Mak 5

Jesus Nug he, danab ouɗi nau ele ena dayom

1Aria, ag gona, Galili le ameg laih Gerasa danab dilag wan atu, ag amuppa eeɗppig. 2Eeɗna amu ag uub uun, wanppa noeg, danab laa, nug ouɗi nau qalittom ele, matmatppanu Jesus gumitta uɗiom. 3Nug hanhan matmatppa dayaya oittom amu, ag danab amu baula muɗippa o senppa ele qakkaglagnu elele iitta. 4Ag haen kuɗum qagattappig, amge nug haen oh wagai ma, sen pakkua, baeg aɗaknu keeke ele he aoɗttom. Danab laa nug danab amu aɗa eɗidkkunu elele iitta. 5Nug anam ha, tuqan amun ele nug matmatppa, qauko nakok eleppa ele oiyaya eheɗ ewawa, nug nukka beɗu menppa ele tuqattom.

6Anam daattom amunu, haen amuppa nug nakok uma dayaya, Jesus antta, nug Jesus gumitta gokkunu qaiqaɗ ukka, Jesus noobppa laippun gateg qaun oum. 7-8Nug gateg qaun o amu Jesus Nug ouɗi nau, danab amuppa dayom ele, Nug nug amegppa, “Danab amu uuidna ukke!” awa aum. Nug anam aum amunu danab amu nug baag okkainabppa ewa aum. “Jesus, na Kayak Attannab Laa Oh Eɗattak Bekka. Na da attem heiɗkkutnu hettem? Na Kayak onigppa nahip nai ɠagattag qena, na da guittak nau ii meɗamnanu akkutnu oɗ medattem!” awa eum. 9Aria, Jesus Nug ouɗi nau oɗ mettom. “Na onin aun?” Oɗ mette amu ouɗi nau nug aum. “Ig am kuɗumnab amunu da onil am, ‘Daup Kuɗum,’ ” awa aum. 10Nug anam ana, ouɗi nau amu nug Jesus amegppa, “Ig wan imu uut gokkunignu aib ame,” ii daye daye unuqom.

11Nug anam aawo, bo ameg naɗi laa nakok uma qauko nakok, amu nakok takppa ee lanan daaegeg, 12ouɗi nau ag Jesus unuqna appig. “Na ig lamigna doona amu, lamigppe, ig gota bo oolagppa notu!” aon appig. 13Ag anam aeg amu Jesus Nug, “Anam heig!” awa a, ag danab amu uuidna gona, bo oolkadppa noppig. Noeg amu bo ag oolna, huana gona, aben oola noakppa le amegppa nona, le lanan mauhadna malappig. Bo amu, ahilag ebqak am 2,000 anam.

14Ag mauheg amu bo gumattak danab ag oolna gona, aab miag dayom, amu nuhig wan taliliak ele amuppa ag keeke aɗi anidppig amu aeg dooppig. Doona amu ag keeke amu anidkkulagnu ahan goppig. 15Ag gona, Jesus gumidna gona, ag danab amu dayeye anidppig. Anukka nug ouɗi nau kuɗum qalittak ele dayom, amge haen laa ag aɗi beum anidkkulagnu goppig amu, haen amuppa nug lamen takka, dabmak ena ele toetta dayom. Anam dayeye anidna, ag baɗappig. 16Aria, danab ag Jesus Nug danab ouɗi nau ele nuhignu attem heum amu anidppig ele amu, ag laa amelagppa amunu mattinna, bonu ele madippig. 17Mattieg, ag doona amu, ag Jesus Nug wan atu ahilagppanu aha laih gokkunu unuqppig.

18Ag anam unuqeg, Jesus Nug uubppa teete, danab ouɗi nau uuidppig ele, nug Jesus ele oh gokkulahnu unuqom. 19Nug anam heum, amge Jesus Nug aum. “Iitta. Na eɗun, baenadppa gumadna gona, Naɗi nahipnu oo bodoetta le me, nahip-ppa aɗi heum ohnu appe, doyeg!” awa aum. 20Jesus anam aum amunu danab amu nug eɗua ukka, Dekapolis appa ta, danab ah amelagppa Jesus keeke oh nuhigppa heumnu mattieye, ag nuhig nai doona, ag dabmak kuɗum aoppig.

Jesus Nug ah laa nid ahin ele ehanatom

21Aria, haen Jesus Nug uubppa ta, Galili le ameg mataɗa, le laih wana, le ihippa dayeye, danab ah kuɗumnab gumidna goppig. 22Ag anam daaegeg amu, Juda dilag nai doyak lagnu ikki danab laa onig Jairus nug uɗia, Jesus antta, nug Jesus gumitta ukka, Nug baegppa laippun gateg qaun o, gomela, iɗu wanppa ma, 23nug oo unuqagppanu Jesus unuqa aum. “Nid ahin dahil nug mauhkkun hette amunu na gona, eppenppa aɗappe, ena dayaya, bau daakkunu oɗ medattem,” awa aum. 24Nug anam a amu Jesus nug ele ukkaeheh, danab ah laala kuɗumnab ag Jesus happutna, qataiettan daaegeg goppig.

