MALAQUÍAS 3
3
1YandeYa Imbaepuere yae ete vae jei: “Mase, ko amondo cheñeemombeúa, jae oyapo kavita cheraperä;#Mt 11.10; Mc 1.2; Lc 1.76; 7.27. jare yandeYa outa güɨramoiño tupao guasu pe jókuae pe reta peeka vae, araɨgua morogüɨrökuavee päve pegua, jókuae pe reta peipota vae.”
2Jare, ¿kia pa ipuereta güɨropɨa jae ou yave?, jare ¿kia pa ipuereta oyemboɨ#Is 13.6; Ez 30.2-3; Jl 1.15; 2.11; Am 5.18-20; 8.9-14; Sof 1.14-18; Ap 6.17. jae jóvai, jae oyeechauka yave? Echa jae tata mbae ikɨagüe oekɨ rami, jare ombaeputuka vae reta ijavo rami.#Mt 3.10-12. 3Jare oguapɨta ombokavi jare oitɨo korepoti, jökoraita oitɨo Leví iñemuña reta; ombokavita oro jare korepoti rami; jare güeru retata mbota yandeYa pe jupi rupi. 4Jare ikavita yandeYa pe Judá jare Jerusalén pegua mbota; tenonde yave rami, jare arakae año rupi rami.
5Jei yandeYa Imbaepuere yae ete vae: “Jare ayuta pekotɨ aporojäa vaerä; amoañete vaerä imbaekuaa vae reta jeko jare iyaguasa vae reta, yapu reve imiari vae reta, jembiokuai pe mbaetɨ omboepɨ kavi vae reta, imemano vae tɨ̈reɨ, jare ketɨgua pe jupimbae oyapo vae reta mbaetɨ reve oipoɨu reta chegüi.”
Diezmo reta regua
6“Echa, che peYa ayepoepɨmbae ko.#Nm 23.19; Heb 13.8; Stg 1.17. Jáeramo ko, pe Jacob iñemuña reta mbaetɨ opa pekañɨtei. 7Peñemuñagüe reta rami opa pesɨrɨ cheporookuai güi, jare mbaetɨ peñovatu. ¡Peyerova ye chekotɨ jare che ayerova yeta pekotɨ!”#Is 55.7; Zac 1.3. Jei yandeYa Imbaepuere yae ete vae. Ërei pere: “¿Mbae rupi pa royerova yeta?” 8¿Kuimbae ipuere pa mbae oñomi Tumpa güi? ¡Echa pe reta pemaeñomi ko chegüi! Ërei pere: “¿Mbae pa roñomi ndegüi?” ¡Peñomi ko mbota reta jare pediezmo reta! 9Yepopeyu rupi ko peiko, echa pe reta jare opaete tëtaguasu, peñomi ko chegüi. 10Peru opaete pediezmo mbotarɨru pe,#Lv 27.30; Nm 18.21-24; Dt 12.6; 14.22-29; Neh 13.12. oime vaerä tembíu chero pe; jare peikuaa añave jokoropi, mbaetɨta ra aipea ara jöke ambou vaerä peve mborerekua oarasa regua. Jei yandeYa Imbaepuere yae ete vae. 11“Jare temitɨ güɨrokomegua vae reta opata ambosɨrɨ pegüi, jare ngaraa ma güɨrokomegua pegüi peremitɨ ia, jare mbaetɨta ma peuva iambae.” Jei yandeYa Imbaepuere yae ete vae. 12“Jare opaete ïru tëtaguasu reta jeita peve: ‘Oyerovia vae reta’, echa peɨvɨ kavi yaeta.” Jei yandeYa Imbaepuere yae ete vae.
Tumpa iporoparareko imbae vae reta kotɨ
13YandeYa jei: “Peñee reta jasɨ katu yae chekotɨ. Jare pere: ‘¿Mbae pa roe ndekotɨ?’ 14Körai pere: ‘Yayeokuaiiño ma Tumpa pe, ¿mbae pa ñanoita yayapo yave iporookuai, jare yayembopɨatɨtɨ yave yandeYa Imbaepuere yae ete vae jóvai?’ 15Jare yae añave: ‘Oyembopɨa pochɨ vae reta oyerovia yae, ikavimbae oyapo vae reta ikavi yogüɨreko, ojäa reta tëi Tumpa ipɨaguasu, ërei mbaetɨ oiporara reta.’ ”#Mal 2.17.
16(Jayave yandeYa güi oipoɨu vae reta imiari oyoupe; yandeYa oyeapɨsaka jese jare oendu. Kuae reta jee oyemboguapɨ yandeYa jóvai metei tupapire pe, yandeYa güi oipoɨu vae reta jare omboete vae reta regua.)
17YandeYa Imbaepuere yae ete vae jei: “Che cheporojäa iara pe yogüɨreko yeta chembaerä mbae jepɨ yae vae rami, cheɨ̈rota chupe reta metei kuimbae iñɨ̈ro taɨ oyeokuai chupe vae pe rami.#Sal 103.13. 18Jayave pe reta peikuaa yeta jupi vae jare jupimbae vae, Tumpa pe oyeokuai vae jare mbaetɨ oyeokuai chupe vae.”
Currently Selected:
MALAQUÍAS 3: GUABD
Highlight
Copy
Compare
Share
Want to have your highlights saved across all your devices? Sign up or sign in
Biblia DC Guaraní Bolivia © Bolivian Bible Society, 2001.
