Prowerb 28
28
1Nau hak danab ag auntai laa ii lamattegeg, haen amuppa ele ag baɗan, oolna gotteb;
amge genab tutukku hak danab ag laion bau bia, ag ɠagattag daatteb.
2Wan laappan danab ah ag nai tappe nak danab ah daatteb dayeb amu, wan amuppa gumak danab laa ba, na qe, laa ahatte;
amge wan laappan danab okkai nug doyak dabmak ena ele, diignu doyak tutukku ele amu, wan amu ɠagattag daatte.
3Danab okkai laa nug daɗek danab ah eheɗ hadatte amu;
nug am gu huananab naan he, datta keh keeke iitta metteb, nug amubia daatte.
4Laa ag Kayaknu ɗo dim lamittaknu uutteb, ag nau hak danab onilag okkai madatteb;
amge aun aɗi ag Kayaknu ɗo dabmettan dim lamidtteb ele, ag nau hak danab eheɗ hemanu wagai metteb.
5Eheɗ hak danab ag nai doya mala hettoɗia epeɗia elele mettak kobol diig tutukku ii dootteb;
amge danab ag Yawe antta, Nug dim lamidkkulagnu Nug maditteb, ag nai doya mala hettoɗia epeɗia elele mettak kobol diig tutukkunab dootteb.
6Laa daɗek danab daatte, amge nug Kayaknu neekkakppa danab ooppa kaliak laa iitta ele daatte, amuam enanag;
amge laa nug danab enub ele, me nug danab nug eheɗ haknu tiigppa daatte, amuam naunab.
7Nid nug Kayaknu ɗo doya, dim lamidtte, nug am doyak dabmak ena ele aɗatte;
amge nid nug laa ag oolagppa dubuttid huanak ele, nug ag ele layam daatteb, nug mameg uɗa nak nau guittak ele medatte.
8Laa ag lonnu intres, ag amuppa enulag okkai tuɗidna aotteb amu;
Kayak Nug heeb, ahilag en am laa ag daɗek ehanadtteb ele, ahilag daakku.
9Aun nug Kayaknu ɗo dim lamidkkunu uua hette amu;
Kayak Nug nuhig unuqittaknu am ooppa uuaknab dootte.
10Laa nug genab tutukku hak danab ah, ag eheɗ hekkulagnu eeɗadtte ele, nug nuhig pelemppa tekku;
amge Kayak Nug danab ag nuhig neekkakppa danab oolagppa kaliak laa iitta ele daatteb amu, Nug ag aug ena madakku.
11Danab enub ele nug nukka nuhignu, “Da am doyak dabmak ena ele,” anam dabmekkutai;
amge daɗek danab, diignu doyak tutukku ele, nug enub danab nug anam ele iitta anidtte.
12Haen genab tutukku hak danab ag okkai danab betteb amu, danab ah oh ag gamag ahak aotteb;
amge haen nau hak danab ag gumak aben aotteb amu, danab ah ag wana lokkumtteb.
13Aun nug hipunin nuhig tonatte, nug ena ii daama;
amge aun nug hipunin nuhig miagib mattia dimadatte amu, Kayak Nug danab amunu oo gai-iitta doyaya, oo metta, ehanidtte.
14Danab aun nug hanhan Yawenu ebehi oh bodoetta le mette, nug itittak ena awom daatte;
amge aun nug kobol ena hemanu dabmak nuhig ɠagattag ebatte, nug am uugppa notte.
15Nau hak danab laa nug danab ah ag ɠagattag iitta ele gumadtte dayeb;
amuam laion, o bea enug qak doya, doɗ laa qa lakkunu hette, am amubia aakku.
16Okkai danab aun nug epeɗia ha dabmak ena awak kobol ii dootte ele, nug nuhikkud danab ah eheɗ hadatte;
amge laa nug men doɗo ib eheɗppa awaknu nau ninig ele dootte amu, nug am haen elabnab okkai daakku.
17Danab nug laa qe mauhtte amu, nug moɗppa nokkunu oola gotte;
auntai laa nug nuhig haknu nob aomanu aib ehanittom.
18Laa nug Kayaknu neekkakppa danab ooppa kaliak laa iitta ele amu, Kayak he, nug padal ii mette;
amge laa nug eheɗ haknu nug tiigppa daatte ele, nug pahanab na qekku.
19Aun laa nug dad uɗat nuhig pehettak hette ele, nug ee elelenab ele daakku;
amge laa nug dabmak hamu hamu dim lamitta oitte amu, nug daɗek daakku.
20Danab laa nug oo metta ii uuak kobol haahaib daatte, nug itittak ena kuɗum aokku;
amge laa ag enulag okkai ele daaglagnu hik aqe oitteb, ag am bu aoglag.
21Laanu diig iittappa ena doya, laanu diig iittappa eheɗ doyak kobol am ena iitta;
amge epeɗiak danab laala ag lokkumakppa eheɗ haknu ehanittak huppu nakoknab aona, ag kobol eheɗ aakku hetteb.
22Danab nug, nug ehanittak uua, nukka nuhignuib dabmette, nug enub okkai aokkunu hik qette;
amge nug ii dootte, uma iitta nug daɗek daakku.
23Danab laa nug laa eheɗ heumnu daug batakku dayeb, danab ah ag danab nug daug batak heum ele, ag gog takppa nuhignu oolag elele daakku;
amge danab nug oo eeɗaknu ittag nai maditte ele, ag nuhignu oolag elele ii daama.
24Aun laa nug mameg o anignu keeke yab awa, “Imu eheɗ iitta,” akku;
nug am laa keeke he nauhtte layag daatte.
25Baubau awaknu hik qak danab nug he, nug mehqak ahatte;
amge aun nug Yawenu ooppa genab dootte, nug ena daakku.
26Aun nug, “Da dakka dahil oiyak, dabmak, keeke oh atognokkulnu elele,” anana, amunu ooppa genab dootte ele, danab amu nug Kayak dab-ii-maama ii dim lamidtte ele;
amge aun nug doyak dabmak ena ele dim lamidtte, Kayak Nug heeb, nug elele daakku.
27Aun nug daɗek keeke madatte, nug bau dayaknu keekenu tutu ii mema;
amge danab ag laa nug laa daɗek daaegeg, ii ehanadtte amu, nug eheɗ laa awaknu anak waappa daakku.
28Haen nau hak danab ag gumak aben aotteb amu, danab ag wana, lokkumtteb;
amge haen nau hak danab ag nauheg amu, genab tutukku hak danab ag eleleib daatteb.
© (Active), Wycliffe Bible Translators, Inc. All rights reserved.