Aŵaloma 14

1Sombi uyo, uli nekucetekela ukunacile, ŋgamumupoke, sombi tekulukucite'fyo mukupicisya ifyakukanika. 2Umbi umuntu ali nekucetekela ukwakulya ifintu fyonse; sombi umbi unacile alalya imbuto syeŋka, 3Popele uyo ulya, emupufyo'yo utaalya-po; kaŵili uyo utaalya-po, emweŵo'yo ulya; pakuti ŵaLesa ŵalimupokele. 4Mbaniwenani, weweŵa umupyunjisi wamuntu umbi? Mulandu wawisikulu umwine kani alukwimakana kani kuwa, Sombi akemakana, pakuti ŵaSikulu ŵali nemakosa akumwimakanika.

5Umuntu umbi aleŵa ati akasuŵa kambi kalicilile uŵuleme napakaŵyakwe; umbi naye alatutota tonse pamo. Aŵantu ŵonse ŋgaŵesiŵe bwino mumitima yaŵo aŵene. 6Uyo ulaŋguluka akasuŵa, alakalaŋguluka ukucindika ŵaSikulu: nawoyo naye utaalaŋguluka akasuŵa, alawulo'kukalaŋguluka ukucindika ŵaSikulu. Uyo ulya, alalya ukucindika ŵaSikulu, pakuti alatota ŵaLesa; nawoyo naye utaalya-po, alaŵulo'kulyapo ukucindika ŵaSikulu, nekulukuŵatota ŵaLesa. 7Pakuti, pali fweŵo tapalipo uliikalila nemweo, neli ulifwila, yo. 8Pakuti kani twikale nemweo, tulukwikala ukucindika ŵaSikulu; kani tufwe, tulukufwa ukucindika ŵaSikulu; pakuti pali fyefyo, kani twikale nemweo, kani tufwe, tuli ŵaŵaSikulu. 9Pakuti pali fifi ŵaKlistu ŵalifwile, nekwikala liŵili nemweo, ati ŵaŵe niŵaSikulu ŵaŵafwile neŵalaŵi. 10Sombi weŵo, mbanindo umweŵelo' mukwanu? Kani naweŵo, mbanindo umupufisyo'mukwanu? Pakuti fwense tukemakana peteŵe lyaŵaLesa ilyakusololola. 11Pakuti fililembelwe ati:

ŴaSikulu ŵalilaŵile ati:

Koti nifyopele'fyo ifi njikele nemweo, amakufi onse akenamisya pali neŵo;

Nemini syonse nasyo sikafisulula kuli ŵaLesa.

12Fyopele'fyo fweŵo fwense tukalukulituŵila kuli ŵaLesa.

13Pakuti pali fyefyo twieŵansyanya nafimbi, yo; sombi tanje cine mulaŋguluke'fi, ati aŵantu ŵonse neli umo tekuteyo'muŵyakwe munsila yakwe, neli kuteka icakumututula. 14Ndiisi icine, nditekenesiwe kumano aŵaSikulu Yesu, ati tapali-po icintu neli cimo iciŵipile; sombi uyo uceŵe'cintu ati ciliŵipile, kuli woyo eciŵipile. 15Pakuti kani umukwanu ali nensoni pakuti pali fyefyo ifi ulya, tolukwenda ŵukumo muŵutemwe. Tekumonala nefyakulya fyoŵe uyo uŵafwilile ŵaKlistu. 16Tekusumina lomba ati ifiweme fyoŵe filaŵisiwe; 17pakuti Uŵufumu bwaŵaLesa taŵuli kulya nekunwa, sombi kuluŋgama neŵutende nekusemba ukwamuMupasi Uswetelele. 18Pakuti uyo ulukuŵapyunjila ŵaKlistu muli fyefyo alukutemwesya ŵaLesa, nekutotwa kuŵantu. 19Pakuti pali fyefyo ŋgatufilonde'fintu ifileto'ŵutende, nafyefyo ifi twisi ukukosyansyanya-ko mumitima. 20Tekuwisya imilimo yaŵaLesa, pakuti pafyakulya. Ifintu fyonse icine filiswetele; naŋgawe'fyo fili fiŵipile kuli woyo ututwisya umuŵyakwe pakulya-po. 21Ukwelelwa ukukano' kulya ifinani, neli kunwa-po imfaina, neli kucite'fintu fimbi, ifyakulitutula-ko umukwanu, neli kuliteya, neli kulinasya. 22Ukucetekela uko uli nako, ulilamine wemwine pamenso aŵaLesa. Alisyucile uyo utalieŵa ifyafyefyo ifi asumina. 23Sombi uyo ukanika alisininwe kani alye, pakuti alukulya pakuŵulo'kucetekela. Popele ifintu fyonse ifitafili fyakucetekela kuŵifya!

Currently Selected:

Aŵaloma 14: AAL59

Highlight

Copy

Compare