EZEQUIEL 33
33
Sundaro ɨvate güi omae vae iparavɨkɨ
(Ez 3.16-21)
1YandeYa jei cheve: 2“Nde kuimbae, nemiari nerëtaɨgua reta pe, ere chupe reta: ‘Che ambou metei tëta pe ñeraro yave, jare jókuae tëta pegua reta oiparavo metei kuimbae omae vaerä vae yave.#Is 21.6,11; Jer 6.17; Os 9.8. 3Jare jókuae omae vae oecha yave tovaicho reta yogüeru ikotɨ reta, jare omoñee mimbɨguasu omombarandu vaerä tëta pegua reta yave. 4Ërei kia nunga vae oendu reve mimbɨguasu iñee vae mbaetɨ güɨrovia, jare ou tovaicho reta oyuka yave, jaeiño ko jeko iyeupe imano re. 5Echa oendu tëi mimbɨguasu iñee, ërei mbaetɨ güɨrovia; jaeiño ko jeko iyeupe imano re. Ërei güɨrovia mimbɨguasu iñee vae güɨroasayepeta jekove. 6Ërei jókuae omae vae oecha tëi tovaicho reta yogüeru reve mbaetɨ omoñee mimbɨguasu tëta pegua reta oyemombarandu vaerä yave, jare tovaicho reta oyuka yave amogüe tëta pegua, jókuae omano vae, omano ko iyoa jeko pegua; ërei che aiporaraukata imano re jókuae omae vae pe.’
7Añave nde kuimbae, che roñono sundaro ɨvate güi omae vae rami, Israel iñemuña reta peguarä. Reenduta cheñee jare remombeuta chupe reta cheree re. 8Che jae yave iyoa vae pe, ¡remanota!; ërei nde mbaetɨ remombeu chupe oyepoepɨ vaerä jeko güi yave, jókuae iyoa vae omanota iyoa jeko pegua, ërei che aiporaraukata ndeve imano re. 9Ërei nde remombeu yave chupe oyepoepɨ vaerä jeko güi, jare jae mbaetɨ oyepoepɨ yave, omanota iyoa jeko pegua, ërei nde reroasayepeta nderekove.
Tumpa jupi ko
(Ez 18.21-32)
10Nde kuimbae, ere Israel iñemuña reta pe, körai: ‘Pe reta pere peyeupe: Yandepɨapochɨ jare yandeyoa reta jeko pegua ko opa ñakañɨtei ñaï. ¿Këraita ra yaikove jayave? 11Ere chupe reta: YandeYa Tumpa jei iyé aeño: Mbaetɨ aipota iyoa vae omano, aipota vae ko jae oyepoepɨ vaerä jeko güi oikove vaerä. Israel, eeya ndereko ikavimbae vae, ¿maera pa remanota?’
12Nde kuimbae, ere nerëtaɨgua reta pe: ‘Jupi rupi oiko vae iyoa yave, tenondegua imbaejupi reta ngaraa güɨroasayepe, jaeramiño vi iyoa vae oyepoepɨ yave jeko güi, ngaraa tenondegua iyoa reta jeko pegua omano. Jupi vae iyoa yave, tenondegua imbaejupi reta ngaraa oepɨ oikove oiko vaerä. 13Che jae yave jupi rupi oiko vae pe: ¡Reikoveta reiko!, ërei jae iyoa, oyererovia ramo jupi rupi oiko vae re yave, ngaraa aipapa chupe ikavi oyapo vae, omanota mbaeyoa oyapo vae jeko pegua. 14Che jae yave iyoa vae pe, ¡remanota!; ërei jae oyepoepɨ yave jeko kavimbae güi, jare oyapo ikavi vae jupi rupi, 15omee ye iya pe mbae opɨ̈rogüe ani oñomigüe, oyapo mborookuai tekove pegua jei vae jare oeya ikavimbae yave oikoveta ko, ngaraa omano. 16Ngaraa chemaendúa mbaeyoa reta oyapogüe re, echa oyapo ikavi vae jupi rupi, oikoveta oiko.’ 17Javoi nerëtaɨgua reta jeita: ‘YandeYa mbaetɨ oyapo mbae jupi rupi’, ërei jae reta ko mbaetɨ jupi rupi mbae oyapo. 18Jupi rupi oiko vae oyapo yave jupimbae, jare oyapo ikavimbae vae yave, omanota ko iyoa jeko pegua. 19Iyoa vae oyepoepɨ yave jeko kavimbae güi, jare oyapo yave ikavi vae jupi rupi, jókuae jeko pegua oikoveta ko. 20Ërei pere: ‘YandeYa mbaetɨ oyapo mbae jupi rupi.’ Ërei che pojäata Israel iñemuña reta metei ñavo pereko reta oï rupi.”#Job 34.11; Sal 62.11-12; Pr 24.12; Jer 17.10; Ez 18.30; Mt 16.27; Ro 2.6.
