Prowerb 13
13
1Bekka nug doyak dabmak ena ele, nug ippunittak nai mameg toppanu awa dim lamidtte;
amge awa awa qettak nid nug daug batak awaknu dab-ii-mette.
2Danab laa nug Kayak binag mak nai, ehanittak nai ena ele madittenu nob ena anidkku;
amge danab ag Kayak ippunattom bia Nug dim lamidkkulagnu uun hetteb amu, laa guittak nau mauhnoak mettak kobol ag tiilagppa daatte.
3Aun laa nug aɗi attenu dabmetta auta aotte, nug am bau daakku;
amge aun laa nug nai doyak iitta, diignu doyak tutukku iitta ele maditte amu, nug am nauhkku.
4Danab bahi iittanab ele nug keeke aokkunu dabmak okkai aotte, me nug aɗitai laa ii aotte;
amge danab nug yagbak doya uɗat hette, nug keeke oh oo hette ele, nug elele aotte.
5Genab tutukku hak danab ag hambuppuak kobolnu ag oolagppa nau ninig ele dootteb;
amge nau hak danab ag uɗa nak kobol, amu uɗa nak nau guittak ele kobol hetteb.
6Genab tutukku hak kobol, amuam danab ag Kayaknu neekkakppa danab ooppa kaliak laa iitta dilag guppiɗ daatte;
amge nau hak kobol am hipunin danab heeg, ag padal metteb.
7Danab laa nug enub okkai ele bia ippu hak hette, me nug keeke ele ii daatte;
amge danab laa nug daɗek daatte bia ippu hak hette, me nug am keeke kuɗum ele daatte.
8Danab nau ag enub danab aɗan heppeg, nug qagaiettakppa daamanu nuhig en ag madakkunu akkutai. Nug anam heeb amu, en nuhig ehanadkkutai;
amge danab nau amu, ag daɗek danab amu hekkulagnu ii aɗamna amunu, daɗek danab nug uug amunu ii anidtte.
9Genab tutukku hak danab ag am lam elelenab amahaltte bia daatteb;
amge nau hak danab ag lam qauhom bia nauhtteb.
10Dada hak danab nug laa oɗeppanu ulum ena awaknu uutte amunu, nug laa ele, ag nug uɗa aoɗtteb;
amge laa nug ulum ena awa, ooppa mette amu, nug am doyak dabmak ena ele.
11Am danab nug ib ena iittappa men doɗo aokku dayeb amu, men doɗo amu iitta mekku;
amge danab laa nug uɗat haaha, men doɗo hubhub qagmekku dayeb amu, men doɗo amuam okkai mekku.
12Danab nug keeke ena laa aokkun daatte, me nug ii aotte amu, nug uug okkai dootte;
amge danab nug aɗi keeke aokkun oo huana daatte, nug aotte amu, amuam bauklel adnu meu lanaknu bia aakku.
13Aun nug Kayaknu ippunittak nai dimedakku amu, nug eheɗ hak amunu uug maokku;
amge aun nug Kayaknu ɗonu ena doya, nai dim lamidkku amu, nug amunu nob ena aokku.
14Danab dabmak ena ele dilag ippunittak am le danab bauklel madatte, am amubia daatte;
doyak dabmak ena elenu nai am he, danab nug paha mauhaknu pelemppa ii tette.
15Danab ah ag diignu doyak tutukku ele ag laa dilag neekkakppa ena daatteb;
amge laa ag Yawe ippuanattom bia Nug dim lamidkkulagnu uun hetteb ele, ag uug anidtteb.
16Danab nug eheɗ bemanu dabmak awa dabmak amu dim lamittak kobol dim lamidtte amu, nug doyak enappa keeke hette;
amge danab Kayak dab-ii-maama ii dim lamidtte ele, nug he, nug Kayak dab-ii-maama hak kobol dim lamitta oitte miag atitte.
17Nai awa ukkak danab nau nug uug he bette;
amge nai awa ukkak danab, laa ag nuhignu genab elele dooglagnu elele, nug he, maɗoɗ bette.
18Danab nug tolittak awaknu uutte ele, gogtak nuhig am uɗa nak awa, daɗek ele daakkunu daatte;
amge aun nug tolittak ena aotte, nug binag aotte.
19Danab nug keeke ena bekkunu oo dayeb ukkeb ukkeb, nug meu andatta, am enanag dootte;
amge danab ag Kayak dab-ii-menan ii dim lamidtteb ele, ag ahilag eheɗ hak uuglagnu oolagppa uuaknab dootteb.
20Aun nug danab doyak dabmak ena ele oitte, nug doyak dabmak ena ele awa oitte;
amge aun nug danab ag Kayak dab-ii-menan ii dim lamitteb ele oitteb, nug nau anidkku.
21Uug nug hipunin danab ah dim lamatta, aben oh ag gottebppa ele gotte;
amge genab tutukku hak danab ag ena aon daatteb.
22Danab ena, nuhig aug amu, nug mauhakppa ukkeb, aug amu paha ii iitta mema. Dayeb ukkeb, alakkud aoglag;
amge hipunin danab aulag ag qagmetteb ele, genab tutukku hak danab ag aoglag.
23Daɗek danabnu dad am ee kuɗumnab eletai;
amge laa ag nai doya mala hettoɗia epeɗia elele mettak kobol ii dim lamidtteb ele, ag nuhig ee aɗidna aotteb.
24Laa nug nid naunau nuhikkud, nug eheɗ hak ahilagnu toliatta, bu ii madatte amu, nug danab nug laanu nau ninig ele dootte, nug ahilagnu anambia hette;
amge laa nug nid naunau nuhikkud dilagnu oo mauhtte amu, nug ag toliatta, bu mattak ii uutte.
25Genab tutukku hak danab ag ee laeg ukke, oolag diditte;
amge nau hak danab ag am enug aqatte.
© (Active), Wycliffe Bible Translators, Inc. All rights reserved.