Pilipai 2
2
Kristus am okkai, amge Nug nukka nug onig qe neum
1Aria, ag Kristusnu daatteb, amu Nug he, ag oolag ɠagattag qak dootteb. Kayaknu oo mauhak am ag oo mak madatte. Kayak Ouɗi Nug he, ag tamaniak laippu daan, ag nug oo bodoettak, amu ag nug oo bodoetta le mak ele doon daatteb. 2Aakku amu, gemu ag heppeg, da maɗoɗppan gamag ahak elelenab dookkulnu, ag inam hekkulagnu nakok ɠagattag unuqadttem. Ag dabmak laippu doyak ele laippu aona, ag akka akka oo mauhak laippu doona, ag laippu daan, neekkak laippuppa oiyeg! 3Ag akka akka ahilagnuib dabmenan, keeke laa aib heppig. Amu ele ag akka hamu onilag humanna, keeke laa aib heppig. Ag akka ag onilag qeppeg neeb, danab laa dilagnu, “Da ag eɗadttem,” aib dooppig. 4Ag anen anen akkaib ag ahilagnuib aib dabmeppig. Iitta. Ag danab laa dilagnu ele dabmatteg!
5Jesus Kristusnu dabmak bianab ahilagppa daakku am ena. 6Amuam inam. Nug am Kayak genab dayom, amge Nug Kayak daatte, Nug amubianab daakkunu wagai ii meum. 7Iitta! Nug kobol amu uua, tatam dayom bia daakkunu doyaya ii ha, danab beɗu awa, danab ba, maɗi nid hamu bia dayom. 8Nug danab beɗu awa, Nug nukka Nug onig qe ne, Kayak oɗeib dim lamitte ukke, Nug mauhom. Amge Nug danab oh mauhtteb bia ii mauhom. Iitta! Nug ad emaitakppanab mauhom. 9Nug anam heum amunu, Kayak Nug Nug aben attannab, aben laa oh eɗattakppa ma, Nug Jesus onig okkai, laa oh tippalattak mettom. 10-11Kayak Nug geha danab oh hab attannu, wanppanu, amu mauhakppanu ele, ag oh Jesus onig doona, ag Nug noobppa gatelag qaun okkulagnu, ag, “Jesus Kristus Nug am Naɗi,” amu ele akkulagnu, Nug onig amu Jesus mettom. Danab oh ag, “Jesus Kristus Nug am Naɗi,” akkulag amu, amuppa Mame Kayak, Nug binag amahlak oppiaawak ele aokku.
Kristen ag danab ah oolagppa amahlak daatteb
12Aria gamalad, anukka da ag ele daamut, haen amuppa ag hanhan Kayak oɗe dim lamidttappig, amubia gemu da ag ele ii daattem, da laih daattem amu, gemu ele ag nai nuhig dim lamidkkulagnu huana dabmenana heig! Amu Kayak Nug ag eɗua diiom, ag amu gogppa tekkunu ag nuhignu ag ebehilag oh bodoetta le meeb, ag oolag ottaiebeb, ag Nug oɗe dim lamitteg! 13Aɗinu? Kayak Nug hanhan, ag Nug oo niitte bia, nuhig uɗatnu dabmaknab aon, amu hekkulagnu oolagppa uɗat hette.
