Prowerb 1
1
Oiyak ehanittaknu nai tutu imu ib kuɗumppa ehanigkkunu elele
1Oiyak ehanittaknu nai tutu, Dawit bekka Solomon, Israel dilag king, nug yom am iikku. 2Solomon nug oiyak ehanittaknu nai tutu yaalattom amu, nug diig piɗe piɗenu yom. Amuam:
danab nug doyak dabmak ena ele aokkunu,
nug nuhig oiyak atognoa enaib oikkunu,
nug nai unuqagnab daattenu meu, nug amu diignu doyak tutukku anidkkunu,
3nug attem ha, nug nuhig oiyak atognoa enaib oikkunu,
nug eheɗ bemanu dabmak awa dabmak amu dim lamittak kobolppa oikkunu,
nug genab tutukku hak kobol, nai doya mala hettoɗia epeɗia elele mettak kobol ele dilahnu dabmak pehettak awa dim lamatkkunu,
4nug doyak ii awak ele daatte dayeb, nug eheɗ bemanu dabmak awa dabmak amu dim lamittak kobolnu doyak aokkunu,
nid o nid ahin bau nug doyak, aria laanu neekkakppa nug dabmak eheɗ ii aomanu kobol ele aokkunu,
5-6danab nug oiyak ehanittaknu nai tutu, aria keeke danab ag dootteb ii dootteb ele ouaqata ippuanattak nai ele dookkunu,
diig amu ohnu amu, oiyak ehanittaknu nai tutu imu am amunu daatte.
Aria, danab nug doyak dabmak ena ele, nug daug huma doya, nug nuhig doyak dabmak ena ele nai imuppanu tuɗitta awaɗ!
Ge, danab nug oo maittak awaknu ehah ele amu, nug ele nai imuppa ulum awaɗ!
7Amu Yawenu ebehi oh bodoetta le mak kobol am doyak digma awak aakku;
amge danab ag Kayak dab-ii-menan ii dim lamidtteb ele ag doyak dabmak ena elenu, aria tolittak awaknu ele, ag amu dilahnu ena iinab dootteb.
Doyak dabmak ena ele, amuib dim lamittaknu nai
8O bekkal, na mamen da, na dahil tolittak nai doye!
Ao, na anin toppan ippunittak ena aome amu, na amu aib uume.
9Aɗinu?
Tolittak nai dahil, aninnu ippunittak nai ele amu, amu oh am baɗi, ikkin bala mettaknu bia daakku;
am kalele, na baat bala medakkunu bia daakku.
10Da bekkal, hipunin danab ag na eeɗidkkulag dayeb amu,
na aib dim lamadna, ag atteb bia heme.
11Ag inam akkulagtai. “Na doppe, ig ele, ig laa meidta daatta, qepput mauhaɗ!
Ao, ig danab nug beɗuppa aab iitta, ig nug hamu qepput mauhaɗ!” akkulag.
12Ag anam awona amu, ag inamtai tuɗidna akkulag. “Danab nug bau dayaya, laippun oɗe awa mauha, gaɗa moɗppa notte, amubia ig moɗ bia daat, danab aotu!
Ao, mauhak danab moɗppa noa daatte, amubia ig laa aopput, ig eppenigppaib dayaɗ!” akkulagtai.
13Ag na amenppa anam awona amu, ag akkulag. “Ig keeke digdig, danab keeke amu oh awaknu nug men doɗo okkai ekku amu, ig amu aognig.
Ge, ig yabhokppa anam aot, ig launkadppa mepput, ig launkad am en amuppa ambak daaglag.
14Ig anam hekkunig amunu, na doppe, ig ele tamanit,
keeke ig aognig amu, ig panit diignig.” Ag anam aakku akkulagtai.
15Amu genab, ag anam aakku na amenppa akkulagtai, amge da bekkal, na aib ag ouaqame.
Ao, na aibnab ib ag gokkulag ele mattan gome.
16Na ag ele oh ii gomananu diig am inam.
Ag pahaettak hipunin hekkulagnu hetteb.
Ao, ag laa qeppeg mauhkkunu oolag huana hette.
17Ai awaknu uhui laa mauhnoak otalppeg, ai ag miagib anidkkulag,
amuam uɗat meu ele iitta, ⌊amunu hipunin danab amubia kobol nau hena, miag atiakib nauhkkulagnu hetteb amu, na amubia aib heme.⌋
18Hipunin danab ag aakku akka ahilkad pelem maadtteb.
