Namba 15
15
Israel danab ah Kanan wanppa ii goppig daaegeg, Yawe Nug mana mettak haknu ɗo Moses mettom
1Amu Yawe Nug Moses amegppa aum. 2“Na Israel amelagppa nai imu appe doyeg!” awa aum. ⌊Nug anam a amu, Moses nug Israel amelagppa inam aum.⌋ “Ag wan da ag amuppa daaglagnu madattem amu, ag wana, appa daanna, 3-4ag anen anen deɗ laala aab aɗunu ofa henana, Yawe mettaglagnu doɗ aon, Nug gumidna wana, Nug mettaglag. Ag mana mettak hena, doɗ maippeppeg, muttuɗig teebeb, Yawe Nug mana mettak amunu muttuɗignu ooppa ena dookku. Doɗ laala amu makau, laala amu sipsip, o iitta meeme. Mana mettak amuam manaknu ofa, o iitta mana mettak laala daaglag. Mana mettak amuam nai genab ana qakkaknu ofatai, o iitta mana mettak amuam ɗo hamu mettaknu ofatai, o iitta mana mettak amuam hobul dayaknu haen epeɗiaknu ofatai. Amge ag aɗi mana mettak aon, Yawe gumidna wana mettaglag amu, auntai laa nug anam hette amu, nug ee aegnu ofa ele awa, Yawe gumitta ukka medakku. Mana mettak amu haknu am 1 kilogram plaua enanag, 1 lita goɗen ele kabolia, mana Kayak medakku. 5Amu laa nug manaknu ofa hette, o nug sipsip gaiɗ mana, Kayak medatte dayeb amu, nug 1 lita wain, wain gokkaɗaknu ofa daakkunu awa hekku.
6Ag sipsip dawai okkai meum nuhignu, ag ee aegnu ofanu, ag 2 kilogram plaua enanag, 1 lita maha ele goɗen ele kabolieg! 7Amu doɗ amu ele ag wain gokkaɗaknu ofa haknu, ag 1 lita wain maha ele aon hekkulag. Mana mettak amunu muttuɗignu, Yawe Nug ooppa ena dootte.
8Ag makau gaiɗ laappa Yawenu manaknu ofa hekkulagtai, o iitta ag makau amuppa nai genab ana qakkaknu ofa hekkulagtai, o iitta ag laippu dayaknu ofa hekkulagtai. 9Ag amu hekkulag amu, ag ee aegnu ofa ele hekkulag. Ag ee aegnu ofa makau gaiɗppa hekkulagnu amu, ag 3 kilogram plaua enanag, 2 lita goɗen ele kaboliglag. 10Ag wain gokkaɗaknu ofa, mana mettak amu ele hekkulagnu amu, ag 2 lita wain aon hekkulag. Mana mettak amuam aab aɗunu ofa, nuhig muttuɗignu Yawe Nug ooppa ena dootte. 11-12Ag anam aakku makau dawai, o iitta, sipsip dawai okkai mak, o iitta sipsip gaiɗ, o iitta, meeme nag anen anenppa mana mettak hekkulag. Ag mana mettak gane Yawenu hekkulag amu, ag doɗ anen anen oh anamnab hekkulag. 13Aun aɗi ag anilkad, mamelkad Israel ted, ag doɗ main Yawe medatteb amu, ag anamnab aakku hekkulag. Mana mettak amuam aab aɗunu ofa, nuhig muttuɗignu Yawe Nug ooppa ena dootte. 14Aun aɗi ag wan laihnu danab, o danab aun aɗi laa, ag uɗin, ag oolagppa daatteb amu, ag Yawe Nug mana mettak amunu muttuɗignu ooppa ena dookkunu, ag aab aɗunu ofa hekkulag amu, ag, ag Israel hetteb, ag ele anamnab aakku hekkulagoitte. Ɗo imu nug hanhan dim lamittak daakkuoitte. 15Ɗo amuam ag, wan laihnu danab, ag uɗin, ag oolagppa daatteb ele, am ag oh tonadtte. Ɗo imu ag hanhan dim lamidkkulag. Ag, amu wan laihnu danab, ag oh Yawe noobppa laippuib daatteb, laala iitta. 16Ɗo amu oh dim lamittaknu amu, ag, amu wan laihnu danab, ag uɗin, ag oolagppa daatteb amu, am ag oh tonattom aakku daatteb,” awa aum.
