Prowerb 3
3
Danab ah bau dilag dim lamitta haknu anak
1O da bekkal, da aɗi na ippunidttem amu, na aib daut atiom.
Ao, na daut atimanu amu, na dahil haknunab nai, nahip dabmakppa meppe dayebeb oiye!
2Na anam hekkutnu diig am, dahil ippunittak nai, dahil haknunab anak ele aa hepeɗ, na geha haen elab bauklel daakkut.
Ao, aa hepeɗ, na ena daakkut.
3Na oo mauhaknab kobol, oo metta ii uuak kobol ele aib uuatme.
Ao, na danab nug keeke qettoɗmanu nug baagppa qakke daatte, amubia na kobol amu hanhan dim lamidkkutnu anam bia he!
Ge, na danab laa nug keeke laa daug atimanu uɗugppa yaatte, amubia na kobol amu daut atimanu aon ootppa me!
4Na anam hekkut dayeb, na Kayaknu neekkakppa, danab ah dilag neekkakppa ele,
na danab diignu doyak tutukku ele daakkut.
5Amu na meut ohppa Yawenu ootppa genab doye!
Ao, na diignu doyak tutukku nahip aib anuqak dabmettanna oime.
6Keeke oh na hekkutnu dabmettem amu, tatam Kayaknu dabmewona hekkut.
Na anam heppe, Nug geha heeb, na ippun tutukku daakku.
7Na nakka amu, “Da iikku, da doyak dabmak ena okkai ele daattem,” aib dabmeme.
Iitta. Na Yawenu ebehin oh bodoetta le meeb, Nug dim lamidkkutnunab oinna, kobol eheɗ aib heme.
8Na anam hekkut dayeb, amuam na beɗun ehanitteb, oɗe iitta dayeb, geha na ebehinad ɠagattag daaglag.
9Am na en nahip-ppanu laih aon, Yawe binag medakkutnu Nug mette!
Ao, ee nahip tatam oɗueb amu, na ee meu tatamnu amu aona, Yawe eppegppa me!
10Na anam hekkut amu, na ma lakka ee meu kuɗumnab meppe, ambeeb, ee laa ele daakku.
Ao, na geha wain bau hinaippa inappe ukkeb, oh ambeppeg, wain laa ele daakku.
11-12O nid dahil, Yawe Nug na ena bekkutnu tolitta, bu nitteb amu, na amunu ootppa uuaknab aib doome.
Ge, Nug na ena bekkutnu daut bateb amu, na nuhignu aib eheɗ doome.
Aɗinu? Yawe Nug danab laa, Nug ahilagnu oo mauhtte amu, Nug danab amu ena daaglagnu toliatta bu madatte.
Ao, danab nug bekkanu enanagnab dootte ele, nug nug ena bekkunu tolitta bu medatte, amubia Yawe Nug danab amunu hette.
13Am danab nug doyak dabmak ena ele mattia anidtte amu, nug aakku itittak ena awom daatte.
Ao, laa nug diignu doyak tutukku mattia aotte amu, nug aakku itittak ena awom daatte.
14Aɗinu?
Danab nug silwa ele, nug amuppa en laa aokkunu elele, amge danab nug doyak dabmak ena ele, nug keeke silwa eɗittak aokkun elele.
Ao, danab nug gol ele, nug amuppa en tuɗid aokkunu elele, amge danab nug doyak dabmak ena ele, nug keeke gol eɗittak aokkun elele.
15Men onig rubi, nug awaknu am men doɗo okkainab ele, na amu aokkut am ena, amge na doyak dabmak ena ele aokkut am enanag.
Na doyak dabmak ena ele aokkut, amuam na keeke anuqaknab aakku aokkut.
Aɗitai laa na oot hekku ele amu, amuam doyak dabmak ena ele eɗittak ii daatte.
16Doyak dabmak ena ele am ah laa nug keeke laa paniattaknu eppegppa aɗatte bia.
Nug eppeg naɗiap-ppa amu, nug maɗ kuɗumnu bau dayak aɗatte;
Ao, nug eppeg nanehppa amu, nug enub, binag ele aɗatte.
