Rom 2

Kayaknu epeɗiak amu tutukkunab

1Amunu, na danab aun, na laipad epeɗiadna, eheɗ heppignu nob nau aoglagnu attem ele amu, na am attemun? Na ele eheɗ amu hettem amunu, na Kayak noobppa, “Da hemi amuam da beɗulppa iitta,” akkutnu elele iittanab. Na laipad epeɗiadna, ag eheɗ hena, nob nau aoglagnu attem, haen amuppa na ele eheɗ nahipnu nob nau aokkutnu, na nakka nai beɗunppa iite yaattem? 2Na nakka na anam epeɗiak pehettak ii hettem, amge ig doottem, Kayak Nug anam ii hette. Nug danab kobol nau anam hetteb ele amu, Nug ag nob nau tutukkuib, doyak diig genabib ippunigtte bia madatte 3amunu na, na am danabib, na laipad laa kobol anamnu epeɗiadttem ele, amge na ele kobol nau anamib ele hettem amu, na attem doottem? Na nakka Kayaknu hettoɗiak eɗidna oolna gokkutnu elelete? Iitta. 4Kayak Nug nahipnu ena ha auta awawa, oo bodoettak kobol dim lamittatta, amen mak haen elab dayaya, Nug oo maɗoɗ kobol dim lamidtte amu, na amunu keeke hamu biate doottem? Amu na Kayak Nug na oot eɗukkunu oo daatte amunu, Nug nahipnu kobol enanag hette iite doottem?

5Kayak Nug na oot eɗukkunu oo daatte, amge na nakka na he nahip dabmak am ɠagattag eppak daye, na oot ii eɗutte. Kobol amuppa amu na nakka eheɗ hak nahip-ppa na Kayaknu oppoɗi bak na nidakkunu huana aakku qagmettem. Yo, deɗ laa Kayaknu oppoɗi bak miag atieb, Kayak Nug nuhig kobol tutukkuppa na epeɗitteb amu na geha nob nau aokkut. 6Kayak Nug geha danab oh kobol ag heppig ele amunu nob elele madakku. 7Danab laala ag binag amahlak oppiaawak ele, bau hanhan dayak, binag ele mattinna, kobol tutukku hetteb amu, geha Kayak Nug danab amu bauklel hanhannu madakku. 8Amge danab laala ag akka ahilagnu dabmenana, ag doyak diig genabib dimettan, kobol eheɗ, amuib dim lamidtteb ele amu, geha Kayaknu oppoɗi bak aqeb, ag nob naunab aoglag. 9Danab oh kobol tutukku iitta hetteb ele, ahilagppa qagaiettak okkai, guittak okkai ele bekku; Juda ag tatam ⌊nai amu⌋ doyegeg, iitta aɗi ag aakku geha dootteb. 10Amge Kayak Nug geha binag amahlak oppiaawak ele, maɗoɗ, amu binag ele danab oh kobol ena hetteb ele madakku; Juda ag tatam ⌊nai amu⌋ doyegeg, iitta aɗi ag aakku geha dootteb. 11Aɗinu? Kayak Nug danab onig ele, nuhignu oo daye, ii epeɗia, laa onig iitta ele amu nuhignu oo ii daye epeɗitte, amubia ii hette. Iitta. Nug danab oh melemel laippuppa ag kobol heppigppa epeɗiadtte.

12Danab oh ag ɗo ii dootteb ele amu, ag oolagppanu laa oh ag hipunin hetteb ele, ag am geha ag ɗo ii doonna, padal mekkulag. Am danab oh ag ɗo waappa daatteb ele, ag oolagppanu laa oh ag hipunin hetteb ele amu, geha Kayak Nug ag ɗoppa epeɗiatteb, padal mekkulag. 13Danab ag daulagppaib ɗo am hamu bia dootteb ele, ag amu Kayak amegppa genab tutukku hak danab ii daatteb. Iitta. Danab ag ɗo dim lamidtteb ele, danab amuib geha Kayak Nug ahilagnu, “Genab tutukku hak danab,” awa akku. 14Iitta aɗi danab ag ɗo ii dootteb, amge laala ag akka ɗo ippunigtte, ag kobol amu dim lamidtteb, danab amu ag ɗo iitta, amge akka ahilag dabmak amu aakku ɗo ahilag bia daatte. 15Anam amunu, ahilag kobol anamppa Kayak Nug ɗo ig aɗi hekkunignu ippunigtte ag oolagppa yom amu aakku miag atitte. Amu ag ahilag ooppan oiyak ippunittaknu ulum ele ɗo amu aakku yom daatte miagib atte. Aɗinu? Ulum amu nug haen laala dabmak ahilagppa, kobol ag hetteb epeɗiattatta, ag eheɗ hetteb ippuanatta, amu haen laala kobol ag hetteb ele amu, elelenab ippunadtte. 16Amunu epeɗiak deɗ ana uɗieb, Kayak Nug geha danab oh dilag kobol lokkumak daatte, ahilag dabmak lokkumak daatte ele Jesus Kristus nuhigppa, da Nai Ena mehuqttem bia, epeɗiadkku.