25Amu ah laa appa dayom ele nug tiig nak oɗe maɗ 12 nuhigppa dayom. Iitta ii mettom. 26Nug dokta kuɗum gumatta ukke, dokta ag ahilag dabmak digdigppa ehanidkkulagnu heegeg, nug men doɗo oh nuhig ag mattom, amge dokta ag nug ii ehanitteg, oɗe nuhig ukka ukka, okkai meum aakkuib. 27-28Nug anam dayaya amu nug, “Jesus oɗe danab kuɗum bappalatte, ena daatteb,” naippulag amu doya, nug nuhig dabmakppa, “Da lamen elab nuhig nakokib aɗakkul amu, da ena daakkul,” aum amunu, nug danab ah Jesus ele goppig amu nug ag oolagppa Jesus dimugppa gonana, Jesus gumitta wana, lamen lauɗittom. 29Lauɗitte amu nuhig tiig nak oɗe laippun iitta me, nug amu doye, 30Jesus Nug nuhig ɠagattag laa ukke doya, Nug eɗua oɗ mattom. “Aun dahil lamen lauɗittom?” awa aum. 31Nug anam a amu nuhikkud ippunittak awak danab ag Nug amegppa appig. “Danab ah ameg naɗi ag na gukkuidna daatteb amunu, diig aɗinu na, ‘Aun aɗailom?’ aon attem,” aon appig. 32Ag anam appig, amge Jesus Nug ahilag nainu dab-ii-mettom. Iitta. Nug aun heum amu anidkkunu neekkatta dayom. 33Dayeye amu ah amu nug, “Da nuhig lamen lauɗitten ena daami amunu, Nug dahilnu atte,” dabmakppa ana, nug baɗa hahaɗaɗa, Jesus noobppa wana, Nug baegppa laippun gateg qaun o, gomela, iɗu wanppa ma, keeke oh nuhigppa beum, nug amunu oh miag Jesus amegppa aum. 34Nug anam a amu Jesus Nug aum. “O aɗel, na ootppa genab doome amunu, oɗe nahip iitta meum. Na maɗoɗ ele ukke! Na oɗe amunu guittak baula ii doomna,” awa aum.

35Jesus Nug anam mattiaya dayeye, danab laala ag Juda dilag nai doyak lagnu ikki danab Jairus, amu nug laugppanu uɗin, Jairus amegppa appig. “Na aɗen mauhom amunu, na ippunittak danab imu uɗat baula aib mettame,” aon appig. 36Ag nug amegppa aeg, Jesus Nug nai amu daugppa doya, Nug Jairus amegppa aum. “Na aib baɗame! Na ootppa genab doye!” awa aum.

37Nug anam awona, Nug danab ah laa oh amu nuhikkud ippunittak awak danab ele ag dim lamidmananu, “Aib,” aum. Amu oh oolagppanu nuhikkud ippunittak awak danab ewam, Pita, Jems amu Jon ele aakkuib Jesus ele Jairus laugppa goppig. Jems, Jon ele, aa am eamag. 38Haen ag gona Jarius laugppa tena, Jesus Nug qanak baag okkai ahilag doyaya, mahittak kobol laala ele heegeg anttom. 39Nug anam antta, lag ooppa noa, ag amelagppa aum. “Aɗinu ag inam henan gaatteb? Nid ahin imu nug ii mauhom, nug niitte,” awa aum.

40Nug anam aum amu, ag Nug imidppig, amge Nug ag oh lamatte dimittim noeg, Nug nid ahin mameg anig ele, nuhikkud ippunittak awak danab ewam ele ag aakkuib diiatte, nid ahin niiomppa noppig. 41Ag nona, Jesus Nug nid ahin eppeg aɗa, ag nailagppa aum. “Talita kumi.” Nai amu diig am inam. “Da attem, nid ahin, na ahe!” 42Jesus Nug anam a amu nid ahin nug pahanab aha oiyeye, danab ah ag nid ahin anidna, ag huanak ottaina dabmak kuɗum aoppig. Nug am maɗ 12 ele. 43Aria, Jesus anam hewowa amu, Nug ag danab laala amelagppa amananunab, “Aib,” ana, ag nid ahin ee mettaglagnu ele aum.

Currently Selected:

Mak 5: NB

Highlight

Copy

Compare