14-16Ag anam henana, ag Kayaknu neekkakppa oolagppa kaliak laa iitta, oppiak ele wan imuppan kobol eheɗ ooppa, wan imuppan eheɗ hak danab ele oolagppa, Kayak bekkod oolagppa kaliak laa iitta ele daaglagnu, ag aɗi hetteb ele amu, ag naittuɗ mak, a ona a doak ele uuna heig! Ag hoɗoppai gatatuppa amahalna, miag atiak daatteb, amubia ag am Kayaknu danab daatteb, doyak amu miag atiak daakkunu ag nai bauklel ele aɗan, wan imuppanu danab laa, ag kobol tutukku uuna, eheɗ hetteb ele amu, ag amu ippunadkkulagoitte. Ag anam hekkulag dayeb amu, da Kristusnu deɗppa ahilagnu oo gamag ahak dookkulnu, da uɗat hamu ii hein, ɠagattag dahil hamu ii kakidmi ele dookkulnu elele daakkul. 17Ag Jesusnu oolagppa genab dootteb, diig amunu ag Kayak waappa daan, Nug oɗe dim lamidtteb. Anam amu, amuam ag doɗ manan Kayak medatteb bia. Aria, da am wain gokkaɗaknu ofa ahilag mana mettak amu qaɗeppa gokkaɗaknu bia daakkul dayeb amu, da maɗoɗppan gamag ahak doottem, amu da ag ele maɗoɗppan gamag ahak amu dooglagnu ool daatte. 18Anam amunu ag ele maɗoɗppan gamag ahak doobppeg, ag da ele oh ig maɗoɗppan gamag ahak dootu!
Timoti Epaproditus ele dilah nai
19Amu Naɗi Jesus Nug oo dayeb, nakoknab laa ele, geha da Timoti ahilagppa meppi ukka, ⌊eɗua uɗieb,⌋ ag attem daatteb ab doyen amu, da ool ena daakku. 20Da danab laa Timoti bia iitta. Nug nukka aakkuib ag ena daaglagnu dabmak genab aotte. 21Danab laa oh ag akka ahilagnuib dabmenana, Jesus Kristusnu uɗat atognokkulagnu dab-ii-metteb. 22Amge ag dootteb, Timoti nug am danab enanag. Nug am nid mameg ele uɗat hettep, amubia nug da ele Nai Ena mehuqak uɗat heuɗ ukkom. 23Amu tatam dahilppa keeke oh attem bekku amu da doyoya, da nug pahanab ahilagppa meppi gokkunu dabmettem. 24Amu Naɗi Nug ib laa dahil heeb, da dakka, da ele ahilagppa gokkulnu dabmein doottem.
25Amu da Epaproditus, nug am da layalnab, i uɗat ihinih laippu, nug da ele Kayaknu daup danab bia daattep, nug ag Pilipai daatteb, ahilag nai awa ukkak danab, ag nug meeg, da ehaniɗkkunu uɗiom daatte amu, da nug ahilagppa meppi gokkunu ɠagattag dabmettem. 26Aɗinu? Nug ag anadkkunu oo okkainab daatte. Ele amu, ag nug am oɗe elenu dooppig amunu nug amunu oo uug ele daatte. 27Amu genab, anukka nug oɗe ma mauhkkunu miagnab dayom, amge Kayak nuhignu oo gai-iitta doya oo metta ehanitta he, nug eɗua bau daatte. Am Kayak Nug nuhignuib oo ii doyom. Iitta. Nug dahilnu ele, uug okkainab da toniɗmanu oo doyom amunu Nug he, Epaproditus eɗua bau daatte. 28Kayak anam heum amunu, da nug eɗue ahilagppa meppi gokkunu dabmak okkainab aottem. Aɗinu? Nug ukkeb, haen ag nug anidna, ag oolag gamag aheb, da amu dooppi amu, doyak amuam dahil ooppa uug doyak ele qeeb nekku. 29Haen nug ukka ahilagppa teeb amu, ag Naɗi onigppa maɗoɗppan gamag ahak okkai doon, ag nug ele laippu dayaknu oolagppa eleleib doyeg! Danab anam amu ag binag metteg! 30Aɗinu? Nug Kristusnu uɗatppa mauhkkunu miagnab dayom, amge nug bau daakkunu am anuqak dab-ii-meum. Iitta. Nug ag da ehaniɗkkulagnu elele iitta daaeg doya, nug amu elele medakkunu am anuqaknu dabmak okkai awa, uɗat amu heum.
© (Active), Wycliffe Bible Translators, Inc. All rights reserved.