Jerusalén oyemboai vae regua
21Docea año, payandepoa yasɨ pandepo araa ma roiko tembipɨɨrä ïru ɨvɨ pe yave, metei kuimbae otekuarai Jerusalén güi vae ou omombeu cheve körai: “Tëta guasu oa ma tovaicho reta ipo pe.”#2 R 25.3-10; Jer 39.2-8; 52.4-14. 22Ërei jókuae pɨare, ndei ou oväe mbove otekuarai vae, yandeYa ipo oñono cheré; jare ndeimbove jókuae kuimbae ou oväe yave, yandeYa omee ye chemiari vaerä, jare mbaetɨ ma cheñeembae aiko.
Tëta pegua reta iyoa regua
23YandeYa jei cheve: 24“Nde kuimbae, jókuae Israel iñemuña reta jëta guasu reta opa oyemboaia rupi yogüɨreko vae reta, jei: ‘Abraham meteiño ko, ërei oiko ɨvɨ iyarä; ërei yande reta ko jeta ñaï, yandepuere vi ko yaiko ɨvɨ iyarä, echa yandembae ko.’ 25Jáeramo, ere chupe reta: YandeYa Tumpa jei körai: ‘Pe reta peu soo jugüɨ reve, pemboete tumpa-raanga jare peporoyuka, ¿perovia pa jökorai reve peikota kuae ɨvɨ iyarä? 26Peyerovia pekɨsepuku re, peyapo pɨ̈chɨi vae, metei ñavo peyemongɨa perapicha jembireko ndive peiko vae rupi, jökorai reve, ¿perovia pa peikota kuae ɨvɨ iyarä?’
27Ere vi chupe reta: YandeYa Tumpa jei iyé aeño körai: ‘Tëta guasu reta opa oyemboaia rupi yogüɨreko vae reta, omanota ñeraro pe, kaa rupi yogüɨreko vae reta ameeta mbaeporou pe opa vaerä jou, ɨ̈vavira re yogüɨreko vae, ani ɨvɨkua rupi ñogüɨnoi vae reta omanota mbaerasɨ ovakatu vae rupi. 28Jókuae ɨvɨ opata amboai jare opɨtata ipombae, ambopaata imbaepuere re oyembotuicha yae vae. Jare ɨvɨtɨ reta Israel pegua opɨtata ipombae; mbaetɨ eteita kia ave oasa jokoropi. 29Kuae ɨvɨ opa amboai jare opɨta ma ipombae, opaete mbae pɨ̈chɨi vae oyapo reta jeko pegua yave, oikuaa retata che ko jae peYa vae.’
30Nde kuimbae, tëta guasu ikësea iyɨ́vɨri rupi, jare o reta jöke rupi, nerëtaɨgua reta opuka ndekotɨ jei reta reve oyoupe: ‘Peyu, yaja yayeapɨsaka yandeYa iñee re, mbae ra jeita.’ 31Yogüeru ndekotɨ chembae vae reta rami, ñogüɨnoi nderóvai tenonde yave yogüɨrekose rami, oendu reta neñee, oyeapɨsaka reta neñee re. Ërei mbaetɨ oyapo reta oendugüe. Yepe tëi oikatu imiari reta vaerä pɨpe, ërei ipɨa reta korepoti pota reteiño. 32Jae reta omae nderé otairari kavi tairari mboropota pe vae rami jare iyaseo katu vae re omae ramiño; oyeapɨsaka reta neñee re, ërei mbaetɨ oyapo reta oendugüe. 33Ërei ngatu oyembopo ma yave remoërakua vae, oikuaa retata oime yepe oiko ñeemombeúa ipɨte reta rupi vae.”#Dt 18.21-22; Jer 28.9.
Currently Selected:
EZEQUIEL 33: GUABD
Highlight
Copy
Compare
Share
Want to have your highlights saved across all your devices? Sign up or sign in
Biblia DC Guaraní Bolivia © Bolivian Bible Society, 2001.
