Ifya Ŵalefai 23
23
1Lomba ŵaYawe ŵalilaŵile kuli Mose ati: 2Ulaŵile kuŵaIsilaeli, uŵaŵule ati, Ifitenje fyaŵaYawe ifyansicilwe, ifyo ifi mukatulisya ati mete aswetelele, ifyo efitenje fyanji ifyansicilwe.
3Pansiku sisanu nakamo imilimo ikalukucitwa; sombi pakasuŵa kaŵusisanu nasiŵili nipali sabata uwakutusya kwa nsoni, nipabwite uŵuswetelele; tekuti mucite imilimo yonse lukoso: nisabata uwakuli ŵaYawe monse mumananda enu.
4Ifitenje fyaŵaYawe, amete aswetelele, ayo mukatulisya pampindi yafiko iyansicilwe nififi:
5Pamwensi wakutaŋga pakasuŵa kamwensi akekumi nasine iciŋgulo nipamuciluko waŵaYawe. 6Kaŵili pakasuŵa kekumi nasisanu akamwensi wopele nipacitenje cafimpwampwa ifyakuŵulo'musuŋga icakuli ŵaYawe: insiku sisanu nasiŵili mukalukulye'fimpwampwa ifyakuwulo'musuŋga. 7Pakasuŵa kakutaŋga mukalukuli nebwite uŵuswetelele: tesi mukacite imilimo yonse iyaŵupyunjisi. 8Sombi mukapose icakuŵaposela ŵaYawe icamumulilo insiku sisanu nasiŵili; pakasuŵa kaŵusisanu nasiŵili nipabwite uŵuswetelele; tesi mukacite imilimo yonse iyaŵupyunjisi.
9Kaŵili ŵaYawe ŵalilaŵile kuli Mose ati: 10Ulaŵile kuŵaIsilaeli uŵaŵule ati, Ili mukenjila mucalo ico ici nakumupeleni, lomba pakuloŋgela ukuteŵula kwakuko, eli mukalete umupo wafyamutulu ifyakuteŵula kwenu kumupapatilisi; 11popele ye akaukupale umupo pamenso aŵaYawe ati upokelelwe pakuti pali mweŵo: ŋgamailo pakusila sa bata epo aŋgaukupala umupapatilisi. 12Popele pakasuŵa kopele ako aka mukakupala-ko umupo, epo mukapose umwana wambelele umwalalume ati kuŵaposela ŵaYawe ukwamumulilo. 13Kaŵili ukuposa ukwawuŋga ukwakuko kukalukuli fyakwesya fiŵili pekumi fyakwe efa wawuŋga uŵupelekele bwino uŵusaŋkene nemafuta, ukuŵaposela ŵaYawe ukwamumulilo ati kunuŋko'kuweme: kaŵili ukuposa ukwakunwa kukalukuli kwamfaina, icakwesya cimo pali fine icakwe cini. 14Kaŵili tesi mukalye siŋkwa neli nitiligu uumine kumulilo, neli wamumitwi uwaŵukumo, ili takaŋgafika akasuŵa ako kopele, ili tamuŋgaleta umulambu waŵaLesa ŵenu: Iifunde ilyamuyayaya ponse pafitentekwa fyenu monse mumananda enu.
15Popele mukalipendele ukutatika ŋgamailo pakusila sabata, ukutatika pakasuŵa ako aka mwaletele-ko umupo uwakuposa ukwakukupala; pakalukuli ŵasabata ŵasanu naŵaŵili aŵaŵuluŵulu; 16ukufika ŋgamailo pakusila sa bata waŵuŵasanu naŵaŵili mukapende insiku amakumi asanu; popele mukaŵaposele ŵaYawe ukuposa kwaŵukumo ukwawuŋga, 17Mukafumye mumananda enu ifimpwampwa fyasiŋkwa ifyakukupala fiŵili ifyakwesya fiŵili pekumi ifyakwe efa; fikalukuli fyaŵuŋga uŵupelekele bwino, fikociwe pamo nemusuŋga, ati fyamutulu ifyakuli ŵaYawe. 18Kaŵili pamo nasiŋkwa mukapele aŵana ŵambelele ŵasanu naŵaŵili, aŵakuŵule'fisemba, aŵakukumana umwaka umo lukoso, nemwana waŋombe umo, nembelele isyalalume siŵili; sikalukuli kuŵaposela ŵa Yawe ukwamumulilo, pamo nekuposa kwaŵo ukwawuŋga nekuposa kwaŵo ukwakunwa, ekuŵaposela ŵaYawe ukwamumulilo, ukwakunuŋko'kuweme. 19Popele mukapose pepe umo ati kuposa ukwapafyakuŵifya, netwana twambelele utwalalume tuŵili utwamwaka umo ati mulambu uwafyakuposa ifyaŵutende. 20Lomba umupapatilisi akasikupale pamo nasiŋkwa wamutulu ati kuposa ukwakukupala pamenso aŵaYawe, pamo netwana twambelele toŵilo; sikalukuli siswetelele kuli ŵaLesa pakuti pamupapatilisi. 21Peŋka pakasuŵa ako kopele ukatulisye: pakamuŵeleni ubwite uŵuswetelele; tesi mukacite imilimo yonse iyaŵupyunjisi: Iifunde lyamuyayaya monse mumananda enu ponse pafitentekwa fyenu.
