SAN JUAN 21
21
Jesús oyekuaa chiu jemimboe reta pe
1Kuae jaɨkue rupi Jesús oyekuaa ye jemimboe reta pe Ɨguasu Tiberias jee vae jembeɨ pe. Oyekuaa chupe reta körai: 2Ñogüɨnoi päve yave Simón Pedro jare Tomás, Chaguakiri pe oyeero vae jare Natanael Caná ɨvɨ Galilea pegua, jare Zebedeo taɨ reta jare mókoi ïru temimboe reta. 3Jayave Simón Pedro jei ïru reta pe:
—Ajata ayeporaka.
Ïru reta jei:
—Ore rojota vi nde ndive.
Jayave yogüɨraja oyeupi barco raɨ pe. Ërei jókuae pɨ̈tu mbaetɨ etei omboa mbae ave.#Lc 5.5. 4Jare köeta ma yave Jesús oyemboɨ oï ɨ jembeɨ pe. Ërei temimboe reta mbaetɨ oikuaa jae ko Jesús vae. 5Jayave Jesús jei chupe reta:
—Cheraɨ reta, ¿oime pa mbae penoi yau vaerä?
Jae reta jei chupe:
—Mbaetɨ.
6Jayave Jesús jei chupe reta:
—Pemombo pepɨsa barco raɨ iyakatu kotɨ jare pemboata.
Jayave jökorai oyapo reta, jare ipuereä ma omoata reta ipɨsa jeta yae jevae omboa ramo.#Lc 5.6. 7Jayave jókuae temimboe Jesús oaɨu vae jei Pedro pe:
—¡YandeYa yepe!
Simón Pedro oendu iYa ko vae yave, oyemonde jare oa ɨ pe. Echa omboi yepe jemimonde. 8Jare ïru reta yogüeru barco raɨ pe. Jae reta omoata pɨsa jevae reve. Echa köiño ñogüɨnoi ɨ jembeɨ güi cien metro rupi. 9Jare yogüeru oë ɨ güi yave, oecha tata tätapɨi reve joko pe. Jare metei jevae tätapɨi iárambo jare mbɨyape. 10Jayave Jesús jei chupe reta:
—Peru mbovɨ jevae pemboa vae.
11Jayave Simón Pedro oyeupi ye barco raɨ pe jare omoata pɨsa ɨ güi. Pɨsa tɨnɨe jevae tuichagüe pe güɨnoi ciento cincuenta y tres. Yepe tëi jeta yae, ërei mbaetɨ omondoro pɨsa. 12Jayave Jesús jei chupe reta:
—Peyu pekaru.
Ërei metei ave jemimboe reta mbaetɨ oparandu chupe: “¿Kia pa ko nde?” Echa oikuaa reta jae ko iYa. 13Jayave Jesús ojo oipɨɨ mbɨyape omee chupe reta. Jare omee vi chupe reta jevae. 14Jare mboapɨa ma kuae re Jesús oyekuaa jemimboe reta pe, oikove ye güire omanogüe vae reta ipɨte güi.
Jesús imiari Pedro ndive
15Opa ma okaru reta yave, Jesús jei Simón Pedro pe:
—Simón, Jonás taɨ, ¿cheraɨu yae pa kuae reta güi?
Pedro jei:
—Roaɨu, cheYa. Nde reikuaa ko che roaɨu vae.
Jesús jei chupe:
—Emongaru chevecha kuimbae taɨrusu vae reta.
16Jesús jei ye chupe mokoía ma:
—Simón, Jonás taɨ, ¿cheraɨu pa?
Pedro jei:
—Roaɨu, cheYa. Nde reikuaa ko che roaɨu vae.
Jesús jei chupe:
—Eyangareko chevecha reta re.
17Jesús jei ye chupe mboapɨa ma:
—Simón, Jonás taɨ, ¿cheraɨu pa?
Pedro ipɨatɨtɨ. Echa mboapɨa ma Jesús jei chupe: “¿Cheraɨu pa?” Jayave jei ye:
—CheYa, nde reikuaa opaete. Nde reikuaa ko che roaɨu ko vae.
Jesús jei chupe:
—Emongaru chevecha reta. 18Añetete che jae ndeve, nde ndetaɨrusu yave, reyeumbɨkua jare reo nekɨ̈reɨ reoa kotɨ. Ërei ndendechi ma yave, reupita ndeyɨva jare ïru vae nderumbɨkuata jare ndererajata neäteɨ reoa kotɨ.
19Kuae jei Jesús omombeu vaerä këraita ko Pedro omano jare omboeteuka Tumpa imano rupi. Jayave Jesús jei Pedro pe:
—¡Eyu che rupíe!
Temimboe Jesús oaɨu vae
20Pedro oyerova yave, oecha jókuae temimboe Jesús oaɨu vae ou jaɨkue. Jókuae temimboe ko jae tenonde yave okaru pɨ̈tu yave ñogüɨnoi yave oï Jesús iyɨpɨ pe jare: “¿Kia pa ndemboeterengata cheYa?”#Jn 13.25. Jei chupe vae. 21Jare Pedro oecha jókuae temimboe yave, oparandu Jesús pe:
—CheYa, ¿kuae maratuta pa?
22Jesús jei chupe:
—Che aipota jae oiko vaerä che ayu ye regua yave, ¿maera pa reipota reikuaa? Nde eyu cherupíe.
23Jare opaete oporogüɨrovia vae reta oikuaa kuae Jesús jei vae, jare iyemongeta kuae temimboe mbaetɨta omano. Ërei Jesús mbaetɨ jei ngaraa omano. Jaeño jei: “Che aipota yave jae oiko vaerä che ayu ye regua, ¿maera pa reipota reikuaa?”
24Jae ko kuae jókuae Jesús jemimboe amombeu añetete ko kuae pe oyekuatía oï vae. Jare opaete yaikuaa kuae amombeu vae añetete ko.
25Jare oime ye jeta mbaembae Jesús oyapogüe. Opaete Jókuae mbaembae regua oyekuatía yave metei metei rupi, ayemongeta oatata ko kuae ɨvɨ pe oyekuatiagüe jendarä. Amén.
Currently Selected:
SAN JUAN 21: GUABD
Highlight
Share
Copy
Want to have your highlights saved across all your devices? Sign up or sign in
Biblia DC Guaraní Bolivia © Bolivian Bible Society, 2001.