Prowerb 25
25
Solomonnu danab dilag oiyak ehanittaknu nai tutu laala ele
1Danab dilag oiyak ehanittaknu nai tutu laala ele Solomon yom amu, Juda dilag king Hesekaia, nuhig danab ag aon yaappig amu, nai amuam inam.
2Danab ag Kayaknu diig, nuhig hak oh ele dooglagnu elele iitta, amuppa danab ah ag Nug binag amahlak oppiaawak ele dootteb;
king ag am danabib, ag keeke lokkumak daatte heeg, miag atitte amu, amuppa danab ah ag nug binag amahlak oppiaawak ele dootteb.
3Danab auntai laa nug habppa taknu, o wan unuqag noaknu, nug amunu uma ukkak gane melemel mekkunu elele iitta;
amubia danab auntai laa nug kingnu dabmak oh anidkkunu elele iitta.
4Na heppe, dubuttid silwappa daatte iitta mekku dayeb;
keeke silwappa hak danab nug awa, keeke anttaknu enanag hekkunu elele.
5Na heppe, nau hak danab ag king uuidna, laih daappeg amu;
nug genab tutukku hak kobol haaha, nuhig king daakkunu ehah am nug eppegppa ɠagattag daakku.
6Na nakka king noobppa daanna, “Da am danab ena, onil, binal okkai ele,” aib dabmeme.
Ao, na danab okkai oolagppa daakkutnu aib heme.
7Aɗinu?
King nug nukka na amenppa, “Lai, na gukkuiɗna uɗippe, da ele daagnih,” akku, amuam ena;
amge king nug anuqak danab laa noobppa na onin qeeb neeb, na uɗan nekku, amuam ena iitta.
8Na paha paha nai laa aon, hettoɗiakppa aib meme;
na anam hekkut dayeb, dimppa nahip mudippan laippu nug heeb, nahip nai am hambuppuak, anam miag atieb amu, na attem hekkut?
9Na, na nahip mudippan laippu ele aa ahilah nai bappaidkkulahnu hettep dayeb;
aa madipiɗ ele amu, na nai aib heppe otalom.
10Na laanu nai anam heppe otalkku dayeb, laa amu nug nahip mattiak amu doya heeb, na uɗan nekku;
amu dimppa laa ag nahip kobol amunu doona, ag hanhan nahipnu ena ii doomna.
11Nai tutukku hanebppanab mattiak;
amuam keeke gol, silwa eleppa hak, anttaknu enanag, amubia.
12Danab laa nug doyak dabmak ena ele, nug danab laa, nug dookkunu oo hette ele, nug nug daug batakku dayeb;
amuam enanag, daulag bid golppa hak, o bala laa gol enanagppa hak bia.
13Nai awa ukkak danab, laa ag nuhignu genab elele dooglagnu elele, nug uɗat nuhig ena amuppa, nuhig okkai, ag nug meeg gotte amu, nug ag ehanadtte;
ehanittak amuam, danab nug deɗ laa gakkaɗak haen nauppa, nug le oug lawowa, ehanittak aotte, am amubia daatte.
14Danab ag laa keeke mattaknu atteb, amge ag ii madatteb;
ag am lombig aam haenppa gu wan le ii medatte, amubia hetteb.
15Danab nug oo maɗoɗ ele dayak kobol dim lamidkku dayeb amu, nuhig okkai nug dabmak eɗukku bia;
amu nai bodoettakppa mattiak amu, amuam heeb, dabmak ɠagattag eppom daatte baolikkunu elele.
16Na uppuh leppu anidkkut dayeb, na aib huana lame;
na huana lakkut dayeb amu, na bahakkut.
17Na mudippan laippu laugppa aib ge iitta gome;
na anam haen oh gokkut dayeb, nug nahipnu nau ninig ele dookku.
18Na mudippan laippu, na nuhignu hambuppuak nai hettoɗiakppa madittem dayeb amu;
buppuak amuam daɗib laa, o qep elab laa, o lat doɗo hawaɗ ele laa guittak mettalo, amubia guittak medatte.
19Uug haenppa, danab nug nuhig nai dim ii lamidtte, na nuhignu ehanittak aokkutnu dabmekkut dayeb amu, amuam meu ena iitta;
amuam danab nug aeg oɗaɗittak dayeye, amuppa ee damqekkunu hette, o danab nug baeg nau autaut oitte ele, amuppa tappa gokkunu hette amu, na amubia daakkut.
20Danab nug laa oo doyak okkai dootte amegppa oo gamag ahaknu ahi edakku dayeb, nug layag ii ehanidtte;
amuam deɗ oug eleppa danab laa nug layagnu ulahnu lamen aɗitta aotte, o keeke nau laa nug ii helo, amge nug hette, am amubia daatte.
21Nahip kekeɗ enug qeeb, na ee mette!
Ao, nug le baag diieb, na nug le mette!
22Na anam hekkut dayeb, nug oo eɗukkunu ehanidkkut;
amu Yawe Nug na nob ena medakku.
23Gu haenppa gu genab nettebia;
laa nug layagnu nai nau maditte amu, layag nug genab oo nauhtte.
24Danab nug lag laih laa, enanag iitta, aguppaib daatte dayeb, amuam nau iitta;
amge danab nug lag meu ohppa wau ge iitta nai hak hette ele daattep dayeb, amuam nau.
25Baegppan laa, nug aab umanabppa daatte, nug ena daattenu nai uɗitte amu;
amuam danab nug le baag diie, le oug latte, amubia daatte.
26Genab tutukku hak danab nug nuhig dabmak eɗue, nau hak danab dilag hak hette;
amuam le qeppuɗia bakppan le laa heeg, muag ele daatte, o le moɗ dubuttid ele daatte, amubia daatte.
27Uppuh leppu huana lanaknu am ena iitta;
amubia danab nug nukka laa ag nug binag mekkulagnu eeɗadkku am ena iitta.
28Danab nug nukka nug nuhig oiyak pehettak atognoak ii hette amu;
amuam aab okkai laa aɗ loppaɗa, na qak daatte, amubia.
© (Active), Wycliffe Bible Translators, Inc. All rights reserved.