SANTIAGO 2

Yayoparavoño vae regua

1Cherɨvɨ reta, perovia yandeYa Jesucristo re vae reta, agüɨye peyoparavoño pemae kavi oyoe. 2Güɨramoi oiketa peyemboatɨa pe kuimbae ipoäka-vera oro pegua vae jare oyemonde kavi vae, jare oike vi kuimbae paravete vae jemimonde ipächa vae. 3Jare pemae kavi yave jókuae oyemonde kavi vae re, jare pere yave chupe: “Eguapɨ kuae tenda ikavi vae pe”; ërei pere yave iparavete vae pe: “Eyemboɨ joko pe”, ani “eguapɨ ɨvɨ pe”, 4jökorai yave peporoparavo ma ko peï oyoupii. Peyeapo oporojäa vae rami peyemongeta kavimbae rupi.

5Cherɨvɨ aaɨu vae reta, peyeapɨsaka cheré. Tumpa oiparavo iparavete vae reta oikokatu vaerä iporogüɨrovia re jare güɨnoi vaerä imbaerä mborookuaía, jókuae Tumpa güɨrökuavee omee vaerä opaete güɨnoi mboroaɨu ikotɨ vae reta pe. 6Ërei pe reta peñeeasɨ katu paravete vae reta kotɨ. ¿Mbaetɨ pa peikuaa oikokatu vae reta ko pererekoasɨ katu vae jare pereraja mburuvicha reta jóvai vae? 7¿Mbaetɨ pa peikuaa oikokatu vae reta jei ikavimbae vae Jesucristo jee pemboete vae kotɨ vae?

8Peyapo yave jupi rupi mborookuai añetete vae, Tumpa Iñee pe jei rami, körai: “Eaɨu nderapicha nde reyeaɨu rami.”#Lv 19.18. Peyapo ko ikavi vae. 9Ërei peyoparavoño pemae kavi oyoe yave, peyoa ko. Mborookuai jei vae rupi teko pe ma ko pepɨta. 10Echa oime yave kia oyapo opaete mborookuai jei vae, ërei metei oyavɨ yave, oyavɨ ma opaete mborookuai. 11Echa jei: “Agüɨye eyuvanga menda re.”#Ex 20.14; Dt 5.18. Jei vi: “Agüɨye eporoyuka.”#Ex 20.13; Dt 5.17. Güɨramoi nde mbaetɨ reyuvanga menda re. Ërei reporoyuka yave, reyavɨ ma ko mborookuai. 12Pemiari kavi jare peiko kavi, echa Tumpa pejäata mborookuai oporoyora vae rupi. 13Echa kia mbaetɨ oiparareko japicha vae, Tumpa ojäata oipararekombae reve; ërei oporoparareko vae mbaetɨta oñejäa.

Mborogüɨrovia oyekuaa yayapo vae rupi

14Cherɨvɨ reta, güɨramoi kia jei güɨnoi ko mborogüɨrovia, ërei jembiapo reta mbaetɨ oyekuaa yave. Ngaraa omboasa iporogüɨrovia. 15Güɨramoi metei perɨvɨ ani pereindɨ mbaetɨ güɨnoi jemimonderä ani jembiurä. 16Jare metei pegüi jei yave chupe: “Tumpa ndiveño ekua, emboyoarambo nderemimonde jare ekaru”, ërei mbaetɨ omee chupe jókuae oata vae yave, jókuae jei vae mbaeä ko. 17Jökorai ko mborogüɨrovia, mbaetɨ jembiapo reta oyekuaa yave, mbaeä etei ko.

18Güɨramoi kia jeita: “Nde renoi mborogüɨrovia jare che oyekuaa cherembiapo reta.” Eechauka cheve ndeporogüɨrovia oyekuaambae reve nderembiapo reta. Jare che aechaukata ndeve cheporogüɨrovia cherembiapo reta rupi. 19Nde rerovia oime ko meteiño Tumpa. Jaekavi ko jókuae rerovia vae. Ërei aña reta vi güɨrovia jare orɨrɨi reta okɨɨye güi. 20Yarakuaambae vae, ¿reipota pa aikuaauka vaerä ndeve? Mborogüɨrovia jembiapo reta oyekuaambae vae, mbaeä etei ko. 21Nemaendúa ñaneñemuñagüe Abraham oyembojupiuka jembiapo rupi vae re, omee taɨ Isaac#Gn 22.1-14. mɨmba oyeyuka oyeapɨ jese vae re yave. 22Iporogüɨrovia oyekuaa jembiapo rupi, jare iporogüɨrovia oyembokavi yae jembiapo reta rupi. 23Jare oyembopo Tumpa Iñee pe jei vae: “Abraham güɨrovia Tumpa, jókuae iporogüɨrovia rupi omae jese jupi.#Gn 15.6. Jare Tumpa ombojee Abraham, jae ko ivɨa-ïru.”#2 Cr 20.7; Is 41.8.

24Jáeramo pepuere peecha kërai Tumpa ombojupi kuimbae jembiapo reta rupi, mbaetɨ ombojupi mborogüɨrovia reño. 25Jökorai vi Rahab aguasa rupi oiko vae oyembojupiuka jembiapo reta rupi, Israel pegua ñee jerajaa reta omboresive yave jo pe, jare omondo ye ambuae tape rupi yave.#Jos 2.1-21. 26Echa yanderete jekovembae, omano ma ko. Jökorai vi mborogüɨrovia jembiapo oyekuaambae, mbaeä etei ko.

Currently Selected:

SANTIAGO 2: GUABD

Highlight

Copy

Compare