EFESIOS 4

Ñemometei Espíritu rupi

1Che tembipɨɨ yandeYa re vae, pomoñera peguata kavi vaerä, Tumpa oenɨigüe reta oguata rami kavi: 2Peñemomichi reve, pepɨaguasu oyoupe peyoaɨu#Col 3.12-13. reve, 3pekɨ̈reɨ ngatu reve peiko metei rami Espíritu Santo oyapogüe rupi, mbɨakatu rupi; 4metei jeteño, jare metei Espíritu, Tumpa pereenɨi peporoäro vaerä metei ramiño; 5meteiño vi yandeYa, metei mborogüɨrovia, metei bautismo, 6metei Tumpa opaete vae Tu, jae ipo pe oï opaete mbaembae, oï opaete rupi jare opaete vae re.

7Ërei Cristo ko omee yandeve metei ñavo pe ipɨakavi jae oipota rami; 8oyekuatía oï rami:

“Oyeupi ɨvate, güɨraja reve tembipɨɨ reta,

omee mbota reta kuimbae reta pe.”#Sal 68.18.

9¿Mbae pa oipota jei “oyeupi” jei yave? Kuae ko oipota jei ogüeyɨ räri ɨvɨgüɨ ete pe. 10Jókuae ogüeyɨ vae, jae ko oyeupi ojo ɨvate yae opaete ara reta güi vae. Jökorai oï vaerä opaete re. 11Jare Cristo etei oñono amogüe temimondorä, ñeemombeuarä, ñee ikavi vae omoërakua vaerä, oporogüɨrovia vae reta iyangarekoarä, oporomboe vaerä. 12Jökorai oyapo, oñeñono tee vae reta ipɨ̈rata vaerä, jae reta ipuere vaerä oparavɨkɨ Tumpa pe, okuakuaa vaerä Cristo jete, 13yayeapo regua metei ramiño yandeporogüɨrovia pe, jare yaikuaa kavi vaerä Tumpa Taɨ. Yakuakuaa kavi vaerä, Cristo okuakuaa rami. 14Agüɨye vaerä mo yaiko michia rami. Oipotagüe yemboe pe yayererajauka vaerä. Echa mboromboe añetembae vae re oporomboe vae reta ipoki yae ko oporombotavɨ vaerä. 15Ërei jekuaeño yaiko añete vae rupi mboroaɨu reve, yakuakuaa vaerä Cristo oipota rami, jae ko oporogüɨrovia vae reta iñäka. 16Jese ko opaete jete jare opaete iyoapɨa pɨa oparavɨkɨ metei ramiño jare oyomborɨ päve iparavɨkɨ ae ae rupi, jökorai okuakuaa päve mboroaɨu pe.#Col 2.19.

Tekove ipɨau vae Cristo re

17Kuae jae peve pomoñera reve yandeYa jee re: Agüɨye mo peiko oporogüɨroviambae reta rami, iyemongeta ikavimbae rupi yogüɨreko vae reta rami, 18echa iyemongeta oyembopɨtumimbi ma. Mbaetɨ güɨnoi reta tekove Tumpa omee vae, mbaetɨ oikuaa reta ipɨatäta ramo; 19mbaetɨ etei imara reta, jáeramo oyapo reta ipuere rupi soo jemimbota pɨ̈chɨi yae vae.#Ro 1.21-25. 20Ërei pe reta mbaetɨ ko jökorai peyemboe Cristo re. 21Añetete ko peendu jare peyemboe jesegua yave, kërai Jesús re ko oï añete vae. 22Jáeramo, agüɨye mo peiko peikose rami. Peeya peyeugüi pereko indechigüe#Col 3.9. oñemona ikavimbae pe vae, pepɨa jemimbota yembotavɨ pegua. 23Pembopɨau pepɨa jare peyemongeta. 24Peyemonde teko ipɨau vae pe,#Col 3.10. Tumpa jae rami oyapo vae pe,#Gn 1.26. jupi vae pegua pe, oñeñono tee añetete pegua vae.

25Jáeramo, peeya mo apu, metei ñavo pemiari perapicha pe añete vae.#Zac 8.16. Echa opaete yande metei jeteño ko.#Ro 12.5.

26Pearasɨ yave, agüɨye peyoa.#Sal 4.4; Stg 1.1-20. Agüɨye kuaraɨ toike peve pearasɨ reve. 27Agüɨye peñemaeño aña guasu pe.

28Omaeñomise vae agüɨye ye mo tomaeñomi, toparavɨkɨ iyeupe, toyapo ipo pe mbae ikavi vae, ipuere vaerä omborɨ iporiau vae.

29Agüɨye etei pemoë ñee pɨ̈chɨi vae. Pemoë ñee ikavi vae, pemomɨ̈rata vaerä ïru vae reta, oyeapɨsaka peré vae reta omboyerovia vae. 30Agüɨye pembopɨatɨtɨ Tumpa iEspíritu Santo. Echa pɨpe Tumpa ñanemokañɨmaa yandereraja ete regua.

31Agüɨye peñovatu pepɨa pe, mbochɨ, arasɨ, yoaka, ñeeasɨ katu, jare opaete ikavimbae. 32Ërei pepɨakavi oyoupe, peyoparareko, peɨ̈ro oyoupe, Tumpa iñɨ̈ro peve Cristo rupi rami.#Col 3.13.

Currently Selected:

EFESIOS 4: GUABD

Highlight

Copy

Compare