3 JUAN 1
1
Tamaraeme
1Che oporogüɨrovia vae reta itenondegua, aikuatía ndeve cherɨvɨ aaɨu vae Gayo,#Hch 19.29; Ro 16.23; 1 Co 1.14. añete vae re.
2Cherɨvɨ aaɨu vae, aipota nde reiko kavi opaete mbaembae pe jare renoi vaerä tekove katu, reiko kavi ndeporogüɨrovia pe rami. 3Chemboyerovia yae amogüe yanderɨvɨ reta yogüeru kuae pe omombeu cheve kërai añete vae oiko ndepɨa pe jare reiko añete vae rupi.#2 Jn 4. 4Añete ko, ayerovia yae aendu yave kërai cheraɨ reta jekuaeño yogüɨreko añete vae rupi.
Gayo omborɨ ïru oporogüɨrovia vae reta
5Cherɨvɨ aaɨu vae, ikavigüe yae ko reyapo remborɨ yave oporogüɨrovia vae reta, ërei ikavi yae ete ko ketɨgua yave. 6Jae reta etei imiari ndeporoaɨu re oporogüɨrovia vae reta jóvai. Ikavi yae ko remborɨ reta vaerä Tumpa pe reyeokuai rami, ojo vaerä ojoa kotɨ. 7Echa jae reta oguata yogüɨreko oaɨu ramo Jesucristo, omboresivembae reve mbae oporogüɨroviambae vae reta güi. 8Jáeramo ikavi ko yande yamboresive jókuae nunga reta, echa jökorai yandepuere yamborɨ omoërakua vaerä añete vae.
Ikavimbae Diótrefes oyapo vae
9Che aikuatía oporogüɨrovia vae reta pe. Ërei Diótrefes oipotaä oyapo roe chupe oyapo vaerä vae, echa omomora oiko tenondeguarä. 10Jáeramo che aja yave pépɨri amboetata Diótrefes pe oyapo vae re. Echa jae imiari ikavimbae vae orekotɨ. Jare jokuaeñoä, mbaetɨ vi omboresive oporogüɨrovia vae ketɨgua, jare oyopia oipota tëi omboresive vae reta güi, jare omombo oporogüɨrovia vae reta ipɨte güi.
Opaete vae imiari kavi Demetrio re
11Cherɨvɨ aaɨu vae, agüɨye emomoe ikavimbae vae, emomoe ikavi vaeño. Ikavi vae oyapo vae Tumpa taɨ ko. Ërei ikavimbae vae oyapo vae mbaetɨ ko oikuaa Tumpa.#1 Jn 2.29; 3.6,9-10.
12Opaete vae imiari kavi Demetrio re. Echa jae oiko añete vae rupi. Ore vi romombeu peve jae jekuaeño oyapo ikavi vae. Jare peikuaa ore romombeu peve vae añete ko.
Tamaraeme reta
13Aipota tëi jeta aikuatía ndeve, ërei mbaetɨ aipota aikuatía ndeve tupapire rupi, 14echa aipota roecha jarembaeño, ñanemiari vaerä oyoova pe etei.#2 Jn 12.
15Tumpa ipɨakatu toï nde ndive. Yandevɨa-ïru reta omondo tamaraeme ndeve. Jökoraiño vi nde emombeu tamaraeme metei ñavo yandevɨa-ïru reta pe.
Currently Selected:
3 JUAN 1: GUABD
Highlight
Copy
Compare
Share
Want to have your highlights saved across all your devices? Sign up or sign in
Biblia DC Guaraní Bolivia © Bolivian Bible Society, 2001.