JEREMÍAS 50
50
Babilonia maratuta vae regua
1YandeYa jei ñeemombeúa Jeremías rupi Babilonia#Is 13.1—14.23; 47.1-15. regua, jae ko Caldeaɨgua reta iɨvɨ; jei körai:
2“Emoërakua kuae, tëtaguasu reta rupi, eikuaauka chupe reta.
Emopüa bandera remokañɨmaa vaerä ñemoñee,
agüɨye nekïriiño epɨta.
Ere: ‘¡Babilonia oñepɨ̈ro!
¡Tumpa-raanga Bel opɨta ñemomarai pe,
tumpa-raanga Merodac opa oyemboai!
¡Itumpa-raanga añetembae, opa oyemboai!’
3Echa ɨvɨtuguasu kotɨ güi metei tëtaguasu oporepeña jese,
jae oeyata jëtaguasu ipombae.
Mbaetɨ eteita, kuimbae ani mɨmba yepe oiko pɨpe,
echa opaeteita otekuarai.”
Israel iñemuña reta oyerova yeta vae regua
4YandeYa jei: “Jókuae ara Israel jare Judá pegua reta yogüeruta oyaeo reve chereeka, che iYa Tumpa. 5Oparandu retata tape Sión kotɨ ojo vae re, jare jokotɨ yogüɨrajata jei reve: ‘Yaja yandeYa pɨri, jare ñañemoïru jae ndive metei morogüɨrökuavee päve opambae rupi, agüɨye ye vaerä ma ñaneakañɨ.’
6Tëta chembae vae vecha okañɨgüe rami ko,#Ez 34.5-6; Zac 10.2; Mt 9.36; Mc 6.34. mbaetɨ güɨroata kavi iyangarekoa reta, omaeño okañɨ reta ɨvɨtɨ rupi. Opa yogüɨraja ɨvɨtɨ reta rupi, iñakañɨ regua jókai güi. 7Jovaicho reta oväe yave oyuka jou, jare jei reta: ‘Mbaetɨ ko teko ñanoi, echa jae reta ko iyoa iYa kotɨ, ikapiirupa ikavigüe kotɨ, iñemuñagüe reta iyeroviaka.’
8¡Petekuarai Babilonia güi,#Is 48.20; Jer 51.6,45; Ap 18.4. Caldeaɨgua reta iɨvɨ güi!
¡Peë tenonde, kavara kuimbae reta tenonde oguata japicha reta pe vae rami!
9Echa ɨvɨtuguasu kotɨgua tëta reta jeta yae
jare imbaepuere yae vae amopüa
oporepeña vaerä Babilonia re.
Oyeapo katu yae reta jëta peve jare opɨ̈ro retata.
Isundaro reta ikuaakatu yae reta,
ojäa uvɨ oyavɨmbae reve.
10Omaepɨ̈ro retata Caldeaɨgua reta güi,
omaepɨ̈ro retata yangapɨɨ regua.
Che peYa ko jae kuae.
Babilonia ñamɨrita vae regua
11Pe Caldeaɨgua, pemaepɨ̈ro chembae vae reta güi vae,
¡peyerovia katu yae jare pevɨa katu yae!
¡Peporise guaka taɨrusu oporise kapii rupi rami!
¡Peñee, kavayu oñee rami!
12Ërei peɨvɨ jare perëta guasu
opɨtata ñemomarai pe.
Jae ko tëtaguasu reta güi ɨ́vɨkotɨ yaeta opɨta;
ipombae, otini jare oasavi etei vae.
13Echa chearasɨta jare aeyata ipombae,
opaeteita oyemboai opɨta.
Opaete oasa jokoropi vae ipɨakañɨta
jare oyóyai yoyaita oecha yave kuae susere reta.
14¡Uvɨ regua reta, peñeñono kavi,
peimama Babilonia!
¡Opaetei peruvɨ reta pemondo ikotɨ,
echa iyoa reta chekotɨ!
15¡Pesapúkai sapúkai ñeraro pegua oipota rupi!
¡Babilonia jaema jëgua!
¡Iguapɨka reta oa ma,
ikësea opa osururu!
¡Kuae ko jae che aiporarauka vae:
Peyepɨ jese!