17Doyak dabmak ena ele ippu amu enaib.
Ge, nug ib atten attenppa danab ah diiadtte amu, danab ah ag maɗoɗib doon oitteb.
18Am danab aun aɗi ag doyak dabmak ena ele aoppig amu, ahilag doyak dabmak ena ele heeb, ag bauklel daaglag.
Ao, danab aun aɗi ag doyak dabmak ena ele aoppig amu, ag itittak ena aoppig daatteb.
19Yawe Nug nuhig doyak dabmak ena eleppa he, wannu ukku aakku daatte.
Ao, Nug diignu doyak tutukkuppa he, habppanu keeke oh abenalagppa daatteb.
20Yawe Nug nuhig doyakppa he, yu beum daatte;
Nug he, baito habppanu nette.
21O bekkal, na hanhan epeɗia ha dabmak ena awak, aria oo maittak awaknu ehah eleppa oinna, dabmena autna awe!
Na keeke aɗit amunu aibnab daut atiom!
22Na kobol aɗit amu daut ii atieb, na dim lamatkkut dayeb amu, na bau daakkut;
kobol aɗit amu aa na baatppa kalele bala enanag daatte bia enanag daaglah.
23Na doyak dabmak ena ele, oo maittak awaknu ehah ele daut ii atieb, na dim lamatkkut dayeb amu, na oinna, na baɗak iittappa gokkut;
na taataɗ ii qettamna.
24Na kobol aɗit amu daut ii atieb, dim lamatkkut dayeb amu, haen na niinna, na ii baɗamna.
Ao, na niittem haenppa na enaib niikkut.
25-26Amu genab, na hanhan doyak dabmak ena ele, oo maittak awaknu ehah ele daut ii atieb,
dim lamatkkut dayeb amu,
Yawe Nug nahip guppiɗ daakku.
Ao, Nug geha atognoitteb, na pelemppa ii temana.
Nug anam hekku amunu,
na uug naunab paha, laippun bettenu ii baɗamna.
Ao, na padal mak, nau hak danab dilagppa bette amu, na amu baɗidna ii oimna.
27Na danab ah ag nob ena aoglagnu elele heppig anidna, nob ena madakkutnu keeke elele na eppenppa daatte dayeb amu, na matte!
Aib uun ii madakkutnu heme.
28Na gemu keeke eppenppa dayebeb, mudippan layap medakkut dayeb, na aib, “Butti eɗun uɗippe medakkul,” ame.
Iitta. Na gemu aakkude mette!
29Mudippan layap nug na eheɗ heidkkunu ii dabmette amunu,
na nug eheɗ hedakkutnu maittak aib aome!
30Na danab laa, danab amu nug nahipnu eheɗ laa ii heum amu,
na nug naippa hamu aib yaame!
31Amu danab nug laa guittak nau mauhnoak mettaknu tiigppa daatte amu, na nuhignu aib amen qeeb oot elele ii dayom;
na aib kobol nug hette ele, na amunu laippu laanu oot heeb dim lamidme.
32Aɗinu? Yawe Nug, danab nug eheɗ haknu nug tiigppa daatte, Nug nuhignu ena iinab dootte, amge Nug genab tutukku hak danab nuhig dabmak lokkumak daatte ippunadtte.
33Yawe Nug nau hak danab, nug baekkudppan ele, ag eheɗ laa awaknu anak waappa daaglagnu atte,
amge Nug genab tutukku hak danab, nug baekkudppan ele, Nug ag itittak ena madatte.
34Danab ag dada kobol dim lamidna, Kayak aon aon qedatteb ele amu, Nug imadtte,
amge danab ag akka onilag qeeg nette ele, Nug ahilagnu ii helo bia me, Nug ag ehanadtte.
35Yawe Nug he, danab ag doyak dabmak ena ele, ag binalag ele daatteb,
amge Nug he, danab ag Kayak dab-ii-menan ii dim lamidtteb ele amu, ag uɗalag nette.
© (Active), Wycliffe Bible Translators, Inc. All rights reserved.