1 CORINTIOS 11

1Peiko che aiko rami.#1 Co 4.16; Flp 3.17. Che Cristo oyapo vae ayapo rami.

Kuña reta jemimonde regua

2Cherɨvɨ reta, pombotuicha, echa jekuaeño pemaendúa cheré, jare peyapo che pomboe jese vae.#2 Ts 2.15. 3Ërei aipota peikuaa kavi Cristo ko jae kuimbae iñäka, jare kuimbae jae ko kuña iñäka jare Tumpa jae ko Cristo iñäka. 4Opaete kuimbae oyerure Tumpa pe yave ani omoërakua Tumpa iñee ïru vae reta pe oñeäka-soi reve yave, metei ñemomarai ko. 5Ërei metei kuña oyerure Tumpa pe yave ani omoërakua Tumpa iñee ïru vae reta pe oñeäka-soimbae reve yave, metei ñemomarai vi ko; echa oñeapiasɨ vae rami ko. 6Echa kuña oñeäka-soimbae vae toñeapi vi. Ërei imara oyasɨa ia ani oñeapiasɨ yave, toñeäka-soi. 7Echa kuimbae mbaetɨ jaekavi oñeäka-soi vaerä. Echa Tumpa oyapo #Gn 1.26-27. kuimbae jae rami, iyemboetearä. Ërei kuña ko jae kuimbae iyemboetea. 8Echa kuimbae mbaetɨ ko oyeapo kuña güi. Kuña ko oyeapo kuimbae güi; 9jaeramiño vi kuimbae mbaetɨ oyeapo kuña jeko pegua. Kuña ko oyeapo kuimbae jeko pegua.#Gn 2.18-23. 10Jáeramo, kuña toñeäka-soi oikuaauka vaerä oï ko ime jeia re, araɨgua reta jeko pegua. 11Ërei yandeYa jóvai kuimbae mbaetɨ ipuere oiko kuñambae reve, jökoraiño vi kuña mbaetɨ ipuere oiko kuimbaembae reve. 12Echa kuña oyeapo ko kuimbae güi, jare kuimbae oa kuña güi. Ërei Tumpa oyapo opareve.

13Pe reta etei peecha: ¿Jaekavi ra kuña oyerure vaerä Tumpa pe oñeäka-soimbae reve? 14Opaete vae yaikuaa ko metei kuimbae omaeño ia okuakuaa vae, metei ñemomarai ko. 15Ërei metei kuña omaeño ia okuakuaa vae, mbaetɨ ko ñemomarai. Echa Tumpa omee kuña pe ia puku vaerä äka-soia jekovia pe. 16Ërei oime yave kia oipota oyoaka kuae re vae, toikuaa kërai ore ani oporogüɨrovia vae reta Tumpa imbae reta mbaetɨ ko jökorai orereko.

Ikavimbae oyapo Santa Cena kotɨ vae

17Ërei añave kuae aikuatía peve vae, mbaetɨ chepuere pombotuicha, echa peyemboatɨ yave, peyapo ikavimbae vae, ikavi vae peyapo vaerägüe. 18Kuae räri tae peve: Jërakua cheve kërai peyemboyao oyougüi, peyemboatɨ yave pemboete vaerä Tumpa. Jare arovia güɨramoi añete ko. 19Echa oime tai ko yemboyao reta pepɨte pe, añetete oporogüɨrovia vae reta oyekuaa vaerä pepɨte pe. 20Jáeramo peyemboatɨ tëi peyapo Santa Cena vae, jaeä ko Santa Cena. 21Echa pekaru yave pe räri voi pemboɨpɨ peu tembíu perugüe, jáeramo amogüe iyɨmbɨaɨ, jare ïru vae oyembosavaɨpo. 22¿Mbaetɨ pa pero pekaru jare peɨu vaerä joko pe? ¿Maera pa peröɨro oporogüɨrovia vae reta Tumpa imbae reta jare pemomarai mbaetɨ etei mbae güɨnoi vae reta? ¿Mbae pa jaeta peve? ¿Pomboeteta ra jókuae re? ¡Ngaraa ko!

Pablo oporomboe Santa Cena re

(Mt 26.26-29; Mc 14.22-25; Lc 22.14-20)

23Che amombeu peve, yandeYa güi amboresive vae, jae ko kuae: YandeYa oipɨɨ mbɨyape jókuae pɨ̈tu oñemeeta omano vaerä yave, 24jare Tumpa pe yasoropai omee jese güire, opɨ̈saa jare jei: “Peu. Kuae ko jae cherete peré omano vae. Peu kuae, pemaendúa reve cheré.” 25Jaeramiño vi yandeYa oipɨɨ kopa opa ma okaru reta yave, jei reve: “Kuae vino ko jae morogüɨrökuavee päve#Ex 24.8; Jer 31.31-34. ipɨau vae cherugüɨ pe ayapo vae,#Ex 24.6-8. kuae peu ñavo, peyapo pemaendúa reve cheré.” 26Jökorai mbɨyape jare vino peu ñavo, pemoërakua ko yandeYa imano, jae ou ye regua.

Santa Cena pe oguapɨ jupimbae reve vae regua

27Jáeramo oime yave kia jou mbɨyape jare vino Santa Cena pe jupimbae reve vae, oyemboeko ko yandeYa jete jare jugüɨ re. 28Jáeramo metei ñavo tomae kavi iyé, jayave tou jókuae mbɨyape jare jókuae vino. 29Echa oime yave kia jou mbɨyape jare vino jupimbae reve, omae kavimbae reve yandeYa jete re, jae aeño ko oyemboeko jou vae rupi. 30Kuae jeko pegua jeta pepɨte pe imbaerasɨ jare ipɨtu vae; jare jeta omano vae. 31Echa ñamae kavi yandeyé yave, yandeYa ngaraa yandemboeko. 32Ërei yandemboeko ramo yandeYa oiporarauka yandeve, agüɨye vaerä yayemboeko oporogüɨroviambae vae reta ndive.#Dt 8.5; Heb 12.5-11.

33Jáeramo, cherɨvɨ reta, peyemboatɨ pekaru vaerä yave, peñoäro. 34Ërei oime yave kia iyɨmbɨaɨ, tokaru jëta pe, agüɨye vaerä peyemboatɨ peyemboekouka vaerä. Ïru mbaembae reta ayapokatuta aja pépɨri yave.

Currently Selected:

1 CORINTIOS 11: GUABD

Highlight

Copy

Compare