Prowerb 16
16
1Danab ah ag ahilag dabmakppa aɗi aɗi hekkulagnu maittak aotteb.
Anam amge, Yawe Nug aɗi keeke bekku amu, Nug dabmaama he bette.
2Danab nug nuhig haknu, “Da iikku ena, tutukku hettem,” dabmette;
amge Yawe Nug diig aɗinu nug hette am epeɗidtte.
3Na aɗi keeke hekkutnu ⌊dabmettem⌋ amu, na keeke amunu hak Yawe eppegppa me;
⌊na amu hekkut dayeb amu,⌋ Nug heeb, amu haknu maittak nahip am ena beeb, maittak amuam meu okku.
4Yawe Nug keeke oh Nug oo hette bia gokkunu bappaidtte;
nau hak danab ag ele ag akka ahilag hakppa bu awaknu deɗppanu bu aoglagnu bappaidtteb.
5Yawe Nug dada hak danab dilagnu ooppa uuaknab dootte.
Genab, na imu ootppa genab doye! Nug genab ag bu madakku.
6Danab nug hipuninnu oo mauhaknab kobolppa, oo metta ii uuak kobolppa ele eheɗ haknu nob nau iitta mekkunu he elele medatte.
Amu danab nug Yawenu ebehi oh bodoetta le mette doya amu, nug eheɗ ii hema.
7Haen danab nug Yawe oo daatte bia oitte amu;
Kayak Nug he, danab amu nug laikkud aakkuib iitta, nuhikkud kekeɗ ele ag nug ele oolag maɗoɗ ele laippu daatteb.
8Danab laa nug genab tutukku hak danab, me nug am en nakokib ele. Nug en nakokib ele, amge nug am genab tutukku hak danab amunu, nug ena daatte;
amge danab laa nug nai doya mala hettoɗia epeɗia elele mettak dim lamittak danab iitta, me nug en okkainab ele. Nug en okkainab ele, amge nug am eheɗ hak danab amunu, nug am ena ii daatte.
9Danab nug nuhig dabmakppa keeke hekkunu maittak aotte;
amge Yawe Nug nug aɗi ib awa gokkunu dabmak awa he, ɠagattag ebatte.
10Nai Kayak oɗeppa daatte, king nug nai amu maditte;
nug aɗi nai madikku amu, nai amuam nai doya mala hettoɗia epeɗia elele mettak kobolnu nai ele laippu daaglahoitte.
11Keekenu uug anidkkunu skel pehettak am Yawe eppegppanu uɗitte;
uug doyaknu keeke skelppa uɗat mattak oh battamppa inak daatteb amu, Nug keeke amu oh babaittom.
12Danab king ag gumadtteb ele, ag genab tutukku hak danab daatteb dayeb, amuppa nuhig wan aakku ɠagattag daatte;
diig amunu amu, king nug eheɗ hak kobolnu ooppa uuaknab dootte.
13King nug danab nug nai genab maditte, nug nuhignu ena dootte.
Ao, king ag danab nug nai genab maditte, ag nuhignu dabmak ena okkai aotteb.
14King nug oppoɗi bak doya, nug danab laa qeeb mauhkkunu elele;
amge danab doyak dabmak ena ele nug ha, kingnu oppoɗi bak bodoedakkunu ib madikku.
15King nug laa ena neekkitteb amu, laa amu nug bau daakku;
amu king nug laanu ena ii helo bia me, nug amu hette, kobol amuam gu na, wan ehanidtte bia.
16Danab nug doyak dabmak ena ele aokku, amuam ena, am gol awak eɗidtte.
Ao, danab nug diignu doyak tutukku, nug amu aokkun dabmekku, amuam ena, am silwa awak eɗidtte.
17Genab tutukku hak danab ag kobol eheɗnu awaidna daatteb;
aun nug aɗi hettenu atognoa dabmette amu, nug bau dayak nuhig aakku atognotte.
18Aun laa nug dada kobol hekku amu, nug padal mekku.
Ao, danab nug dada ha laa eɗittaknu dabmak aotte amu, nug na qekku.
19Danab nug nukka onig qe neene, laa ag laa dilag eheɗ hattak waappa daatteb, nug ag oolagppa daatteb, amuam uug daatte, me am ele ena;
amge danab nug dada hak danab ele layam bateb, keeke dada hak danab yab aoppig ele laippu aɗan oiglag, amuam ena iitta.
20Aun laa nug ⌊Kayak nainu⌋ ippunittak awa dabmedatte, nug ena daakku;
amu aun nug Yawenu ooppa genab dootte, nug itittak ena awom daatte.
21Danab ag laa, nug doyak dabmak ena ele, ag nuhignu, “Nug am oo maittak awaknu ehah awom daatte,” aon atteb;
amu laa nug nai maɗoɗ ele maditte, danab ah ag nuhig naippa ippunittak aoglagnu elele.
22Danab ag diignu doyak tutukku ele, ag bau dayaknu ib oɗe aakku anidna malappig;
amge laa ag Kayak dab-ii-menan ii dim lamidtteb, ag Kayak dab-ii-maama hak hetteb, hak amuam he, ag bu aotteb.
23Danab nug doyak dabmak ena ele nug tatam dabmewowa nai maditte;
nug aɗi atte am meu ele, danab laa nug amuppa ippunittak aokkunu elele.
24Nai ena am ubuhi ele, uppuh leppu bia;
am danab ouɗi, beɗu ele ehanidtte.
25Am danab laa ib laa andatta, nug nukka nuhig dabmakppa, “Ib imuam ib tutukku,” atte;
amge ib amunu gog tak am mauhak.
26Danab nug uɗat ha, nug enug qak dootte, enug qak amuam ehanidtte;
amunu diig am, nug ee aokkunu uɗat tuɗid hette.
27Am danab naunab nug eheɗ hekkunu maittak awawa oitte;
nuhig nai amu aab aɗu huana ewawa, keeke he nauhtte, amubia bette.
28Danab eheɗ haknu nug tiigppa daatte, nug he, danab laa oolagppa nug qak ahatte;
danab nug laanu dimug nai mattiaya oitte, nug laa ag layam ena daan oitteb amu he, ahilagppa uug be, layam ena pagutteb.
29Danab nug laa guittak nau mauhnoak medakkunu tiigppa daatte amu, nug mudippan laippu eeɗtte;
nug eeɗa omale, layag aakku ib ena iittappa gotte.
30Laa nug amegppa amuhpapaɗ qette amu, nug kobol eheɗ, tutukku iitta laa hekkunu maittak aotte.
Ao, laa nug layag guhuɗitta, oɗe qamuttak oitte amu, nug eheɗ laa hekkunu dabmak awa male, ɠagattag eppom daatte.
31Umimi bak am king haɗ enanagnab, king onig medatte, amubia danab, o ah onig medatte;
bau dayak elab amubia amu, amuam genab tutukku hak ibuppanu nob ena.
32Danab nug oo maɗoɗ dayak ele kobol dim lamidtte, nug ban danab ɠagattag eɗidtte.
Ao, danab nug oppoɗi bak nuhig aɗe ukke bodoedatte, nug ban danab nug aab okkai laappanu ban danab eɗatte, padal metteb, am nug eɗidtte.
33Danab ag aɗi hekkulagnu om ena yaatteb;
amge om ena yaak oh aɗi aɗi ippunigtte, amuam Yawe eppegppanu uɗitte.
© (Active), Wycliffe Bible Translators, Inc. All rights reserved.