17Amu Yawe Moses amegppa aum. 18“Na Israel danab ah amelagppa inam appe doyeg!” awa aum. ⌊Nug anam a amu, Moses nug Israel amelagppa inam aum.⌋ “Dimppa haen ag wan laa, da amuppa omalatte gottem ele amu, ag amuppa nokkulag amu, 19ag ee wan amuppanu aon lanana, ag amuppanu ee laala ele aon, ofa daakkunu aon, Yawe metteg! 20Ag ee aeg mumuɗaknu abenppanu ee aeg aotteb amu, ag aeg naanaeg ganuɗak amuppanu bret batappatak laa, ofa daakkunu, ag aon, Nug metteg! 21Ag buɗub buɗub doobob, hanhan ee aeg tatam ganuɗakppanu ee hak amu, mana mettak bia Yawe mettaglag,” awa aum.
Ii doyaya hipunin hak elenu mana mettak
22-23⌊Amu laa nug nai imu mattie, Israel ag dooppig.⌋ “Israel danab ah, ag ɗo oh Yawe ag dim lamidkkulagnu Moses mettom amu, ag dim lamidkkulagnu daatteb. Amu deɗ adekkuppa Yawe ɗo amu mattom amu, ag digmena, deɗ aguppanab dim lamidkkulagnu dayeb ukkeb ukkeb, hanhan dim lamidkkulagnu daatteb. Anam, amge ag ii doon tippalkkulag dayeb amu, Yawe Nug Moses amegppa amunu nai imu ⌊ag amelagppa akkunu inam⌋ aum.”
24“Israel oh ag hipunin ii doonna heppig dayeb amu, tamaniak oh ag makau gaiɗ laa manaknu ofa hena, doɗ amu manan, Nug mettaglag. Ag makau gaiɗ, amuppa mana mettak henana, ag Yawe aum bia, ag ee aegnu ofa hena, ag wain gokkaɗaknu ofa ele hekkulag. Mana mettak amunu muttuɗignu, Yawe Nug ooppa ena dootte. Amu ag meeme dawai laa ib etta hipunin haknu ofa daakkunu ele Nug mettaglag. 25Mana mettak danab nug Israel dilag eheɗ haknu nob nau doɗ tiigppa iitta meeb elele medakkunu, nug mana mettak anam aakkude haɗ! Nug anam heeb amu, Yawe Nug hipunin ahilag uhuqa madakku. Nug hipunin ahilag uhuqa madakkunu diig laa am, ag hipunin ii doonna heppig. Am diig aɗit laa am, ag aab aɗunu ofa hena, ag ib etta hipunin haknu ofa ele heppig. 26Ag anam heppeg amu, Yawe Nug Israel danab ah oh, wan laihnu danab, ag uɗin, ag oolagppa daatteb ele, Nug ahilag hipunin uhuqa madakku. Ag oh am uhuqak aoglag. Aɗinu? Danab ah oh ag hipunin amu heppig, amge ag ii doonna heppig.