¡Peyapo chupe reta, jae reta oporoapo rami!
16Opaetei peyuka Babilonia pegua
omaetɨ ani ombaepoo vae.
Oecha yave ñeraro oporomokañɨtei vae,
ketɨgua reta oyerova yeta iɨvɨ kotɨ,
metei ñavo otekuaraita iɨvɨ ae kotɨ.#Is 13.14.
Israel oyerova yeta vae regua
17Israel ko metei vecha okañɨgüe rami, yaguapope reta opa omoai moai rami. Tenonde ete mburuvicha guasu Asiria pegua opa jou; jaɨkue rupi, Nabucodonosor mburuvicha guasu Babilonia pegua, opa oikäo. 18Jáeramo, che peYa Imbaepuere yae ete vae Israel iTumpa jae: Aiporaraukata mburuvicha guasu Babilonia pegua pe jare jëtaguasu pe, mburuvicha guasu Asiria pegua ayapo rami. 19Israel aru yeta iɨvɨ pe, jare vecha jeta güɨnoi kapii Carmelo pe jare Basán pe vae ramita; ɨvɨtɨ guasu reta Efraín jare Galaad pe yangapɨɨta. 20Che, peYa jae: ‘Jókuae ara Israel jare Judá oyeyorata teko jare mbaeyoa güi, echa che cheɨ̈rota, aeya tekove ndive vae reta pe.’
Babilonia ñamɨrita vae regua
21¡Peporepeña ɨvɨ Merataim re,
jare Pecod pegua reta re!
¡Pemoña jare opaetei peyuka!
¡Peyapo opaete che poyókuai vae!
Che peYa ko jae kuae.
22Kuae ɨvɨ pe oyeendu ñeraro yavaetegüe,
kañɨtei tuichagüe.
23¡Babilonia, martillo rami opaete ɨvɨ pegua reta re vae,#Jer 51.20-23.
oyeakɨo opɨta, opa oyembojaɨ jaɨ!
¡Okɨɨye rai yae tëtaguasu reta,
oecha yave kërai Babilonia oasa vae!
24Babilonia, añono ñuai ndeveguarä,
jare reikuaambae reve rea pɨpe.
Reyepɨɨuka ñuai pe, echa chemboarasɨuka.
25YandeYa oipea jembiporu ñeraro pegua jɨru,
jare güɨnoe jembiporu iyarasɨ pegua,
echa yandeYa Imbaepuere yae ete vae
oimeta maratu oyapo Caldeaɨgua reta jëtaguasu.
26Babilonia jovaicho reta,
¡peporepeña jese oipota rupi güi!
¡Peipea iyavatío reta!
¡Peyomboatɨ jese jeta vae jare opa pemboai!
¡Agüɨye etei mbae ave topɨta!
27¡Opaetei peyuka isundaro reta,
peraja mbaeyukaa pe rami!
¡Paravete! ¡Oväe ma iara,
oiporara yae reta vaerä!
28Babilonia güi otekuaraigüe reta yogüeru oväe Sión pe vae imiari, kërai yandeYa Tumpa oiporarauka Babilonia pe, itupao pe oyapogüe re.
29¡Pemboatɨ opaete uvɨ oikatu ojäa vae reta,
oporepeña reta vaerä Babilonia re!
¡Peyembojeyupa opaetei tëta guasu ikupe rupi,
agüɨye etei vaerä metei ave oasayepe!
¡Peiporarauka chupe reta, jeko reta oï rupi!#Sal 28.4; 137.8; Ap 18.6.
¡Peyapo chupe reta, jae reta oporoapo rami!
Echa jae reta ipɨapochɨ chekotɨ,
che Tumpa, iYoambae Israel pegua kotɨ.
30Jáeramo, itaɨrusu reta opata omano joka guasu rupi,
jare opaete isundaro reta omanota jókuae ara.
Che peYa ko jae kuae.”
31YandeYa Imbaepuere yae ete vae jei:
“Tëta guasu ipɨayemboete vae,
che ayemboyovaicho ndekotɨ;
oväe ara, reiporara yae vaerä.
32Tëtaguasu ipɨayemboete vae,
nepɨ̈sa-yeyukata jare regüɨapita,
jare mbaetɨta kia nemopüa vaerä.
