1 CORINTIOS 15

Omanogüe vae reta oikove ye vae regua

1Añave, cherɨvɨ reta, aipota pomomaendúa ñee ikavi vae amombeu peve vae re, jókuae perovia jese vae jare pepɨ̈rata jese vae; 2jese vi peyemboasauka pepɨ̈rata yave jókuae ñee amoërakua peve vae re, añetete peporogüɨrovia yave.

3Echa tenonde ete pomboe, che amboresivegüe, jae ko: Cristo omano yandeyoa reta re Tumpa Iñee pe jei rami;#Is 53.5-12. 4kërai oñeotɨ jare mboapɨ ara rupi oikove Tumpa Iñee pe jei rami;#Sal 16.8-10; Mt 12.40; Hch 2.24-32. 5jare oyekuaa Cefas pe,#Lc 24.34. jare jaɨkue rupi doce vae reta pe.#Mt 28.16-17; Mc 16.14; Lc 24.36; Jn 20.19. 6Jaɨkue rupi oyekuaa quiniento rupi vae oporogüɨrovia vae reta pe etei; jókuae reta güi oimeño jeta oikove vae, jare amogüe omano ma. 7Jaɨkue rupi oyekuaa Jacobo pe; jaɨkue rupi oyekuaa opaete temimondo reta pe.

8Jare taɨkue ete oyekuaa cheve vi.#Hch 9.3-6. Che ko metei michia omano oa vae rami. 9Echa che ko jae metei temimondo michi yae vae; mbaetɨ jupi ayembojee vaerä temimondo pe, echa ayapo yepi ikavimbae vae Tumpa re oporogüɨrovia vae reta pe.#Hch 8.3. 10Ërei Tumpa ipɨakavi rupi ko aï. Mbaetɨ ipɨakaviiño chekotɨ, echa aparavɨkɨ täta yae opaete ïru reta temimondo reta güi. Ërei mbaetɨ ko cheiño, Tumpa ipɨakavi omee cheve vae ko oparavɨkɨ. 11Echa che ra ani jae reta ra omoërakua peve Cristo regua, ërei jökorai pe reta perovia.

12Ërei ore romoërakua Cristo oikove ye ko omanogüe vae reta ipɨte güi yave, ¿maera pa amogüe pepɨte pe ñogüɨnoi vae jei mbaetɨ ko oikove ye omanogüe reta ipɨte güi vae? 13Echa mbaetɨ kia ipuere oikove ye omanogüe reta ipɨte güi yave, Cristo mbaetɨ ko oikove ye. 14Jare Cristo mbaetɨ ko oikove ye yave, romoërakuaiño ma ko, jare peporogüɨroviaiño ma vi ko. 15Jare jökorai ko yave, romombeu jaangaiño ma ko Tumpa regua. Echa ore romombeu kërai Tumpa omoingove ye ko Cristo, ërei mbaetɨ kia ipuere oikove ye yave, Tumpa mbaetɨta tëi ko omoingove ye Cristo. 16Echa omanogüe mbaetɨ ko oikove ye yave, Cristo mbaetɨta ko oikove ye; 17jare Cristo mbaetɨ ko oikove ye yave, peporogüɨroviaiño ma ko; jare jekuaeño ko peiko peyoa reta pe. 18Jökorai ko yave, Cristo re güɨrovia vae reta omano ma vae okañɨtei ko. 19Kuae ɨvɨ pe yaikove yaiko ramboeve ñaäro tëi yave yayerovia reve Cristo re, yandepɨatɨtɨ yaeta tëi opaete vae reta güi.

20Ërei Cristo oikove ye ko omanogüe reta ipɨte güi. Jae ko tenonde ete oikove ye omanogüe reta ipɨte güi vae. 21Echa mano oike kuae ɨvɨ pe metei kuimbae rupi, metei kuimbae rupi vi omanogüe oikove ye vae. 22Echa Adán rupi opaete vae omano, jökorai vi Cristo re opaete vae oikoveta.#Ro 5.12-18. 23Ërei metei ñavo jenda jenda pe kavi: Tenonde ete Cristo oikove ye; ërei Cristo ou ye yave, opaete güɨrovia jese vae reta oikove yeta. 24Javoi outa opaete mbaembae iyapɨ, omee ma yave iporookuaía yandeRu Tumpa pe, Cristo opa ma opɨ̈ro yave opaete mbaepuere opaete mburuvicha reta ara pegua jare ɨvɨ pegua jare oipotagüe mbaepuere güɨnoi vae güi. 25Echa oporookuai tai ko Cristo, opaete jovaicho reta opa regua oñono ipɨ igüɨ pe;#Sal 110.1. 26jare taɨkue ete tovaicho oyemboaita vae jae ko mano. 27Echa Tumpa omee ma Cristo pe mbaepuere omoamɨri vaerä opaete.#Sal 8.6. Echa jökorai oyekuatía oï, ërei kuae jei vae mbaetɨ oipota jei Tumpa etei vi oï ipo pe, echa jae ko omee mbaepuere chupe. 28Ërei opaete mbaembae oï ma Cristo ipo pe güire, jae etei vi oñeñonota oï vaerä Tumpa jeia re. Jökorai Tumpa oï vaerä opaete re.

29Jayave jókuae amogüe re oyembobautisauka vae reta ¿maera ra oyapo reta? Mbaetɨ ko omanogüe reta oikove ye yave, ¿maera ra oyembobautisauka omanogüe reta re? 30Jare ¿maera ra yaiko avei yemomburu rupi ara ñavo? 31Cherɨvɨ reta, ara ñavo amano vaerä aiko. Kuae añete ko, yerovia anoi peré yandeYa Jesucristo re vae rami. 32Che añeraro mɨmba pochɨ vae reta ndive Efeso pe. Ërei ¿mbae pe ra ikavi cheve? Omanogüe reta mbaetɨ ko oikove ye yave, yandepuere yae: “Yakaru jare yakau, echa pɨareve ñamanota.”#Is 22.13.

