1 CORINTIOS 4

Temimondo reta iparavɨkɨ

1Jáeramo pemae oreré, ore reta ko Cristo jembiokuai reta, Tumpa iyemongeta yaikuaa rapembae roikuaauka vae. 2Jáeramo tembiokuai ñavo ikavi ko yogüɨreko vaerä jupi rupi. 3Ërei pe reta chejäa yave ani ïru vae reta chejäa yave, mbaeä ko cheve. Che ave chepuereä vi añejäa. 4Yepe tëi chepɨa pe mbaetɨ aikuaa mbae ikavimbae re ayemboeko vaerä, ërei mbaetɨ jókuae güiño jekombae ko che. Echa yandeYa ko jae chejäa vae.#1 Jn 3.19-21. 5Jáeramo agüɨye peporojäa ndei iara mbove. Peäro yandeYa ou ye regua. Echa jae omboyekuaa kavita opaete mbaembae oñemi pɨtumimbi pe oï vae. Jare omboyekuaata opaete pɨa jemimbota. Jayave metei ñavo omboresiveta mbaemboete Tumpa güi.

6Cherɨvɨ reta, kuae amombeu ma peve ambojaanga reve cheyé jare Apolos re, poaɨu ramo. Peyemboe vaerä kuae roechauka peve vae rupi agüɨye pepía oyekuatía oï vae güi. Agüɨye vaerä metei vaeño pembotuicha ïru vae güi. 7Echa ¿kia pa ndembotuicha yae ïru güi? ¿Mbae pa renoi Tumpa omeeä ndeve reve? Tumpa ko omee ndeve opaete renoi vae. Jáeramo ¿maera pa reyemboete, ndeyeugüi aeño renoi rami?

8Pe reta peangapɨɨ ma, peikokatu ma jare peiko ma mburuvicha nunga. Mbae mona peyeapo mburuvicha añetete vae retarä, ore vi roï vaerä pe reta ndive. 9Echa ayemongeta ore temimondo reta Tumpa oreñono taɨkue ete opaete vae güi, royeyukata vaerä rami. Opaete vae omae vaerä oreré, araɨgua reta jare ɨvɨ pegua reta. 10Ore roï iyarakuaambae rami Cristo re rogüɨrovia ramo, ërei pe reta ko pearakuaa katu Cristo re. Ore ko jae ipɨ̈ratambae vae reta rami, jare pe reta ko jae ipɨ̈rata vae. Pe reta imboetea vae, ërei ore roñereröɨro. 11Añave regua roiporara yɨmbɨaɨ, ɨuve, nandi, ñenupa jare orero ave mbaetɨ. 12Orekangɨ ore etei roparavɨkɨ.#Hch 18.3. Ïru vae reta oyepopeyu oreré, ërei ore royerure jese reta. Ïru vae reta oyapo ikavimbae vae oreve, ërei ore rogüɨropɨa. 13Ïru vae reta oremoërakua pɨ̈chɨi, ërei ore oremiari kavi jese reta. Añave regua ïru vae reta omae oreré ɨtɨ rami, ɨtɨ osirivembae ma vae rami.

14Mbaetɨ aikuatía körai pomomarai vaerä. Pomboarakuaa ko cheraɨ aaɨu vae rami. 15Echa yepe tëi jeta pemboe Cristo re vae, ërei mbaetɨ ko jeta peru. Che ko jae peru rami Cristo Jesús re ñee ikavi vae amoërakua peve vae rupi. 16Jáeramo che pomoñera peiko vaerä che rami.#1 Co 11.1; Flp 3.17.

17Kuae jeko pegua amondo aï pekotɨ Timoteo. Jae ko cheraɨ aaɨu vae, jare jupi yandeYa kotɨ vae. Jae pemomaenduata kërai che aiko Cristo re, jare kërai amboe opaete rupi ñogüɨnoi oporogüɨrovia vae reta vae. 18Ërei amogüe pepɨte pe oyembotuicha, oyemongeta ngaraa ma aja pépɨri ramo. 19Ërei ajata ɨmambaeño pépɨri, yandeYa oipota yave. Jare aikuaata imbaepuere ra jókuae oyembotuicha vae reta ani iñeegüeño. 20Echa Tumpa iporookuaía ñeeñoä ko, mbaepuere ko. 21¿Mbae pa peipota? ¿Ajata pa pépɨri arasɨ reve ani mboroaɨu reve jare ñemomichi reve?

Currently Selected:

1 CORINTIOS 4: GUABD

Highlight

Copy

Compare