Ao, ag pelem maadtteb, ag amuppa nona mauhadkkulag.
19Amuam danab ag keeke kuɗumnu oolag he, kobol eheɗppa aoglagnu hetteb ele, ahilagppa bette;
oo hak nau ahilag amu he, ag mauhtteb.
Doyak dabmak ena elenu nai
20Ah laa onig, Doyak Dabmak Ena Ele, nug aab okkainu ibppa dayaya, ewa nai atte.
Ao, nug tamaniak aben naɗippa baag okkaippa nai maditte.
21Nug aab okkai ooppa, ib laalappa, aben danab ah kuɗum ag keeke meegeg, laa ag daden metteb ele, nug aben aguppa ukka, nai nuhig doyak dabmak ena ele ag dooglagnu baag okkaippa maditte.
Ao, nug aab okkainu od oɗeppa dayaya, nai nuhig maditte.
22Nug atte. “Ag danab ah ag doyak ii awak ele, haen gane laa ele ukkeb, ag doyak ii awak kobol ahilag uun oiglag?
Ao, ag danab ah ag awa awa qettak nai mattiglagnu enanagnab dootteb ele amu, haen gane laa ele ukkeb, ag kobol amu uuglag?
Ge, ag danab ah ag Kayaknu ii dabmena, ii dim lamidtteb ele, ag doyaknu nau ninig ele dootteb amu; haen gane laa ele ukkeb, ag kobol amu uuglag?
23Ag danab ah anam amu, ag da Doyak Dabmak Ena Ele, ag matu daug batak dahil imu dabmena dim lamidlob amu,
da dahil doyak dabmak ena ele imu oh ag mattalom.
Ao, da dahil dabmak appi, ag doolob.
24Amge da ei, ag uun, da uuiɗppig.
Ao, ag dahil nai dooglagnu da eppel bahimi amu, auntai laa ii doum.
25Amu genab, ag dahil ulum nai ena, ag amu oh dooglagnu uuppig.
Ao, ag daug batak nai da hemi amu, ag amu uuppig.
26Ag amu heppig amunu, da haen aɗi keeke heeb, ag uug naunab dooglag amu, da haen amuppa imadkkul.
Ao, haen padal mak haen laa ahilagppa beeb amu, da ag awe awe aqadkkul.
27Ulah naɗi laa uɗia keeke oh he nauhtte, padal mak amubia ahilagppa bekku haenppa amu, da anam hekkul.
Ao, kilibob okkai keeke he nauhtte, uug naunab amubia ag tonadkku haenppa amu, da anam hekkul.
Ge, ahilagppa uug, amu uug nau ele beya tonadya hepeɗ, ag elele iittanab iitta dooglag haenppa amu, da anam hekkul.
28Amu da Doyak Dabmak Ena ele anam hekkul,
amu haen amuppa aun aɗi ag dahil nai ii doon dim lamidppig ele amu,
ag dahilnu ekkulag, amge da nob laa ii madapa.
Ag da mattiɗkkulag, amge ag da ii aniɗmana.
29Ag doyaknu nau ninig ele dooppig.
Ao, ag Yawenu ebehilag oh bodoetta le mekkunu uuppig.
30Ag dahil ulum nai ena doon, dim lamidkkulagnu uuppig.
Ge, ag daug batak nai dahilnu am keeke hamu bia dooppig.
31Ag amu heppig amunu, ag ahilag oiyaknu meu heeg beum, am meu nau ninig ele amu, ag aakku lakkulag.
Ao, ag keeke laala hekkulagnu lokkumakppa dabmena, maittak eheɗ aoppig amu, maittak amunu meu nau, ninig ele, ag lappeg, oolag didikku.
32Aɗinu? Danab ah ag doyak ii awak ele daatteb amu, ag ahilag eheɗ hakppa mauhkkulag.
Ao, danab ah ag Kayak dab-ii-menan ii dim lamidtteb ele, ag kaaka bia oinna, uug laa iinab bema anana oitteb ele amu, ahilagppa padal mak aakku bekku.
33Anam aakku, amge aun nug Doyak Dabmak Ena ele da, nug da oɗel dootte, nug baɗak iittappa daakku.
Ao, aun amu hette ele amu, nug manin, baɗak iitta ele daakku,” awa atte.
© (Active), Wycliffe Bible Translators, Inc. All rights reserved.