SAN JUAN 10
10
Jesús ombojaanga vecharókai re vae
1Jesús jei: “Añetete che jae peve, mbaetɨ oike vecharókai jöke rupi vae, ërei ïkotɨa rupii oike vae, imonda vae ko. 2Ërei vecharókai jöke rupi kavi oike vae, vecha reta iyangarekoa ko. 3Jare vecha iyangarekoa oipota oike yave, öke järoa oipea chupe. Jare vecha reta oendu iyangarekoa iñee. Echa iyangarekoa oenɨi vecha reta jee rupi jare güɨnoe vecharókai güi. 4Jare güɨraja yave opaete imbae reta vecharókai güi, jae oguata tenonde vecha reta pe jare yogüɨraja jaɨkue. Echa oikuaa iñee. 5Ërei ngaraa yogüɨraja ambuae vae jaɨkue. Osɨi retata chugüi. Echa mbaetɨ oikuaa iñee.”
6Kuae ñee ombojaanga vae rupi Jesús omboe reta tëi, ërei jae reta mbaetɨ oikuaa mbae re ra imiari chupe reta vae.
Jesús, vecha iyangarekoa ikavi vae
7Jesús jei chupe reta: “Añetete che jae peve, che ko jae vecharókai jöke rami. 8Opaete yogüeru ndei ayu mbove vae imonda vae reta ko. Ërei vecha reta oyapoä jókuae reta jei vae. 9Che ko jae öke. Che rupi oike vae oyemboasaukata ko. Oiketa jare oëta jare oväeta mbae jou vaerä. 10Imonda vae ou ko oñomi vaerä, oyuka vaerä jare omokañɨtei vaerä. Ërei che ayu ko amee vaerä tekove, jare oime avei vaerä tekove katu. 11Che ko jae vecha reta iyangarekoa ikavi vae. Vecha reta iyangarekoa ikavi vae omano vecha reta oepɨ vaerä. 12Ërei korepoti re vecha reta re oyangareko vae, oecha yave aguarayaɨmba ou, oeya vecha reta jare otekuarai. Echa vecha reta iyangarekoa ikavimbae ko, jare vecha reta imbaeä vi. Jare aguarayaɨmba ou oipɨɨ amogüe vecha reta, jare ïru vecha reta opa oñemoai. 13Jókuae kuimbae otekuarai jepɨ reño oyangareko vecha reta re ramo. Mbaetɨ ipɨatɨtɨ vecha reta re.
14Che ko jae vecha reta iyangarekoa ikavi vae.#Is 40.11; Ez 34; Lc 15.4-5; Heb 13.20. Aikuaa chevecha reta jare chevecha reta chekuaa vi. 15Jökorai CheRu chekuaa jare che aikuaa vi.#Mt 11.27; Lc 10.22. Jare che amee cherekove vecha reta re. 16Oime vi anoi ïru vecha reta kuae peguambae vae reta. Ërei jae reta aruta vi jare oendu retata vi cheñee. Jayave oimeta metei atɨño jare meteiño vecha reta iyangarekoa.#Ef 2.11-22.
17Jáeramo cheRu cheraɨu, echa amee cherekove, aikove ye vaerä. 18Mbaetɨ kia ipuere oekɨ chegüi cherekove. Ameeta che aipota ramo. Anoi mbaepuere amee vaerä, jare anoi mbaepuere aikove ye vaerä. Kuae mborookuai cheRu omee cheve.”
19Jesús kuae jei ramo, judío reta oyoavɨ iyemongeta reta oyougüi. 20Jeta chugüi reta jei:
—Aña oya jese. Imbokere ma. ¿Maera pa peyeapɨsaka jese?
21Ïru vae reta jei:
—Aña oya jese vae mbaetɨ jökorai imiari. ¿Aña ipuere pa ombogüera jesambae vae?
Judío reta güɨröɨro Jesús
22Iroɨ guasu iara ma Jerusalén pe, jare judío reta oyapo ñogüɨnoi arete, tupao oyemboarete vae iarete. 23Jesús oguata tupao pe, korero Salomón jee vae rupi. 24Jayave judío reta yatɨ Jesús re jare jei reta chupe:
—¿Kërai yave pa nemiari kavita oreve, agüɨye vaerä ma orembojopa? Nde ko jae Cristo yave, emombeu kavi voi mo oreve.
25Jesús jei chupe reta:
—Amombeu ma peve, ërei mbaetɨ perovia cheñee. CheRu jee re mbaravɨkɨ ayapo vae ko, oikuaauka kia ko che vae. 26Ërei mbaetɨ perovia, echa pe reta jaeä ko chevecha. Amombeu ma peve rami. 27Chevecha reta oendu cheñee. Aikuaa chevecha reta, jare jae reta yogüɨraja cheraɨkue. 28Jare amee chupe reta tekove opambae vae, jare ngaraa etei omano reta. Ngaraa kia ipuere opɨ̈ro chegüi. 29CheRu omee ma cheve kuae vecha reta vae, imbaepuere tuicha yae opaete vae güi. Jare ngaraa kia ipuere opɨ̈ro cheRu güi. 30CheRu jare che meteiño ko.
31Jayave judío reta oipɨɨ ye ita oyapi vaerä tëi Jesús. 32Jayave Jesús jei chupe reta:
—Ayapo ma jeta mbae ikavigüe peróvai cheRu imbaepuere rupi. ¿Mbae nunga vae re pa peipota cheyuka ita pe?
33Judío reta jei chupe:
—Mbae ikavi vae reyapo vae reä ko royapita ita pe. Ikavimbae rere Tumpa kotɨ vae re ko.#Lv 24.16. Echa nde ko kuimbaeño, ërei rere ndeyeupe nde ko jae Tumpa vae.
34Jayave Jesús jei chupe reta:
—Mborookuai penoi vae pe oyekuatía oï körai: “Pe reta ko jae tumpa reta.”#Sal 82.6. 35Echa Tumpa iñee ou chupe reta vae pe, jae etei ombojee tumpa reta vae. Jare Tumpa Iñee pe oyekuatía oï vae añete ko. 36Jayave, ¿maera pa pere cheve: “Nde rere ikavimbae vae Tumpa kotɨ”? Echa jae: “Che ko jae Tumpa Taɨ.” Echa jae ko cheñono tee jare chembou ɨvɨ pe. 37Mbaetɨ ayapo cheRu iparavɨkɨ yave, agüɨye chererovia. 38Ërei ayapo ko cheRu iparavɨkɨ yave, yepe tëi mbaetɨ chererovia, ërei perovia ayapogüe reta re, peikuaa vaerä cheRu oï ko che ndive jare che aï ko jae ndive.
39Jayave judío reta oipota ye tëi oipɨɨ Jesús, ërei jae ojo chugüi reta.
40Jare Jesús ojo ye ɨ̈aka Jordán jovaicho pe, tenonde yave Juan oporombobautisa#Jn 1.28. oïa pe, jare joko pe opɨta. 41Jare jeta vae reta yogüeru jae oïa pe, jare jei reta:
—Juan mbaetɨ oyapo metei ave mɨakañɨ. Ërei opaete Juan jei kuae kuimbae re vae añete yepe.
42Jare jeta vae güɨrovia Jesús re joko pe.
Currently Selected:
SAN JUAN 10: GUABD
Highlight
Share
Copy
Want to have your highlights saved across all your devices? Sign up or sign in
Biblia DC Guaraní Bolivia © Bolivian Bible Society, 2001.