Mak 8

Jesus danab 4,000 ee mattom

1Aria, deɗ laa danab ah kuɗumnab baula Jesus gumidna goppig. Ag gona daaegeg, ee iitta amunu, Jesus Nug ippunittak awak danab onilagppa e doeg Nug aum. 2“Da danab ah imu dilag ool bodoetta le mette. Ag dahilppa uɗieg, ig deɗ ewam imu aakku daamut. Ag ee oh laeg iitta me, gemu ag ee iitta. 3Laala ag umanu uɗippig amunu da ee ii matten heppi, ag enug aqebeb gonana, ib manppa ag amelag qittineb nena qekkulag,” awa aum. 4Nug anam a amu, nuhikkud ippunittak awak danab ag appig. “Laih ippa amu danab ag ii daatteb amunu, ig adeppanu bret kuɗum, danab ah imu dilag elele aopput, ag elele lappeg, oolag didikku?” aon appig. 5Ag anam aeg, Jesus ag oɗ mattom. “Ag bret kunum gane ele?” awa aum. Awa a amu ag appig. “Bret kunum eblaih aɗit ele,” aon appig.

6Ag anam aeg, Jesus Nug danab ah kuɗum oh ag wanppa heɗep nena daaglagnu a, ag aakku daappig. Ag anam daaegeg, Jesus Nug bret kunum eblaih aɗit ele awa, Kayak amegppa, “Ena hen mekkame,” awowa, pane ne, nuhikkud ippunittak awak danab paniglagnu matte, ag panippig. 7Kakai naunau laippu laippu ele dayom amunu Jesus Nug amunu ele Mameg amegppa, “Ena heme” awowa, paniglagnu ippunittak awak danab ele mattom. 8Ag panieg, danab ah ag laeg, oolag dittie, ee big dayom amu ippunittak awak danab ag aon inaeg, kaleg eblaih aɗit ambeum. 9Danab haen amuppa ee lappig ele amu, ebqak ahilag am 4,000 anam. 10Ag ee laeg, Jesus ag gokkulagnu aum. Ag ukkaegeg, Jesus Nug nuhikkud ippunittak awak danab ele ag uub attan tena, ⌊aab okkai⌋ Dalmanutanu wan atu, amuppa goppig.

11Jesus Nug ukka te, ɗo gumak danab-Parasia laala ag Jesus gumidna gona, ag digmena Jesus keeke laalanu oɗ medappig. Amu ag Jesus ma anttak mettanna, ag Nug Kayak dabmettaknu kobol danab haknu elele iitta laa heeb anidkkulagnu oɗ medappig. 12Ag hekkunu aeg amu Jesus Nug nai amunu gaɗa tuqak bia doya, Nug aum. “Aɗinu gemun danab ag da Kayak dabmettaknu kobol danab haknu elele iitta heppi anidkkulagnu oɗ meɗatteb? Da genab ag amelagppa attem. Ag gemu daatteb imu amu, ag anidkkulagnu uɗat amubia amu da laa ii hepa,” awa aum. 13Nug anam awowa amu Nug uuatta, uub attan baula ta, le ameg Galili mataɗa laih ugekke, ippunittak awak danab nuhikkud ag ele oh goppig.

Yis am kobol nau ippunigttenu nai

14Amu nuhikkud ippunittak awak danab ag bret ele awa ukkaknu daulag atiom, bret kunum laippuib uubppa dayom ele, ag amu aon goppig. 15Amu Jesus Nug ag amelagppa nau aomanu nai imu aum. “Ag ɗo gumak danab-Parasia amu Herot ele dilag yisnu dabmeig!” awa aum. 16Nug anam a amunu ippunittak awak danab ag akka akka appig. “Ig bret iitta amunu Nug anam aum,” aon appig.

17Anam amu, Jesus Nug ag aɗi nai mattiegeg doya, Nug aum. “Ag aɗinu bret iittanu nai maditteb? Ag gemu ele elele iite anidtteb; diignu doyak tutukku ele iite dootteb? Ahilag dabmak am ituak daattete? 18Ag amelag ele, amge ag keeke iite anidtteb? Ag daulag ele, amge ag keeke iite dootteb? ⌊Ag dahil uɗatnu oolag maidkkunu elele iittate?⌋ Ag imu daulag atiomte? 19Deɗ laa da bret kunum tanig ele panai, danab 5,000 ag lana malaeg amu, ag ee huppu kaleg gane inaeg ambeum?” awa aum. Awa a amu ag, 12 appig. 20Anam aeg amu Nug aum. “Aria, deɗ laa da bret kunum eblaih aɗit ele panai, danab 4,000 lana malaeg amu, ag ee huppu kaleg gane inaeg ambeum?” awa aum. Awa a amu ag, “Eblaih aɗit ele,” appig. 21Ag anam aeg amu Jesus Nug aum. “Anam amu ag tuɗidna, pehettak iite dootteb?” awa aum.

