Prowerb 23
23
1Haen danab okkai laa, nug na nug ele ee lakkulahnu oninppa eeb gona balalppa daanna amu;
na aun ele ee lattep, nug am danab okkai amu, na amunu dabmena autna awe!
2Na hanhan ee huana lattem dayeb amu;
na haen amuppa na nakka nakka ulum mettanna, ee huana aib lame.
3Nug ee amuppa buppuidkkunu hettetai;
amunu na nuhig ee enanagnu aib oot huana heum.
4Na en okkainab aɗakkutnu uɗat ge iitta aib heme;
na amu hemananu na doyak dabmak ena ele aɗan, nagakka atognoitte!
5En okkai am paha paha iitta mekkunu elelenab;
Aɗinu? Haen kuɗum ai igel nug hagagaɗa, paha paha gotte, paha amubia en okkai na eppenppanu gokku.
6Na danab ag nug ehanittak ii dootteb ele, na amu dilag ee aib lame;
ag ee enanag eletai, amge na ee amunu aib oot huana heum.
7Aɗinu? Danab laa, nug nug ehanittak ii dootte ele, nug hanhan ee amu awaknu nob gane am dabmaama daatte;
“Baula yaan la,” awa atte, amge ooppa nug na ii helomnu dabmette.
8Na hobul mamegnu kobol anam daatte, na amuppa daan ee nakok lakkut, amu danab nug ee nauhom nakokib lawowa bahatte, na amubia dookkut;
na amu doon, eenu nai ena hobul mameg mettame amu, na nai amunu, “Da kakidmi,” dookkut.
9Danab nug Kayak dab-ii-maama ii dim lamidtte ele nug nahip nai, doyak dabmak ena elenu am, “Keeke hamunab,” dookku;
amunu na nug ele aib nai madipiɗ.
10Na wannu tom epponak men anukka mak amu aib mautppe, laih waum.
Ge, na nid naunau mamelkad mauhppig ele, na ahilag wan daug laih adekku aib yab aome.
11Aɗinu? Kayak Nug nid amu ehanadtte amu, Nug ɠagattag ele;
amu Nug ahilag nai babaitta, bu medakku.
12Laa nug ippunittak nai ena na medatte amu, na doon autna awe!
Ao, na daut human, doyak enanu nai doon autna awe!
13Nahip nid eheɗ heum dayeb, na nug tolidna, bu mette;
amunu diig am, na nug bu qekkut dayeb, nug ii mauhma.
14Na nug bu medakkut dayeb amu;
na nug mauhkkunu ib oo nettem.
15O bekkal, na doyak dabmak ena ele dim lamidkkut dayeb amu;
da ool gamag ahakku.
16Na nai tutukku madippeppe;
da ool unuqagnab, da appa gamag ahak okkai dookkul.
17Na hipunin danab dilagnu aib amen qe, oot elele ii dayom;
iitta, na hanhan Yawenu ebehin oh bodoetta le mekkunu yag-nab-bak doye!
18Aɗinu? Na anam hekkut dayeb amu, genabnab genab na butti aɗi ena daakkutnu dabmak aɗan oikkutnu elele;
amu laa heeb, butti aɗi ena daakkutnu dabmak aɗa oiyak amu iitta iinab mema.
19O bekkal, na doye! Na doyak dabmak ena ele dim lamitte:
na ib apiɗidna laih wamananu, dabmak tutukku awe!
20Laa ag wain huana lanan kaaka aqatte, o doɗ teppu kuɗumnab laegeg, oolag huana diditte amu;
na ag ele ouqak aib daame.
21Aɗinu? Danab ag wain laeg kaaka aqatte, o ee huana laeg oolag huana diditte ele, danab amu ag eɗun, daɗek daatteb;
ag ee, le ele huana lanana, niiakib niiglagnu hetteb amunu, ag daɗek daanna, lamen nau aakkuib tagatteb.
22Na mamen nug bau dayak mettom ele, na nuhig nai doye!
Ao, na anin nug kaino meeb amu, na nuhignu ena iinab doyak aib doome!
23Na doyak diig genabib ele aon, aib paɗappe ukkom;
na hanhan doyak dabmak ena ele, laa nukka nuhig oiyak pehettak atognotte, diignu doyak tutukku ele, na kobol amu oh dim lamitte!
24Aun nug bekka am genab tutukku hak nid daatte ele amu, nug mameg am oo gamag ahak okkai dootte.
Ao, aun nug bekka nug doyak dabmak ena ele, nug nuhignu enanagnab dootte.
25Na mamen anin ele nahipnu oo gamag ahak dooglahnu, na anam oiye!
Ao, na anin nahipnu dabma, oo gamag ahak aokkunu ib mette.
26O bekkal, na oot da meɗe!
Na dahil oiyak anidna, amuib dim lamitte!
27Aɗinu? Ib baag ah am moɗ laa umanab noa ukkak bia daatte.
Ao, ah ewau pakkua gappai hette, nug am le moɗ laa hogogdoak, amubia.
28Am ah amu ag yab danab nug laa meidna daatte bia hetteb;
ag ahilag hak nauppa heeg, danab kuɗum ag waalkad uuadna, gappai hetteb.
29Aun nug uug okkai dootte?
Aun nug oo doyak okkai dootte?
Aun nug laikkud ele oolag laippu ii daatteb?
Aun nug naittuɗ mak ele?
Aun nug guittak awom, amge nug ii aolo?
Aun nug ameg kokoɗ eppom daatte?
30Danab ag amu ele, amuam danab ag wain huana laeg kaaka aqatte ele, ag aakku.
Ao, laa ag wain digdig kaboliak ele lanana dootteb ele, ag anam dootteb.
31Deɗ laala wain kokoɗ eppom daatte, am amemɗiag aotte, am wain lana toppua ukkaknu enanag daatte,
amge na diig ewam amunu aib neekkidppe, wain oot eeɗom.
32Wain nug anam aakku daye, danab nug latte, dimppa am mat nau emalak bia hette.
Ao, am mat naunu ouɗi, danab qe mauhtte, am amubia hette.
33Na lakkut dayeb amu, wain amubia am heeb, dimppa na keeke digdig anidkkut;
na nahip dabmak kaaka qekku.
34Na lakkut dayeb, na kaaka nitteb, na danab nug kaaka qeeb, nug uub attan, yuppa ulah naɗi duban ele heehe, nug uub koɗokkoppa niiaya daatte,
na anambia daakkut.
35Na wain huana lawona, na inam akkut. “Ag da oiɗppig, amge da guittak ii meɗappig.
Ao, ag da oiɗppig, amge guittak laa ii doomi.
Da ganeb le baula lakkulnu niiaknu uue, eɗuen ahakkul.” Na anam akkut.
© (Active), Wycliffe Bible Translators, Inc. All rights reserved.