÚS, JUDÍO RETA JUVICHA GUASU.” 38Jare sundaro reta oikutu vi kurusu re mókoi imonda vae Jesús ndive; metei iyakatu kotɨ jare ïru iyasu kotɨ.

39Jare oasa vae reta oñeäkambovava#Sal 22.7; 109.25. reve jei ikavimbae vae Jesús kotɨ. 40Jei reta:

—Nde rere rembosururuta ko tupao jare remopüa yeta mboapɨ ara pe.#Mt 26.61; Jn 2.19. Eyeepɨ. Nde ko jae Tumpa Taɨ yave, egüeyɨ kurusu güi.

41Jaeramiño vi sacerdote reta itenondegua reta, mborookuai re oporomboe vae reta, fariseo reta jare tëta pegua reta itenondegua reta oyóyai jei reve:

42—Jae oepɨ ïru vae reta, ërei jae oyeepɨä ma. Jae ko Israel pegua reta juvicha guasu yave, togüeyɨ añave kurusu güi, yarovia vaerä jese. 43Oyeko Tumpa re; toepɨ añave oaɨu yave.#Sal 22.8. Echa jae jei: “Che ko jae Tumpa Taɨ.”

44Jare imonda vae reta Jesús ndive oyekutuuka vae jei reta vi ikavimbae vae chupe.

Jesús omano

(Mc 15.33-41; Lc 23.44-49; Jn 19.28-30)

45Jare kuaraɨ ara mbɨte güive mboapɨ ora rupi oyembopɨtumimbi opaete ɨvɨ rupi. 46Jare kaaru yave mboapɨ orata ma yave, Jesús täta osapúkai reve jei: “Elí, Elí, ¿lama sabactani?” (Kuae oipota jei: “CheRu Tumpa, cheRu Tumpa, ¿maera pa chereeya?”)#Sal 22.1.

47Amogüe joko pe ñogüɨnoi vae reta kuae oendu yave jei reta:

—Mase, Elías oenɨi.

48Jare jupivei metei vae osɨi ojo omoäkɨ esponja vinagre pe, jare oñono täkuarasɨ re, jare omondo Jesús jou vaerä.#Sal 69.21. 49Ërei ïru reta jei:

—Emaeño jese. Yaecha ra ou Elías oepɨ vaerä.

50Ërei Jesús täta osapúkai ye, omboeterenga jekove. 51Jayave asoya tupao imboyaoa#Ex 26.31-33; 2 Cr 3.14. osoro mbɨte rupi ɨvate güi ɨ́vɨkotɨ. Jare ɨvɨ okana jare ita guasu reta oyeka. 52Jare tɨvɨa reta oyepea, jare jeta oñeñono tee Tumpa peguarä omanogüe vae reta oikove ye, 53jare oë reta tɨvɨa reta güi Jesús oikove ye yave. Jae reta yogüɨraja Jerusalén pe jare oyekuaa jeta vae pe.

54Jare cien sundaro vae juvicha Jesús re oyangareko oï vae jare jae ndive ñogüɨnoi vae reta oecha yave kërai ɨvɨ okana jare kërai opaete oyeapo vae, okɨɨye yae jare jei:

—¡Añetete yepe, kuae kuimbae jae Tumpa Taɨ!

55Jare jeta kuña reta omae ñogüɨnoi mombɨrɨ güi. Kuae kuña reta omborɨ yepi Jesús Galilea güive. 56Kuae reta ipɨte pe ñogüɨnoi María Magdalaɨgua, jare María Jacobo jare José ichɨ jare Zebedeo#Lc 8.2-3. taɨ reta ichɨ.

José oñono Jesús jetegüe tɨvɨa pe

(Mc 15.42-47; Lc 23.50-56; Jn 19.38-42)

57Jare kuaraɨ oike ma yave, ou metei kuimbae oikokatu vae José jee vae tëta Arimatea pegua, jae vi ko metei Jesús jemimboe. 58Jae ojo Pilato oïa pe, oyerure chupe Jesús jetegüe re. Jayave Pilato oporookuai oñemee vaerä chupe Jesús jetegüe. 59Jayave José ombogüeyɨ Jesús jetegüe, jare oñoma metei nieso ikɨambae vae pe. 60Jare oñono metei tɨvɨa ipɨau vae jae imbae pe ɨ̈vavira oyeyoo vae pe, jare omboyapayere güive ita tuicha vae jókuae tɨvɨa jöke, ojo ye joko güi. 61Jare María Magdalaɨgua jare ïru María oguapɨ ñogüɨnoi tɨvɨa jóvai.

Sundaro reta oäro tɨvɨa

62Jare pɨareve pe, jae ko ara mbutuu pe, yogüɨraja reta Pilato pɨri, sacerdote reta itenondegua reta jare fariseo reta. 63Jare jei reta chupe:

—Oreruvicha, oremaendúa kërai jókuae kuimbae oporombotavɨse vae ndei omano mbove jei: “Mboapɨ ara pe aikove yeta.”#Mt 16.21; 17.23; 20.19; Mc 8.31; 9.31; 10.33-34; Lc 9.22; 18.31-33. 64Eyókuai ndesundaro reta oyangareko vaerä tɨvɨa re mboapɨ ara pegua, agüɨye vaerä jemimboe reta yogüɨraja pɨ̈tu yave oñomi jetegüe. Echa jökorai yave, jei retata opaete vae pe, “oikove ye ma omanogüe vae reta ipɨte güi.” Jare ombotavɨta jeta yae Jesús ombotavɨ vae güi.

65Jayave Pilato jei chupe reta:

—Joko penoi chesundaro reta. Pekua peyokenda kavi pe peikuaa rupi.

66Jayave jae reta yogüɨraja jare oyokenda kavi tɨvɨa jöke jare omboya oeya. Echa oñono mbae ita tuicha vae re agüɨye vaerä kia oipea, jare oeya joko pe sundaro reta oyangareko vaerä tɨvɨa re.

Currently Selected:

SAN MATEO 27: GUABD

Highlight

Copy

Compare