1 TIMOTEO 2

Yemboe yerure regua

1Tenonde ete poyókuai peyerure vaerä pemoñera reve, peiporu jare pemee reve yasoropai Tumpa pe opaete vae reta re; 2mburuvicha guasu reta re, jare opaete mbaepuere güɨnoi vae reta re, yaiko pɨagüive vaerä, yamboete reve Tumpa jare oyoupi. 3Echa jókuae ko ikavi jare omboyerovia Tumpa Yandemboasa vae, 4jae oipota opaete vae oyemboasauka jare oikuaa kavi añete vae. 5Echa oime meteiño Tumpa. Jaeramiño vi oime meteiño ipuere oporomoñoövaiti Tumpa ndive vae. Jae ko kuimbae Cristo Jesús jee vae. 6Jae oñemee omano vaerä, oepɨ vaerä opaete vae.#Mt 20.28; Mc 10.45; Gl 1.4; Tit 2.14. Jare Tumpa oikuaauka kuae, iara pe kavi. 7Jare yandeYa cheparavo amombeu vaerä kuae regua. Jae cheapo jemimondorä, amboe vaerä judiombae vae reta mborogüɨrovia re jare añete vae re. Kuae che jae peve vae añete vae ko. Cristo jee re mbaetɨ ko cheapu.#2 Ti 1.11.

8Jáeramo aipota kuimbae reta oyerure vaerä Tumpa pe opaete kerupi rupi omopüa reve ipo, iyarasɨmbae reve jare ñerarombae reve. 9Jaeramiño vi kuña reta toyemonde temimonde ikavi vae pe, ërei agüɨye ïru vae reta oecha vaeräño. Agüɨye oasa ete toyemoambeko ia re, mbaembae oro pegua re, ita ipöra yae vae re ani temimonde jepɨ yae vae re.#1 P 3.3. 10Ërei toyapo mbaembae ikavi vae. Kuña reta oñemee Tumpa pe vae oyapo rami. 11Kuña oporomboete reve tikïrii toyemboe. 12Jare mbaetɨ amaeño kuña reta oporomboe vaerä jare güɨnoi vaerä mbaepuere kuimbae reta re, jaeño tikïrii. 13Echa Tumpa oyapo Adán#Gn 2.7. räri, jaɨkue rupi oyapo Eva;#Gn 2.21-22. 14Adán mbaetɨ ko oyembotavɨuka, kuña ko oyembotavɨuka. Jare oyembotavɨuka ramo oa mbaeyoa pe.#Gn 3.1-6. 15Kuña reta oyemboasa imembɨ yave. Ërei jekuaeño toporogüɨrovia jare toporoaɨu, toñeñono tee Tumpa peguarä. Jekuaeño toiko kavi.

Currently Selected:

1 TIMOTEO 2: GUABD

Highlight

Copy

Compare