Ifisimpi 2
2
1Wemwana wanji, kani wakusumina amasiwi anji,
Nekufisa nemafunde anji muli weŵo,
2Ati ukutike mukumfwa amano,
Nekuposa nemutima woŵe mukuŵa nekalaŋgo;
3Icine, kani ulukulilile'milaŋgwe,
Nekukaŵilicisisya akalaŋgo;
4Kani ulukukafwaisya koti lisilifa,
Nekukafwaya-fwaya koti maŵoni afiseme;
5Telyo ukesiŵa bwino ukuŵatina ŵaYawe,
Nekuŵona nemano aŵaLesa.
6Pakuti ŵaYawe ewapela amano;
Mukanwa kaŵo emufuma amano nekalaŋgo,
7Ŵalalama amano aweme akuŵasicimene,
Ŵali niŋgawo yaŵantu aŵalukwenda nemitima iluŋgeme.
8Ati ŵalame insila syakusoŵolola bwino,
Nekulama nensila yawaluŋgeme ŵaŵo.
9Eli ukesiŵa ifyakulunjika nekusoŵolola bwino,
Nekuŵaaŵila ukuluŋgeme: nensila isiweme syonse.
10Pakuti amano akenjila mumutima woŵe,
Nekwisiŵa nako kukatemwesya ubwine ŵoŵe;
11Ukucenjela kukakulama bwino,
Akalaŋgo kakakulama;
12Mukukupulusya kunsila yaŵakuŵifya,
Nakuŵantu aŵalaŵila amasiwi akuleŋgulula;
13Aŵafuma-mo munsila syaŵasicimene,
Mukwenda munsila syamfinsi;
14Aŵasemba pakulukucite'fiŵipile,
Nekulukusaŋgalala pakuti pafyakuleŋgulula fyakuŵifya;
15Aŵo insila syaŵo sipeteme,
Aŵaŵeyama munsila syaŵo.
16Kaŵili nekukupulusya kumwanakasi umwensu,
Icine kumwanakasi uyo umwensu utemasya nemasiwi akwe,
17Wopele euleka intanjisi yabwanice bwakwe,
Nekuluŵa-ko nekulayana kwaŵaLesa ŵakwe;
18Pakuti iŋanda yakwe ilisendamine kumfwa,
Nensila syakwe silukusendamina kuŵafwile.
19A ŵantu ŵonse uya kuli ye taabwelelapo neli umo,
Neli kukumana kunsila syamweo.
20Ati wakulukwenda munsila yaŵaweme,
Nekwenda mweŋka munsila syaŵaluŋgeme,
21Pakuti aŵasicimene mumitima eŵakalukwikele mucalo,
Neŵawaminine eŵakasyala-mo.
22Sombi aŵakuŵifya ŵakaŵatema mucalo,
Neŵakufumba naŵo ŵakaŵanukulamo.
Lamba Bible Version © United Bible Societies, 1959.