2 CORINTIOS 6
6
1Ore roparavɨkɨ Tumpa peguarä. Jáeramo pomoñera agüɨye vaerä peyuvangaiño Tumpa ipɨakavi re. 2Echa jae jei tembikuatía pe körai:
“Ou ma oväe aechauka vaerä cheporoaɨu,
jáeramo ayeapɨsaka nderé,
ou ma oväe yereroasayepe iara, jáeramo romborɨ.”#Is 49.8.
Mase, añave Tumpa ipɨakavi. Añave ko ara yemboasa pegua.
3Jekuaeño roiko kavi, agüɨye vaerä kia romboavai. Agüɨye vaerä oreparavɨkɨ kotɨ kia jei mbae ikavimbae. 4Jekuaeño roechauka ïru vae reta pe Tumpa jembiokuai ko ore vae. Mbɨaguasu rupi, tembiporara reta, mbaravete, mbɨatɨtɨ, 5ñenupa reta, tembipɨɨrɨru pe,#Hch 16.23. tekorai pe, mbaravɨkɨ tätagüe, topeɨ reta, yɨmbɨaɨ reta; 6jare vi teko ikɨambae rupi, arakuaa reta, rogüɨropɨa vae rupi, mbɨakavi rupi, Espíritu Santo rupi, añetete vae mboroaɨu rupi, 7ñee añete vae rupi, Tumpa imbaepuere pe, royapo avei jupi vae, 8oremboete vae, orereröɨro vae, oremoërakua pɨ̈chɨi vae, oremoërakua kavi vae, iyapu vae rami oreapo, yepe tëi oremiari añete vae, 9orekuaambae rami, yepe tëi orekuaa kavi, romano potaecha, ërei roikoveño roï, orenupa reta, ërei mbaetɨ romano. 10Orepɨatɨtɨ, ërei jekuaeño royerovia; oreparavete, ërei jeta ïru vae reta romboyekou; mbaetɨ etei mbae rogüɨnoi, ërei rogüɨnoi opaete mbae.
11Corintoɨgua reta, roe kavi yae ko peve, orepɨa roipea reve peve. 12Mbaetɨ ko oreporoaɨu re oreräkateɨ peve. Pe reta jökorai orekotɨ. 13Tachemiari peve metei kuimbae imiari imichia reta pe rami. Pe reta oreraɨu vi ore poaɨu rami.
Tumpa oikove vae jo ko yande
14Agüɨye peñemoïru oporogüɨroviambae vae reta ndive. Echa ¿këraita pa mbaejupi oñemoïru mbaejupimbae ndive?, ani ¿këraita pa tembipe oñemoïru pɨtumimbi ndive? 15¿Cristo oñemoïruta pa aña ndive?, ani ¿oñemoïruta pa oporogüɨrovia vae oporogüɨroviambae ndive? 16¿Tumpa jo oñemoïruta pa tumpa-raanga reta ndive? Echa pe reta ko jae Tumpa oikove vae jo.#1 Co 3.16; 6.19. Tumpa jei rami:
“Aikota jare aguatata ipɨte reta rupi.
Aikota jae reta iTumparä
jare jae reta yogüɨrekota chembaerä.”#Lv 26.12; Ez 37.27.
17Jáeramo jae jei vi peve körai:
“Peë jae reta ipɨte güi,
pesɨrɨ, jei yandeYa.
Agüɨye peyavɨkɨ mbae ikɨa Tumpa jóvai vae.#Is 52.11.
Jare che pomboresiveta.
18Jare che aikota peRurä,
jare pe reta peikota cheraɨrä jare cherayɨrä.
Jökorai jei yandeYa Imbaepuere yae vae.”#2 S 7.14; 1 Cr 17.13; Is 43.6; Jer 31.9.
Currently Selected:
2 CORINTIOS 6: GUABD
Highlight
Copy
Compare
Share
Want to have your highlights saved across all your devices? Sign up or sign in
Biblia DC Guaraní Bolivia © Bolivian Bible Society, 2001.