Ayatapɨta opaete nerëta guasu reta re,
jare jókuae tata omboaita opaete ndeɨvɨrigua.”
33YandeYa Imbaepuere yae ete vae jei: “Israel pegua reta jare Judá pegua reta pe oiporarauka yae ñogüɨnoi. Jovaicho reta güɨnoi tembipɨɨrä, mbaetɨ oipota oyora reta. 34Ërei iyoraarä vae jae ko Imbaepuere yae vae; jae ko jee yandeYa Imbaepuere yae ete vae. Jae oyapota opaete mbae jupi vae chupe reta; güeruta mbɨakatu kuae tëtaguasu pe, ërei Babilonia pegua reta pe güeruta kɨɨye rai.”
35YandeYa jei:
“¡Che ambou ñeraro Babilonia pe jare pɨpegua reta pe!
¡Juvicha reta pe jare yarakuaa vae reta pe!
36¡Ou ñeraro maratuta vae imombeúa reta pe;
timbokere topɨta!
¡Ou ñeraro isundaro reta pe;
tiñamɨri reta!
37¡Ou ñeraro ikavayu regua reta pe
jare ikäretou pegua reta pe!
¡Ou ñeraro opaete sundaro reta omboepɨ imborɨarä vae reta pe,
ërei kuñaecha opɨta retata!
¡Ou ñeraro imbaembae reta jepɨ vae pe,
topɨ̈ro chugüi reta!
38¡Titɨpa iɨ̈aka reta;
opa totini chugüi reta!
Echa Babilonia jae ko tëtaguasu
itumpa-raanga pota yae vae,
jókuae rupi oyembopɨajopa reta.
39Jáeramo, Babilonia pe oyemboaitɨta mɨmba pochɨ vae reta jare aguarayaɨmba reta,#Ap 18.2. jare joko pe yogüɨrekota yandu reta. Ngaraa ye ma ipo, jekuae avei pegua. 40Opɨtata Sodoma, Gomorra jare tëta iyɨvɨrigua reta,#Gn 19.24-25. Tumpa opa omboai vae rami. Ngaraa ye kia ou oiko pɨpe, ani oasa jokoropi vae ave.#Is 13.20-22. Jei yandeYa.
41Matɨ ɨvɨtuguasu kotɨ güi,
tëtaguasu imbaepuere yae vae,
jeta vae mburuvicha guasu reta
oyeapo katu reta yogüeru vaerä.
42Jembiporu reta ñeraro pegua uvɨ jare mii;
ipɨa-pïrimbae reta ko jare mbaetɨ etei oporoparareko reta;
isapúkai reta ɨguasu jɨapu rami,
opo reta yogüeru kavayu re;
oïndaivi oñoraro reta vaerä Babilonia pegua reta ndive.
43Mburuvicha guasu Babilonia pegua oikuaa yave kuae re,
mbaetɨ oikuaa mbae oyapo vaerä okɨɨye güi,
ipɨatɨtɨ yae jare jasɨ chupe,
kuña imembɨ oa oï yave vae rami.#Jer 6.22-23.
44Mase, ayuta metei yaguapope Jordán pegua kaa tëɨ yae vae güi oë ojo kapii jokɨ katu vae pe rami, joko güi ambotekuaraita Babilonia pegua reta, jare ameeta oporookuai che aiparavo vae. Echa ¿kia pa chemboyovake? ¿Kia pa oyemboɨta cheve? ¿Kia nunga vecha iyangarekoa pa ipuereta cheré? 45Peyeapɨsaka kërai che peYa ayemongeta Babilonia kotɨ vae re; Caldeaɨgua reta iɨvɨ regua yemongeta ayapo vae: Vecha raɨ ave güɨraja retata, jare kapiirupa opata oyemboai. 46Babilonia jɨapu oa vae omokanata ɨvɨ; jɨapu ojo oyeendu ïru tëtaguasu reta rupi.”#Jer 49.18-21.
Currently Selected:
JEREMÍAS 50: GUABD
Highlight
Copy
Compare
Share
Want to have your highlights saved across all your devices? Sign up or sign in
Biblia DC Guaraní Bolivia © Bolivian Bible Society, 2001.