Juda ag Kayaknu ɗonu nai elele dim lamidppig bia dabmeppig

17Amge ag akka ahilagnu amu attemu? Ag, “Ig Juda danab,” anana, ag ɗo tutukkunab dim lamidna, enaib daaglagnu dabmena, ag akka akka ag onilag humanna, “Ig am Kayaknu danab,” anana, 18ag Kayaknu ɗonu ippunittak aoppig daatteb amunu, ag Kayak oo daatte doonna, ag ib ena aakkuib dim lamidkkulagnu, ag amunu ena doona, 19ag danab amelag gaɗuak ib ippunadkkulagnu, ag akka ahilagnu ag elele dootteb. Amu ag danab gatatuppa daatteb dilag amahlak danab daatteb dabmena, 20ag, “Kayak Nug ɗo ig mekke, ɗo nug ig doyak diig genabib ippunigtte amunu, ig am doyak amu ele elelenab daattem,” dabmetteb. Ag anam dabmetteb amunu, ag danab laa dabmak tutukku iitta ele dilagppa ippunittak hekkulagnu elele doona, ag nid naunau ippunittak mattaglagnu ele elele daatteb dootteb 21amunu, ag aɗinu danab laa dilagppa ippunittak hetteb, amge ag akka ahilagppa ippunittak ii hetteb? Amu ag danab laa keeke yab ii aomnanu amelagppa maditteb amunu, aɗinu ag akka ag anamnab hetteb? 22Ag danab ag ewau pakkua gappai hak kobol ii hemananu atteb amunu, aɗinu ag akka ag ewau pakkua gappai hak kobol hetteb? Amu ag kayak hambuppuaknu dottolkadnu oolkadppa uuaknab dootteb amunu, aɗinu ag akka iitta aɗi dilag kayak hambuppuaknu mettid lakkanu keeke yab aotteb? 23Amu ag akka onilag human atteb. “Ig Kayaknu ɗo doottem,” aon atteb amunu, aɗinu ag akka ɗo tippaltteb? Ag kobol anamppa ag laa dilag neekkakppa Kayak onig heeg nauhtte. 24Kayak naippa yaak daatte amubia ag hetteb. Nai am inam. “Ag Juda, ag beɗulagppa iitta aɗi danab ag Kayak, ag nuhignu dabittak nai maditteb.”

25Genab, ag ɗo tutukku dim lamidtteb dayeb amu, gaɗa otaɗak kobol am keeke ena, amge ag ɗo tippaltteb ele dayeb amu, gaɗa otaɗak am keeke hamu, ag danab gaɗa ii otaɗppig bia aakku daatteb. 26Amu danab ag gaɗalkad ii otaɗppig ele, ag ɗo kobol tutukku dim lamidtteb dayeb, danab amu ag onilag danab gaɗalag otaɗppig ele bia aon daatteb. 27Amu danab laa nug gaɗa ii otaɗom, amge nug ɗo tutukku dim lamidtte, nug am ag Juda ag ɗo nai yaak atte bia gaɗalag otaɗppig, amge ag ɗo tippaltteb amu, danab laa amu nug geha, “Ag eheɗ hetteb,” nai amuppa ag yaaladkku. 28Amu danab laa nug beɗuppaib Juda daatte, nug amu Juda danab genab iitta. Amu gaɗa otaɗak kobol amu beɗuppanuib kobol iitta. 29Iitta. Danab nug Juda danabnab amu Nug Jesusnu ooppa genab doye, Kayak Ouɗi Nug danab amu oo babaittom. Amuam gaɗa otaɗak genab aakku. Oo babaittak amuam ɗo nai yaak niitte amu dim lamittaknu keeke iitta, Ouɗinu keeke. Danab amu nug danab amelagppa nug binag iitta, amge Kayak amegppa nug binag ele.

Currently Selected:

Rom 2: NB

Highlight

Copy

Compare