27Amge laippu laa nug ii doyaya hipunin ha amu, nug meeme balat laa, maɗ laippu awak ele, nug doɗ amu awa, ib etta hipunin haknu ofa haɗ! 28Mana mettak danab nug danab amunu eheɗ haknu nob nau doɗ tiigppa iitta meeb elele medakkunu Yawe noobppa, mana mettak anam aakkude haɗ! Am mana mettak danab nug eheɗ haknu nob nau doɗ tiigppa iitta meeb elele medakkunu doɗ anam mana, Yawe metteb amu, Yawe Nug danab amunu hipunin, nug doyaya ii heum ele amu, Nug hipunin amu uhuqa medakku. 29Ɗo imu amu, Israel danab, amu wan laihnu danab ele, ag oh tonadtte. Aun nug Israel tedte, iitta nug wan laihnu danabte, keeke amu oh am hamu. Auntai laa nug ii doyaya, hipunin hette amu, ɗo laippu amuib ag oh tonadtte. 30Ɗo amuam danab ah ag ii doonna hipunin hekkulag, ahilagnu, amge aun nug hipunin doyaya hette, nug Yawenu dabittak nai aakku atte. Nug Israel oolagppanu geɗittak daakkuoitte. Israel tedte, iitta wan laihnu danabte, keeke amu oh am hamu; nug Israel oolagppanu geɗittak daakkuoitte. 31Nug ag oolagppanu geɗittak daakkunu diig am, nug Yawenu nai am keeke hamu bia doyaya, nuhig ɗo loppaɗom. Aun anam heum ele, genab nug ag oolagppanu geɗittak daakkuoitte. Nuhig nau haknu aab am, nug beɗuppa aakku daakku,” awa aum.
Israel danab ah ag laa nug Sabat deɗ loppaɗomnu qeeg mauhom
32Israel danab ah ag atu taɗakppa oinna amu, ag danab laa nug Sabat deɗppa aab awewe anidppig. 33Laa ag danab aab awewe anidppig ele amu, ag nug aon omalna, Moses, Aron ele, am Israel danab ah laa oh ele dilagppa goppig. 34Ag anam heppig, amge ag attemnab nuhigppa hekkulag amu, ag tutukku oolag ii maittom amunu, ag Yawe Nug ag attemnab hekkulagnu ab doon hekkulagnu, ag danab amu maniguittakppa meppig. 35Anam heeg amu, Yawe Nug Moses amegppa aum. “Danab amu nug mauhkkuoitte. Israel danab ah oh ag nug haen tutu dayaknu aab kalak dimittim menppa qeppeg mauhkkuoitte,” awa aum. 36Yawe Nug anam aum amunu, Israel danab ah oh ag danab amu aon gona, haen tutu dayaknu aab kalak dimittim menppa makkuɗeg mauhom. Ag Yawe Nug Moses amegppa anam hekkulagnunab aum bia heppig.
Lamen bala digdig mettak
37Amu Yawe Moses amegppa aum. 38“Na nai imu Israel danab ah amelagppa appe doyeg!” awa aum. ⌊Nug anam a amu, Moses nug Israel amelagppa aum.⌋ “Buɗub buɗub doobob amu, hanhan ag muɗi hatti naunau qagmak laala oh ona qakkan amu, ag ahilag lamen elab daug daug koitkkulag. Muɗi hatti naunau qagmak amuppa amu, muɗi hatti laippu edppa hak ele amuppa daakku. 39Muɗi hatti naunau qakkak amu anam heppeg daappeg, ag anidna, ag Yawe, Nug ɗo oh mattom dabmekkulag. Nuhig ɗo, ag dabmenan oiglagnu diig am, ag hipunin hemananu, ag beɗulkad aɗi hekkulagnu eeɗatteb hemananu, amelagppa aɗi keeke eheɗ laa anidna, ‘Da amu helom,’ dabmemananu ele. 40Ag muɗi hatti naunau amu lamen ahilkadppa koitattona amu, ag geha nuhig ɗo oh dabmena dim lamidnana, ag Kayaknu tituana mettak daaglag,” awa aum. 41⌊Amu Yawe Nug aum.⌋ “Da, Yawe, da am ahilag Kayak. Ahilag Kayak daakkulnu, da ag Isipnu diie, omalatti uɗippig. Da am Yawe, ahilag Kayak,” awa aum.
© (Active), Wycliffe Bible Translators, Inc. All rights reserved.