Jesus he, danab ameg gaɗuak eɗua neekkom

22Aria, ag gona, Betsaida teeg, appan danab laa ag danab laa ameg nauhak ele omalna, Jesus gumidna gona, Nug eppeg danab amu qaɗeppa ma bappaidkkunu unuqppig. 23Ag unuqeg amu Jesus Nug danab amu eppeg aɗa, omala aab dimittim ukka, Nug waɗu hunue, danab amegppa no, Nug eppeg danab qaɗeppa ma oɗ mettom. “Na keeke laa anidttemte?” oɗ mettom. 24Jesus Nug oɗ mette amu danab nug aum. “Ao, da danab anadttem, amge tutukkunab ii anadttem. Ag ad oitteb bia anadttem,” awa aum. 25Nug anam a amu Jesus Nug eppekuɗ eɗua amegppa me, nug ameg ena daye, nug elele neekkom. 26Elele neekke amu Jesus Nug aum. “Na aib eɗun aab ooppa gome. Na lautppa ukke!” awa aum.

Pita nug Jesus am Kristus miag aum

27Jesus Nug anam ha amu, deɗ laa Nug nuhikkud ippunittak awak danab ele ag ahan, aab nakok laa Sisaria Pilipai taliliak daappig, appa goppig. Ag gonana amu Jesus Nug oɗ mattom. “Danab ag dahilnu, ‘Da am aun,’ ag amunu aɗi atteb?” awa oɗ mattom. 28A amu nuhikkud ippunittak awak danab ag appig. “Laa ag nahipnu, ‘Layattak Jon,’ atteb, amge laa ag, ‘Nug am Elaiya,’ atteb, amu laa ag, ‘Nug am propet oolagppan laa,’ aon atteb,” aon appig. 29Anam aeg amu Jesus Nug aum. “Anam amge ag akka, ag dahilnu aɗi atteb?” awa aum. Awa a amu Pita nug aum. “Na am Kristus!” awa aum. 30Pita nug anam a amu Jesus Nug ag nuhignu danab laa amelagppa mattimnanu ɗo ɠagattag meum.

Jesus Nug attem mauhkkunu digma mattiom

31Aria, haen amuppa Jesus, Nug am Danab Bekkalag, Nug digma, Nug ib laa iitta, Nug guittak kuɗum dookku, Juda dilag ikki danab, mana mettak danab okkai amu ɗo mehuqak danab ele ag geɗidna, ag ⌊heppeg, laa ag⌋ qeppeg mauhkku, deɗ ewam uueb Kayak heeb, Nug eɗua hippaidkku, Nug nuhikkud ippunittak awak danab amelagppa aum. 32Nug miag atiak a amu, Pita nug omala, piɗe wana, digma daug batete, 33Jesus Nug eɗua, ippunittak awak danab laa oh neekkattatta, Nug Pita daug bata, amegppa aum. “Satan, na dimulppa ukke! Na Kayaknu dabmak ii dim lamidttem; na danab dilag dabmak dim lamidttem,” awa aum.

34Anam ana amu, Nug danab ah, amu nuhikkud ippunittak awak danab ele ag onilagppa e uɗieg, Nug amelagppa aum. “Laa nug da dim lamiɗkkunu oo dayeb amu, nug nuhig dabmak dim lamidkkunu dab-iinab-mema. Iitta! Nug nuhig ad emaitak amu mawa, da dim lamiɗaɗ! 35Aɗinu? Danab laa nug wanppan bau daakkunu dabmak anuqak aotte amu, dimppa nug bauklel hanhannu ii aoma, amge danab laa nug dahilnu, amu Nai Enanu ele anuqak dootte, nug wanppanu bau dayaknu anuqak ii dootte amu, nug bauklel hanhannu aokku. 36Danab nug wanppanu keeke oh aokku dayeb, amge nug bauklel hanhannu ii aokku, wanppan keeke oh awom amu, keeke amu nug attem ehanidkku? 37Nug amuppa bauklel hanhannu daden mekku? Iittanab! 38Aria, danab laa nug danab Kayak uuna, kobol eheɗ laala dim lamadtteb ele, ag hipunin kuɗum laa hetteb ele amu, nug ag oolagppa oiyaya, nug dahilnu, dahil nainu ele uɗa neeb, dimppa Danab Bekkalag da, da Kayaknu binag amahlak oppiaawak ele, amu nuhikkud engel oppiaawak ele eɗut uɗit, haen amuppa danab amunu da ele uɗal nekku,” awa aum.

Currently Selected:

Mak 8: NB

Highlight

Copy

Compare