33Agüɨye peyavɨ. Jeko kavimbae reta ndive ñañemoïru yave, güɨrokomegua yandereko kavi. 34Pemae kavi, agüɨye peyoa. Echa amogüe pe reta mbaetɨ peikuaa Tumpa. Kuae jae peve pemara vaerä.

Kërai oikove ye omanogüe reta vae regua

35Ërei güɨramoi kia jeita: “¿Këraita ra oikove ye omanogüe vae reta? Jare, ¿këraita ra jete?” 36Jökorai jei vae mbaetɨ ko yarakuaa. Echa metei temitɨ jäɨgüe ñañotɨ yave, omano ko jeñɨi vaerä. 37Jare jókuae ñañotɨ vae, iagüeä ko, jäɨgüe ko ñañotɨ; trigo jäɨ ani ïru temitɨ jäɨ; 38Ërei Tumpa oyapo jókuae temitɨ jäɨ güi, jare oipota rami. Jare jäɨ reta jökorai vi oyapo. 39Jaeramiño vi mbaetɨ ko oyovake opaete vae jete. Echa kuimbae jete ambuaeyee ko, jare mɨmba jete ambuaeyee ko, jare jevae ɨ rupigua jete ambuaeyee ko, jare güɨra jete ambuaeyee vi. 40Jaeramiño vi oime mbaembae ara re oï vae, jare oime mbaembae ɨvɨ pe oï vae. Ërei ara re oï vae ipöra ambuaeyee ko kuae ɨvɨ mbaembae oï vae ipöra güi. 41Ipöra ko kuaraɨ, yasɨ jare yasɨtata reta. Ërei ipöra pe oyoavɨ oyougüi. Jaeramiño vi opaete yasɨtata ñavo ipöra pe oyoavɨ oyougüi.

42Jökoraita vi omanogüe reta oikove ye yave. Echa oñeotɨ vae oikomegua. Ërei oikove yeta vae oikomeguambae ko. 43Oñeotɨ vae oikomegua, ërei oikove ye yave, ipöra yaeta ko. Oñeotɨ vae, mbaetɨ etei güɨnoi mbaepuere, ërei oikove ye yave, imbaepuere yaeta ko. 44Omanogüe oñeotɨ vae, jete ɨvɨ pegua ko. Ërei oikove ye yave, ara pegua ko. Oime ko jete ɨvɨ pegua, jare oime vi jete ara pegua.

45Echa oyekuatía oï körai: “Tumpa omee tekove kuimbae tenondegua Adán pe.” Ërei Adán taɨkuegua vae ko tekove omee vae. 46Ërei ara pegua tenondeä oï. Ɨvɨ pegua tenonde oï, jare taɨkue oï ara pegua. 47Kuimbae tenondegua vae ɨvɨ pegua ko. Echa Tumpa oyapo ɨvɨ güi.#Gn 2.7. Ërei kuimbae taɨkuegua vae ko jae yandeYa ara güi ou vae. 48Yanderete ɨvɨ pegua oyovake kuimbae reta jete ndive. Jaeramiño vi yanderete ara pegua oyovaketa kuimbae ara pegua jete ndive.

49Yaguakatu ma kuimbae ɨvɨ pegua. Jaeramiño vi yaguakatuta kuimbae ara pegua.

50Cherɨvɨ reta ërei kuae jae peve: Yanderete ɨvɨ pegua ngaraa oike Tumpa iporookuaía pe. Jaeramiño vi mbae oikomegua vae ngaraa oike oikomeguambae oïa pe. 51Mase, tamombeu peve oyekuaambae vae. Ngaraa opaete ñamano. Ërei opaete yayepoepɨta, 52metei jeia pe, ñaneresapïri rami Tumpa jemimbɨguasu opa oñee yave. Echa omoñeeta mimbɨ guasu, jare omanogüe reta oikove yeta oikomeguambae vaerä, jare yande yayepoepɨta.#1 Ts 4.15-17. 53Echa oikomegua vae oyepoepɨ tai ko oikomeguambae pe. Jare omano ngatu vae oyepoepɨ tai ko omanombae pe. 54Jare ñanoi yave yanderete ngaraa etei oikomegua vae yanderete oikomegua vae ipoepɨka pe, jare ñanoi yave yanderete ngaraa etei ipuere omano vae yanderete ipuere omano vae ipoepɨka pe, jayave oyembopota Tumpa Iñee pe oyekuatía oï vae, echa jei: “Tumpa omoamɨri mano.#Is 25.8. 55Mano ¿ketɨ pa aipo reï? ¿ketɨ pa oime nepɨ̈pia reporomoamɨri pɨpe vae?”#Os 13.14. 56Echa mano ipɨ̈pia jae ko mbaeyoa. Jare mbaeyoa imbaepuere mborookuai rupi. 57Ërei ñamee yasoropai Tumpa pe. Echa jae omoamɨri mano yandeve yandeYa Jesucristo rupi.

58Jáeramo, cherɨvɨ aaɨu vae reta, peñemoäta ngatu jare peñemomɨ̈rata, peparavɨkɨ avei yandeYa pe, echa peikuaa kërai mbaetɨ ko peparavɨkɨiño yandeYa pe.

Currently Selected:

1 CORINTIOS 15: GUABD

Highlight

Copy

Compare