GÁLATAS 6

Peyomborɨ mborɨ

1Cherɨvɨ reta, oime yave kia oyepokouka mbae ikavimbae vae oyapo yave vae, pe reta peguata kavi Tumpa kotɨ vae peñono kavi peñemomichi reve. Peyeandu reve, agüɨye vaerä pe vi peyapo mbae ikavimbae vae. 2Peyomborɨ mborɨ, pevoɨta ipoɨ vae re rami, jökorai pembopo Cristo iporookuai.

3Ërei oime yave kia oyembotuicha vae mbaeä reve, oyembotavɨ ko. 4Jayave, metei ñavo tomae kavi kërai mbae oyapo vae re, javoi ramo ipuere oyerovia iyé. Mbaetɨta ïru vae re. 5Metei ñavo toyapo kavi iparavɨkɨ ae.

6Tumpa iñee re oyemboe vae, tomee mbaembae güɨnoi vae güi imboea pe.

7Agüɨye peyembotavɨ. Tumpa oyeyóyai yoyaiukambae ko. Echa metei ñavo oyapogüe, jókuae ko oarɨvota.#Pr 22.8; Os 8.7. 8Echa kia oyapo yave isoo jemimbotaño, oarɨvota mano; ërei Espíritu Santo jemimbota oyapo vae, oarɨvota tekove opambae vae. 9Jare agüɨye yandekuérai#2 Ts 3.13. yayapo ikavi vae; echa mbaetɨ yandepɨtu yave, yaarɨvota iara pe. 10Jáeramo yandepuere yave, yayapo ikavi vae opaete vae pe, ërei yambotenonde oporogüɨrovia vae reta.

Pablo oyemboete yandeYa Jesucristo ikurusu re

11Mase, tuicha ko kuae chepo pe etei aikuatía peve vae. 12Oipota oyemboeteuka ïru vae reta pe vae, oipota peyembocircuncida, agüɨye vaerä oiporara reta Cristo ikurusu jeko pegua. 13Ërei jae reta etei oyapoä mborookuai jei vae, yepe tëi oyembocircuncidauka reta. Ërei oipota pe reta peyembocircuncidauka, jae reta oyemboete vaerä peré. 14Ërei yandeYa Jesucristo ikurusu reño ayemboeteta. Jesucristo re arovia ramo, chevegua ɨvɨ pegua teko omano, jare chupegua che amano vi. 15Echa Cristo Jesús re mbaeä ko yayembocircuncidauka vae ani mbaetɨ vae. Ikavi vae jae ko ñanoi vaerä tekove ipɨau vae.#Jn 3.3-7; 2 Co 5.17. 16Jare opaete kuae tekove ipɨau vae re yogüɨreko vae ndive toï Tumpa ipɨakatu jare iporoparareko, jare opaete Israel pegua reta Tumpa imbae vae ndive.#Sal 125.5; 128.6.

17Añave güive agüɨye kia tachemoambeko. Echa cherete re anoi chepere reta vae oikuaauka, yandeYa Jesús jembiokuai ko che vae. 18Cherɨvɨ reta, yandeYa Jesucristo ipɨakavi toï pe ndive. ¡Amén!

Currently Selected:

GÁLATAS 6: GUABD

Highlight

Copy

Compare