22Lomba pakuteŵula mumaŵala enu, tesi ukaceselele monse mumikoŋko yeŵala lyoŵe, neli kola ifyakupupula lukoso ifyafyakulya fyoŵe; ukaŵasile aŵapeŋgele neŵensu: neŵo nineŵaYawe Lesa wenu.
23Kaŵili ŵaYawe ŵalilaŵile kuli Mose ati: 24Ulaŵile kuŵaIsilaeli ati, Pamwensi waŵuisanu naiŵili, pakasuŵa kakutaŋga akamwensi uyo pakalukumuŵeleni ukutusya kwansoni, ukwanuka kwakulisya kwampeŋga, ubwite uŵuswetelele. 25Tekuti mucite imilimo yonse iyaŵupyunjisi; kaŵili mukaŵaposele ŵaYawe ukuposa kwamumulilo.
26Kaŵili ŵaYawe ŵalilaŵile kuli Mose ati: 27Naŋgawe'fyo pakasuŵa kekumi akamwensi uyo uwaŵuisanu naiŵili nipakasuŵa kakulamwina: pakalukumuŵeleni ubwite uŵuswetelele; lomba mukalukulipensya imitima yenu; kaŵili mukaŵaposele ŵaYawe ukuposa ukwamumulilo. 28Lomba tekuti mucite imilimo yonse pakasuŵa ako kopele; pakuti kasuŵa kakulamwina, mukumucitileni ukulamwina pamenso aŵaYawe Lesa wenu. 29Pakuti imitima yonse lukoso utaukakululuka pakasuŵa ako kopele, eukapinikwa pakati paŵantu ŵauko. 30Kaŵili imitima yonse lukoso uwakucite'milimo yonse pakasuŵa ako kopele, uyo-muntu ŋkamonala pakati paŵantu ŵakwe. 31Tekuti mucite imilimo yonse lukoso: Iifunde lyamuyayaya ponse pafitentekwa fyenu monse mumananda enu. 32Pakulukumuŵeleni nisabata wakutusya kwansoni; lomba mukalukulipensya imitima yenu; pakasuŵa kamwensi akaŵusisanu nasine iciŋgulo, ukutatika paciŋgulo ukufika nakuciŋgulo, eko mukalukulama sabata wenu.
33Popele ŵaYawe ŵalilaŵile kuli Mose ati: 34Ulaŵile kuŵaIsilaeli ati, Pakasuŵa kekumi nasisanu akamwensi uno uwaŵuisanu naiŵili nipacitenje camitanda insiku sisanu nasiŵili icakuli ŵaYawe. 35Pakasuŵa kakutaŋga pakalukuli ubwite uŵuswetelele; tesi mukacite imilimo yonse iyaŵupyunjisi. 36Insiku sisanu nasiŵili mukalukuŵaposela ŵaYawe ukuposa ukwamumulilo; pakasuŵa kaŵusisanu nasitatu pakalukumuŵeleni ubwite uŵuswetelele; lomba mukaŵaposele ŵaYawe ukuposa ukwamumulilo: Iiwuŋgano lyansoni; tekuti mukacite imilimo yonse iyaŵupyunjisi.
37Ifyo fitenje fyaŵaYawe ifyansicilwe, ifi mukatulisye ati mete aswetelele, mukuŵaposela ŵaYawe ukuposa ukwamumulilo, ukuposa ukwakoca, nekuposa ukwawuŋga, nemulambu uwakwipaya, nekuposa ukwakunwa, konse pakasuŵa kakuko kwine; 38peulu pali ŵasabata ŵaŵaYawe, nempese syenu, nekulapa kwenu konse, nefyakupa fyenu fyonse ifili koti mitima, ifyo ifi muŵapela ŵaYawe.
39Naŋgawe'fyo pakasuŵa kekumi nasisanu akamwensi waŵuisanu naiŵili, pakuloŋgela ifisepo ifyamucalo, mukalukulama icitenje caŵaYawe insiku sisanu nasiŵili; pakasuŵa kakutaŋga pakalukuli ukutusya kwansoni, nakaŵili napakasuŵa kaŵusisanu nasitatu pakalukuli nekutusya kwa nsoni. 40Popele mukaliŵulile pakasuŵa kakutaŋga ifisepo ifyakumiti iweme, nefisako fyamalala, nemitano yamiti itikeme, nemyalaŵimi iyakunika; eli mukalukusemba pamenso aŵaYawe Lesa wenu insiku sisanu nasiŵili. 41Popele mukalukucilama ati citenje icakuli ŵaYawe insiku sisanu nasiŵili pamwaka: Iifunde lyamuyayaya pafitentekwa fyenu; mukalukucilama pamwensi waŵuisanu naiŵili. 42Mukalukwikala mumitanda insiku sisanu nasiŵili; ŵonse aŵakufyalwa kwaŵo muIsilaeli eŵakalukwikala mumitanda; 43ati ifitentekwa fyenu fikesiŵe ati naliŵekalicile aŵaIsilaeli mumitanda, ili naŵafumisye mucalo caIjipiti: neŵo nineŵaYawe Lesa wenu.
44Peŋka Mose kaaŵaŵulisisya aŵaIsilaeli ifitenje fyaŵaYawe ifyansicilwe.
Currently Selected:
Ifya Ŵalefai 23: AAL59
Highlight
Copy
Compare
Share
Want to have your highlights saved across all your devices? Sign up or sign in
Lamba Bible Version © United Bible Societies, 1959.
